Хяналт, үнэлгээний Үндэсний хорооны дарга Э.Одбаяр хэзээнээсээ л улааныг харж урваж, шарыг үзэж шарвадгаараа алдартай нэгэн. Фракц болгонд “элсэж”, эцэст нь Ерөнхий сайдын гараас хүртэл атгаснаар АН-аас жагсаалтад багтаж, МАН-ын “БЭТ” болтлоо дэвшсэн. Түүнийг Ардчилсан намынхны хурлын тэмдэглэлийн “амьд” протокол, арван ембүүгээр намаа “худалдаж”, эсрэг намын “ах нар”-т мэдээлэл өгч, амиа зогоодог хэмээн намынхан нь “үздэггүй”. “Муу нэрийг хусавч арилахгүй” гэдгээр түүний намтарт урвалт олон бий. Тодруулбал, Э.Одбаяр С.Эрдэнийн хүү Э.Одбаяртай 10 жилийн ангийн найзууд. Тиймдээ ч Эрдэнийн Одбаяр Эрдэнэбилэгийн Одбаярыг аав С.Эрдэнэтэйгээ танилцуулж, АН-д элсүүлж байсан түүхтэй. Улмаар С.Эрдэнэ 2012-2016 онд Хөдөлмөр, нийгмийн хамгааллын сайд байхдаа Э.Одбаярыг Хүүхдийн төлөө үндэсний газрын Тамгын газрын даргаар томилж, дараа нь АН-ын Хэрэг эрхлэх газрын даргаар дэвшүүлж байв. Гэвч 2020 онд Э.Одбаяр С.Эрдэнийн итгэлийг хөсөр хаяж, Х.Баттулга, Ц.Туваан хоёрт урвасан. Үүнд нь, С.Эрдэнийн хүү Э.Одбаяр гомдохдоо түүнийг “урвагч цүнхчин” гэж сошиалд бичиж, дуулиан тарьж байлаа. Гэлээ ч Э.Одбаярын энэ урвалт мөн л нэг их удаан үргэлжлэлгүй Лу.Гантөмөрийг АН-ын дарга болоход түүнийг дагаж, хувийн зөвлөх, Ажлын албаны даргаар нь ажиллаж, сүүлдээ АН-ын генсекээр томилогдсон. Тухайн үед АН-ынхан Э.Одбаярыг эсэргүүцэж, “МАН-ын дэмжлэгтэй залууг намынхаа генсек болгохгүй” гэж байсан ч эцэст нь Лу.Гантөмөр МАН-ын “шахалт”-аар батламжилсан түүхтэй. Ингээд тэрбээр Лу.Гантөмөрийн гэгдэх нэрийн дор МАН-ынхнаар хүчлүүлж, АН-ын жагсаалтаар УИХ-ын гишүүн болж байлаа. 

Ингээд зогсохгүй “хоёр намын голд тэлээ хурга, тагнуулын “цэрэг” шиг гүйснийхээ хариуд тэрбээр Ерөнхий сайдын дэмжлэгтэйгээр Засгийн газрын сайд болоод буй. Өдгөө жилд 19 тэрбум төгрөг захиран зарцуулах эрхтэй Хяналт, үнэлгээний үндэсний хорооны даргаар ажиллаж байна. Сонирхуулахад, түүнийг сайдын суудалд суусан даруйд салбарын мэргэжилтнүүд нь төсвийн 55 сая төгрөгөөр Вьетнамын Фукуок арал руу ниссэн нь дуулиан тарьж байлаа. Улс төрийн дэмжлэг, урд хождын алдаа мадаг, урвалтын тухайд нь ийм байна.

Тэгвэл Э.Одбаяр УИХ-ын гишүүн асан Н.Ганибалтай “Ардчилал таймс сонин”-ыг, АТҮТ-ийн дарга асан Н.Пунцагтай “Опнн коал транс” ХХК-ийг хамтран эзэмшдэг. Мөн Батмөнхийн Бямбагэрэл, Хасаабаатарын Мөнхмандах нартай уул уурхайн тоног төхөөрөмж, ачаа тээврийн “Би Өү говь майнинг” ХХК-ийг хамтран эзэмшдэг.  Иймдээ ч Э.Одбаяр Төрийн ордны тэрбумтнуудын нэг болоод байгаа. Тодруулбал, тэрбээр нийт орлогоо 2.3 тэрбум гэж АТГ-т мэдүүлжээ. Ингэхдээ жилийн орлогоо 228 сая, 1.8 тэрбумаар үнэлэгдэх хоёр орон сууц, хаус, авто зогсоолтой, 360 сая төгрөгийн үнэлгээтэй хоёр автомашинтай, 40 сая төгрөгийн үнэт эдлэлтэй, 117 сая төгрөгөөр үнэлэгдэх хурдан удмын адуу, малтай гэжээ. Хачирхалтай нь, тэрбээр өмчлөх эрхийн 5000м2, эзэмших эрхийн хоёр газартай гэж мэдүүлсэн ч түүнийгээ 6.5 сая төгрөгөөр үнэлжээ.

Ямартай ч Э.Одбаяр “тэлээ хурга” шиг гүйснийхээ хүчинд хүссэн, зорьсноо аваад л байгаа. Гэхдээ ирэх жилүүдэд тэр хаашаа хувирч, хэний бүлэглэлд багтахыг хүсэхийг хэн ч таашгүй.