Улс төр дэх угсаа залгамжлагчдын буухиаг УИХ-ын гишүүн асан Ц.Шинэбаярын хүү Ш.Бямбасүрэн үргэлжлүүлж байна. Түүний аав Ц.Шинэбаяр асан нь Дорнод аймгийн ИТХ-ын дарга, МАХН-ын дэд даргаар ажиллаж байгаад 2008-2012 онд УИХ-ын гишүүн, “Хамуг Монголын хөдөлмөрийн нам” байгуулж байлаа. Харин Ш.Бямбасүрэн АН-аас улс төрийн гараагаа эхлүүлж, 2012 онд Дорнод аймгийн ИТХ-ын сонгуульд АН-аас нэр дэвшиж, төлөөлөгчөөр сонгогдож байсан түүхтэй.

 Мөн 2024 онд Зүүн бүсэд АН-аас нэр дэвшиж, гишүүнээр сонгогдсон. Түүнчлэн, Ш.Бямбасүрэн аав Ц.Шинэбаярынхаа бүх бизнесийг өвлөж авсан. Тухайлбал, Ц.Шинэбаяр Дорнодыг нүүрсээр хангадаг “Адуун чулуун” ХК-ийн Ерөнхий захирлаар ажиллаж байсан бол одоо Ш.Бямбасүрэн “Адуун чулуун” ХК-ийн хувьцаа эзэмшигч, ТУЗ-ийн гишүүнээр ажиллаж буй. Мөн Ш.Бямбасүрэн “Адуун чулуун”-ы нүүрсний уурхайн олборлолт, тээвэрлэлтийг дангаараа хариуцдаг “Найнги” ХХК-ийн эцсийн өмчлөгч. Алдарт “МАК”-ийн эзэд хүртэл “Адуун чулуу”-ны нүүрсний уурхайд “шунаж” ирсэн гэхээр хэр хэмжээний том уурхай гэдгийг тайлбарлах нь илүүц биз.

 “Найнги” ХХК-ийн эцсийн өмчлөгчөөр Ш.Бямбасүрэнгээс гадна түүний ах Ш.Мягмарсүрэн бүртгэлтэй. Мөн улс төр, бизнесийн салбарт угсаа залгамжилж яваа нэгэн. Ш.Мягмарсүрэн нь Дорнод аймгийн Хэрлэн сумын ИТХ-ын төлөөлөгчөөр 2016 оноос хойш ажилласан.

Ах дүү хоёр төрд төлөөлөгч болж суугаад “Найнги” ХХК-аараа “Адуун чулуун”-ны нүүрсний ордын олборлолт, тээвэрлэлтийг хариуцахаас гадна төрийн тендерээс багагүй тоншоод амжжээ. Тухайлбал, Дорнод аймгийн Орон нутгийн өмчийн газраас 2023 онд зарласан “Хог хаягдал цэвэрлэх болон хуучин хогийн цэгийг дарж булшлах” 300 сая, Дорнод аймгийн Сэргэлэн сумын цэцэрлэгийн түлш халаах 15.3 сая, Дорнод аймгийн Чулуунхороот, Чойбалсан, Булган, Баяндун, Сэргэлэн сумын ерөнхий боловсролын сургуулийн нүүрс нийлүүлэх, Дорнод аймгийн Хөлөнбуйр, Чойбалсан сумын хүүхдийн цэцэрлэгийн нүүрс нийлүүлэх зэрэг 2021-2023 онд 500 гаруй сая төгрөгийн тендерт шалгарсан түүх байна.

Цаашилбал, Ш.Бямбасүрэн “Гранд восток Монголиа” ХХК-ийг эзэмшиж, удирддаг. Тус компани Дорнод аймгийг шатахуунаар хангадаг бөгөөд “Стандарт ойл” нэртэй шатахуун түгээх станцуудыг ажиллуулдаг. Нэг үгээр Ш.Бямбасүрэн Дорнод аймагтаа шатахууны магнат нь гэсэн үг. Мөн Ш.Бямбасүрэнгийн мэдэлд Дорнод аймгийн хамгийн том “Ган хэрлэн” зочид буудал, Зүүн бүсийн худалдааны төв буюу Дорнодын төв зах бий. Шатахууны бизнесээс эхлээд, зах худалдааны төв, томоохон үйлчилгээний газруудыг эзэмшдэг гэдгээрээ Дорнод аймагтаа нөлөөтэй нэгэн. Цаашлаад “Гранд Восток Монголиа” ХХК нь шатахуун, тос тосон материал нийлүүлэх төрийн хоёр ч тендерт шалгарсан түүх байна.

Мөн “Найнги” ХХК-ийн охин компани болох “Найнги хүнс” ХХК-ийн захирлаар Ш.Бямбасүрэнгийн эхнэр Чинбатын Ариунсэлэнгэ ажилладаг аж. Ч.Ариунсэлэнгэ нь мөн JCI олон улсын байгууллагын Дорнод аймагт дахь салбарын Ерөнхийлөгчөөр ажилладаг, эдийн засагч мэрэгжилтэй нэгэн. Улмаар “Найнги” ХХК-ийн дэргэдэх “Найнги сан”-гийн үйл ажиллагааг хариуцдаг байна. Нэг ёсондоо Ш.Бямбасүрэнгийн нийгэм дэх нөлөөллийн ажлыг нь хариуцдаг гол хүн нь түүний эхнэр Ч.Ариунсэлэнгэ аж. Ийн Ш.Бямбасүрэнгийн ээж, эхнэр, ах нь “Адуун чулуун” орд дээр түшиглэсэн бизнесээрээ Дорнод аймагт “эзэн” суусан бол өөрөө аавынхаа улс төрийн замналыг үргэлжүүлж явна.

Ш.Бямбасүрэн сонгуульд “Тамын 50” гэж алдаршсан Дорнод, Хэнтий аймгийн дунд байрлах Өндөрхаан-Чойбалсан чиглэлийн 50 км автозамыг засаж, шинэчилнэ гэж амласан. Гэвч өнөөдөр “Тамын 50”-ыг засах нь битгий хэл ган хийж ганц үг дуугараагүй сууна. Сонирхуулахад, улс төрийн угсаа залгамжлагчдын нэг Ш.Бямбасүрэн Ардчилсан намд шинээр гарч ирж буй “Янзага” фракцыг толгойлж байгаа гэсэн.