Д.ҮҮРИЙНТУЯАГИЙН Ц.АНАНДБАЗАРТ “ӨГСӨН” 253 ТЭРБУМ ТӨГРӨГИЙН ТЕНДЕРИЙН ХАРИУ НЬ ТӨРИЙН ТҮШЭЭГИЙН ӨВ ЗАЛГАМЖЛАЛ БАЙВ УУ

2025-08-15, 98

Говьсүмбэр аймгийн Мэргэжлийн хяналтын газарт ажиллаж байсан Д.Үүрийнтуяа 2013 онд ажлаасаа чөлөөлөгдөж, Улаанбаатар хотод орж ирлээ. Хотод ирээд ажилгүй, орох оронгүй Д.Үүрийнтуяа “Сод монгол групп” ХХК-д ажилд орохоор анкет бөглөтөл Ц.Анандбазар түүнийг дуудаж, биечлэн уулзжээ. Ц.Анандбазарын тухайд, 2012 оны УИХ-ын сонгуулиар Говьсүмбэр аймаг буюу VI тойрогт МАН-аас нэр дэвшихээр бэлтгэл хангаж байсан ч 2012 оны зургадугаар сард АТГ-т саатуулагдаж, нэр дэвших боломжоо алдаж байв. Тиймээс ч Ц.Анандбазар нэр дэвшихээр горилж асан Говьсүмбэр аймгаас нь орж ирсэн Д.Үүрийнтуяаг ийнхүү биечлэн хүлээн авч уулзжээ. Ингээд Ц.Анандбазар Д.Үүрийнтуяад “Миний “Сод монгол групп” ХХК-ийн Эрдэнэт хот дахь салбарыг хариуцаж ажилла, Эрдэнэтэд орон сууц шийдэж өгнө, нөхрийг чинь ажилд оруулж өгнө, хангалттай цалин өгнө” гэх санал тавьжээ. Ингээд Д.Үүрийнтуяа 2013 оны наймдугаар сард Эрдэнэт рүү нүүж, “Сод монгол групп” ХХК-ийн Эрдэнэт салбарын даргаар ажиллаж эхэлсэн. Удалгүй Д.Үүрийнтуяа Эрдэнэт салбарыг удирдахаас гадна “Сод монгол групп” ХХК-ийн Худалдаа эрхэлсэн дэд захирлын албан тушаалыг давхар хаших болжээ.

Д.Үүрийнтуяа Эрдэнэтэд очоод гурван жил болж байтал 2016 оны арванхоёрдугаар сард Монгол-Оросын хамтарсан “Эрдэнэт үйлдвэр” ХХК-ийн Ерөнхий захирлаар Х.Бадамсүрэн томилогдов. Улмаар Х.Бадамсүрэн “Сод монгол групп” ХХК-ийн Худалдаа эрхэлсэн дэд захирал, Эрдэнэт салбарын дарга Д.Үүрийнтуяаг өөрийнхөө Санхүү, эдийн засаг хариуцсан зөвлөхөөр томилж, дэргэдээ авлаа. Энэ томилгооны “захиалагч” нь Ц.Анандбазар байв. Тодруулбал, Х.Бадамсүрэн “Эрдэнэт үйлдвэр” ХХК-ийн Ерөнхий захирлаар томилогдохоосоо бүр өмнө Жаргалсайханы Сод-Эрдэнэ, Нямдоржийн Ангар хоёртой “Газрын тосны бүтээгдэхүүн үйлдвэрлэгчдийн холбоо” ТББ-ыг байгуулж, Ц.Анандбазарын “Сод монгол групп” ХХК-ийн эзэмшлийн барилгад оффислож байсан. Н.Ангар нь Ц.Анандбазарын “Алхана трейд” ХХК-ийн гүйцэтгэх захирал, Ж.Сод-Эрдэнэ нь Ц.Анандбазарын эхнэр Н.Бямбажавын “Сод Монгол боловсрол, эрүүл мэнд сан”-гийн Удирдах зөвлөлийн гишүүн буюу хоёулаа Ц.Анандбазарын хүмүүс. Өөрөөр хэлбэл, Х.Бадамсүрэн Ц.Анандбазартай анхнаасаа нэгдмэл ашиг сонирхолтой байсан гэсэн үг. Тиймээс ч Х.Бадамсүрэн “Эрдэнэт үйлдвэр” ХХК-ийн Ерөнхий захирал болмогцоо Ц.Анандбазарын “Сод Монгол групп” ХХК-ийн Худалдаа эрхэлсэн дэд захирал, Эрдэнэт салбарын дарга Д.Үүрийнтуяаг өөрийнхөө Санхүү, эдийн засаг хариуцсан зөвлөхөөр авсан нь энэ байв.

Удалгүй “Эрдэнэт үйлдвэр”-ийн 49 хувийн дуулиант хэрэг дэгдэж, улмаар “Эрдэнэт үйлдвэр” ХХК-ийг 100 хувь төрийн мэдэлд авснаар 2019 оны гуравдугаар сард “Эрдэнэт үйлдвэр” Төрийн өмчит үйлдвэрийн газар\ТӨҮГ\ болгон өөрчилж, Ерөнхий захирлаар нь Х.Бадамсүрэнг улираан ажиллуулахаар болов. Ингээд “Эрдэнэт үйлдвэр” ТӨҮГ-ын Ерөнхий захирал Х.Бадамсүрэнгийн Санхүү, эдийн засаг хариуцсан орлогч захирлаар Д.Үүрийнтуяа томилогдсон. Ингээд болоогүй, 2019 оны дөрөвдүгээр сард Д.Үүрийнтуяагийн нөхөр Давдайн Тамир нь “Эрдэнэт үйлдвэр” ТӨҮГ-ын Инженерийн зураг төслийн хүрээлэнгийн захирлаар томилогдсон байдаг. Дараа нь, Д.Үүрийнтуяа 2022 оноос “Эрдэнэт үйлдвэр” ТӨҮГ-ын Тамгын газрын дарга, “Эрдэнэт үйлдвэр” ТӨҮГ-ын Захиргаа, удирдлага, санхүүгийн газрын тус тус дэвшин ажиллаж байгаад өнгөрөгч 2024 онд УИХ-ын гишүүн болсон. Товчхондоо, тэртээ 2013 онд Говьсүмбэрээс Улаанбаатарт орж ирж, ажилгүй, орох оронгүй явахдаа Ц.Анандбазартай танилцаж, түүний “Сод монгол групп” ХХК-д ажиллаж эхэлсэн нь Д.Үүрийнтуяагийн амьдралыг үндсээр нь өөрчилсөн. Одоо Д.Үүрийнтуяа жилдээ 340 гаруй сая төгрөгийн орлоготой, 1.4 тэрбум төгрөгийн гурван орон сууцтай, 260 гаруй сая төгрөгийн авлагатай, 920 орчим сая төгрөгийн хувьцаа эзэмшдэг, бас УИХ-ын гишүүн.

Д.ҮҮРИЙНТУЯАГ 2019 ОНД “ЭРДЭНЭТ ҮЙЛДВЭР” ТӨҮГ-ЫН ОРЛОГЧ ЗАХИРАЛ БОЛСНООС ХОЙШ Ц.АНАНДБАЗАР “ЭРДЭНЭТ ҮЙЛДВЭР” ТӨҮГ-ААС 253 ТЭРБУМ ТӨГРӨГИЙН ТЕНДЕР АВЧЭЭ

Дээр дурдсанчлан, Д.Үүрийнтуяаг 2019 онд “Эрдэнэт үйлдвэр” ТӨҮГ-ын Санхүү, эдийн засаг хариуцсан орлогч захирал болсноос хойш Ц.Анандбазарын “Сод Монгол групп” ХХК болон “Интер стандарт нефть” ХХК-ууд нь “Эрдэнэт үйлдвэр” ТӨҮГ-ын бензин, дизель түлш, тос, тослох материалын бүхий л том тендерүүдийг хуу хамж эхэлсэн. Ингээд 2024 он хүртэл таван жилийн хугацаанд Ц.Анандбазарын “Сод монгол групп” ХХК, “Интер стандарт нефть” ХХК-ууд нь “Эрдэнэт үйлдвэр” ТӨҮГ-аас нийт 253 тэрбум төгрөгийн тендер авсан байдаг ажээ. Тухайлбал, Ц.Анандбазарын “Сод Монгол групп” ХХК нь “Эрдэнэт үйлдвэр” ТӨҮГ-аас

2019 онд 14.6 тэрбум

2020 онд 52.4 тэрбум

2021 онд 23.3 тэрбум

2022 онд 59.7 тэрбум

2023 онд 1.5 тэрбум

2024 онд 92.8 тэрбум төгрөгийн тендер буюу 244 тэрбум төгрөгийн тендер авчээ.

Харин Ц.Анандбазарын “Интерстандарт нефть” ХХК нь “Эрдэнэт үйлдвэр” ТӨҮГ-аас

2019 онд 141 сая

2020 онд 2.9 тэрбум

2021 онд 290 сая

2022 онд 200 сая

2023 онд 2.7 тэрбум төгрөгийн тендер

2024 онд 3.6 тэрбум төгрөгийн тендер буюу 9.8 тэрбум төгрөгийн тендер авчээ.

Нэгтгэж харвал, Ц.Анандбазар анхнаасаа “Эрдэнэт үйлдвэр”-ийн шатахууны тендерүүдэд монопол тогтоох зорилгоор Д.Үүрийнтуяаг 2017 онд “Эрдэнэт үйлдвэр”-т “шургуулж”, улмаар 2019 онд Санхүү, эдийн засаг хариуцсан орлогч захирал болгосноор түүнээр дамжуулан таван жилийн хугацаанд 253 тэрбум төгрөгийн тендер авсан гэх дүр зураг гарч ирж байгаа юм. Ганцхан хүний халаасаар орсон гэхэд 253 тэрбум төгрөг хэтэрхий том тоо. Тиймээс ч АТГ-т шалгагдах ёстой тендерийн том хэрэг энэ мөн.

Ц.АНАНДБАЗАР АВЛИГЫН ХЭРГЭЭР ШҮҮХИЙН ХААЛГА ТАТАЖ, АРДЫН НАМААС НЭР ДЭВШИХ БОЛОМЖГҮЙ БОЛСОН ТУЛ ТҮҮНИЙ ТОЙРОГТ Д.ҮҮРИЙНТУЯА НЭР ДЭВШИЖ УИХ-ЫН ГИШҮҮН БОЛОВ

“Сод монгол групп” ХХК-ийн Ерөнхий захирал Ц.Анандбазар 2020 онд Булган аймаг буюу IV тойрогт МАН-аас нэр дэвшиж, УИХ-ын гишүүн болсон. Гэвч УИХ-ын гишүүн болоод удалгүй Хөгжлийн банкны хэрэг, хүчингийн хэрэг, нэмээд нүүрсний хулгайн хэрэгт нэр холбогдсон. Тэгж байтал 2023 оны хавар Засгийн газрын “шувуу” ажиллагаагаар УИХ-ын гишүүн асан Т.Бадамжунайг Филиппинээс баривчлан авчирсан.

Улмаар хууль хяналтынхан Т.Бадамжунайд боть шиг зузаан хавтаст хэрэг үүсгэн шалгаж эхлэх үед түүний гэмт хэргүүдийн гол хамтрагч нь Ц.Анандбазар болох нь илэрсэн. Жишээ нь, Ц.Анандбазар Богдхан уулын Бага тэнгэрийн аманд барьсан хаус хотхоноо цахилгаан, дулаанд холбохын тулд “Улаанбаатар дулааны сүлжээ” ТӨХК-ийн захирал Д.Бямба-Очир, “Улаанбаатар цахилгаан түгээх сүлжээ” ТӨХК-ийн захирал Д.Баярсайхан нарт Т.Бадамжунайгаар нөлөөлүүлж, хариуд нь Т.Бадамжунайд Бага тэнгэрийн амны хотхоноосоо хоёр хаус авлигад өгсөн нь илэрч, хамтдаа яллагдагчаар татагдаж, 2023 оны арваннэгдүгээр сараас шүүгдэж эхэлсэн байдаг. Ийнхүү Ц.Анандбазар авлигын хэргээр шүүхийн хаалга татсан учраас өнгөрөгч УИХ-ын сонгуульд нэр дэвших боломжгүй болсон. Гэхдээ Ц.Анандбазарын тойрог буюу Булган, Орхон, Хөвсгөл аймгийн IV тойрогт таамагт огт байгаагүй Д.Үүрийнтуяа нэр дэвшиж, УИХ-ын гишүүн болсон. Өөрөөр бол, авлигын хэрэгт холбогдож, ахиж УИХ-ын гишүүн болох боломжгүй болсон Ц.Анандбазар өөрийгөө Д.Үүрийнтуяагаар залгамжлуулсан гэж харагддаг. Товчхондоо, УИХ-ын гишүүн Д.Үүрийнтуяа ардаа “Сод монгол групп” ХХК хэмээх асар том ашиг сонирхолтой, анхааралтай ажиглаж байх ёстой түшээдийн нэг гэж хэлж болно.

Д.ҮҮРИЙНТУЯАГИЙН Ц.АНАНДБАЗАРТ “ӨГСӨН” 253 ТЭРБУМ ТӨГРӨГИЙН ТЕНДЕРИЙН ХАРИУ НЬ ТӨРИЙН ТҮШЭЭГИЙН ӨВ ЗАЛГАМЖЛАЛ БАЙВ УУ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 1

Сэтгэгдэл үлдээсэн: 2025-08-15 07:50:33

Зочин: Үүрийн туяа манай Эрдэнэтэд ёстой орох оронгүй ойчих аяггүй гахай явган нохой нүцгэн ирж байсан даа