МАН-ын Нүүрсний хулгай, Хөгжлийн банкны муу нэртнүүд улс төрөөс “арчигдаж”, өнгөрсөн сонгуулиар туг тахиулсан гэгдэж байгаа ч тэдний улс төрийн залгамжлагчид, эрх ашгийг нь хамгаалж төрд төвхнөсөн. Тэдний нэг нь УИХ-ын гишүүд Н.Батсүмбэрэл.

       Уугуул нутаг Баянхонгорын Баацагаан ч, суугуул нутаг нь Чингэлтэй дүүрэг.  УИХ-ын гишүүн асан Т.Аюурсайхан нүүрсний хулгайн хэрэгт холбогдож, “аавын хаалга” татснаар Н.Батсүмбэрэлд улс төрийн том орон зайгаа үлдээсэн. Гэхдээ Т.Аюурсайхан, Н.Батсүмбэрэл хоёр улс төрд хэлхээтэй мэт хамт явж ирсэн түүхтэй.

            Тодруулбал, 2008 онд Т.Аюурсайхан, Н.Батсүмбэрэл хоёр хоёулаа Чингэлтэй дүүргийн ИТХ-ын төлөөлөгч болж байлаа. 2012 онд Т.Аюурсайхан, Н.Батсүмбэрэл хоёр хоёулаа МАН-ын Ерөнхий нарийн бичгийн дарга У.Хүрэлсүхийн зөвлөхөөр ажиллаж байв. Улмаар 2012 оны аравдугаар сард Т.Аюурсайхан Чингэлтэй дүүргийн Засаг даргаар томилогдож, харин орлогчоор нь Н.Батсүмбэрэл томилогдож байлаа. 2013 онд Т.Аюурсайхан, Н.Батсүмбэрэл, Б.Ганхуяг, Н.Удаанжаргал, Т.Сайнжаргал нар “Монгол ардын намын шинэчлэл хөгжлийн хороо”-г байгуулж, Тусгаар тогтнолын ордны гадаа гэр барьж, “Шинэчилье” хөдөлгөөн өрнүүлж байсан.

            Дараа нь, 2016 оны УИХ-ын сонгуулийн өмнөхөн Т.Аюурсайхан, Н.Батсүмбэрэл, Б.Ганхуяг, Н.Удаанжаргал, Т.Сайнжаргал нар дахиад Төрийн ордны баруун талд улаан алаг майхан барьж, “Монголоо аваръя” хөдөлгөөн өрнүүлж, АН-ын эсрэг акцалж байв. Шагналд нь, 2016 онд Т.Аюурсайхан УИХ-ын гишүүн, Н.Батсүмбэрэл НИТХ-ын төлөөлөгч, харин Б.Ганхуяг “Эрдэнэс тавантолгой” ХК-ийн Тэргүүн дэд захирал, Н.Удаанжаргал “Тавантолгой төмөр зам” ТӨХК-ийн Гүйцэтгэх захирал, Т.Сайнжаргал “Зүүнбаян төмөр зам” ТӨХК-ийн Дэд захирлаар тус тус томилогдоцгоож байв. 

              Улмаар Т.Аюурсайхан 2019 онд Чингэлтэй дүүргийн МАН-ын хорооны дарга болж, 2020 оны УИХ-ын сонгуульд Чингэлтэй дүүргээс хоёр дахь удаагаа УИХ-ын гишүүнээр сонгогдсон. 2020 оны намар Н.Батсүмбэрэлийг Чингэлтэй дүүргийн Засаг даргад зүтгүүлж, хүссэндээ хүрч байв.  

Ингээд Н.Батсүмбэрэл Т.Аюурсайханы орыг залгаж, Чингэлтэй дүүргийн МАН-ын хорооны даргаар ажиллаж байлаа. Бизнесийн тухайд, Чингэлтэй дүүргийн Засаг дарга Н.Батсүмбэрэл гудамжны жагсаалаар гаршиж байх үеэсээ дотносож нөхөрлөсөн Т.Сайнжаргалтайгаа 2016 оноос хойш “Дасаб” ХХК-ийг хамтран эзэмшдэг байв. Гэхдээ “Дасаб” ХХК-ийнх нь гүйцэтгэх захирлаар Бямбажавын Пүрэвцэцэг гэгч ажиллаж ирсэн. Тэгвэл Т.Сайнжаргал нь “Ширхэнцэг хараа” ХХК-ийг эзэмшигч бөгөөд гүйцэтгэх захирал нь Бямбажавын Пүрэвцэцэг. Ноцтой нь, Т.Сайнжаргал нь “Зүүнбаян төмөр зам” ТӨХК-ийн дэд захирлаар ажиллаж байхдаа эрх мэдлээ ашиглан “Ширхэнцэг хараа” ХХК-ийгаа “Тавантолгой-Зүүнбаян” төмөр замын доод бүтцийн угсралтын гүйцэтгэгч болгож, 2.4 тэрбум төгрөг авсан баримт бий. Өөрөөр хэлбэл, Н.Батсүмбэрэл ганц энэ баримтаараа л гэхэд нүүрсний хулгайн хэрэгт холбогдогсодтой шууд халаас нэгтэй болж байна. Гэвч Т.Сайнжаргал, Н.Батсүмбэрэл нар нүүрсний хулгайн хэргээс нэр цэвэр мултарч чадсан. Дээр нь Т.Сайнжаргал нүүрсний хулгайн хэрэг мандсанаас хойш “Ширхэнцэг хараа” ХХК-ийн хувь эзэмшигчээс өөрийн нэрийг хасуулсан байгаа юм.

 Нэг ёсондоо мөр зэрэгцэж улс төрд орсон найзуудаар нь МАН-ынхан сонгуулийн өмнө туг тахиж байхад, ард нь чимээгүй сугарч үлдээд өдгөө гишүүн болчихсон суугаа гэсэн үг. Түүнчлэн Н.Батсүмбэрэл нам дагаж төрд суухдаа төрсөн дүүгээ төрийн албанд шургуулж амжсан. Тодруулбал, түүний дүү Нацагдоржийн Батдорж Баянхонгор аймгийн Татварын хэлтэст татварын улсын байцаагчаар ажиллаж байгаа бол бэр дүү Төгсгэрэлийн Цогзолмаа нь Баянхонгор аймаг дахь политехникийн коллежид ажилладаг аж. Эцэст нь, Н.Батсүмбэрэл холбоотой мэт ижилдсэн журмын нөхдөө нүүрсний хулгайн хэргээр хуулийн байгууллагад дуудагдахад сугарч үлдээд, өдгөө нүүрсний бүлэглэлийг хамгаалж, хар бурууг нь “засаж” суугаа улстөрчдийн нэг гэдгийг тодотгоё.