Монгол Улсын Ерөнхийлөгч У.Хүрэлсүх Бүгд Найрамдах Киргиз Улсын Сайд нарын танхимын дарга бөгөөд Ерөнхийлөгчийн Тамгын газрын дарга Адылбек Касымалиевийг өнөөдөр хүлээн авч уулзлаа.

Ерөнхийлөгч уулзалтын үеэр Монголын төлөөлөгчдийг элэгсэг дотноор хүлээн авч буй Киргизийн төр, засаг, ард түмэнд талархал илэрхийлээд, хоёр улсын уламжлалт найрсаг харилцааг “Иж бүрэн түншлэл”-ийн түвшинд хүргэсэн нь хоёр орны харилцааны түүхэнд тодоор бичигдэж, хамтын ажиллагааны шинэ үеийг эхлүүлж байгааг онцлов. Тэрбээр мөн Монгол, Киргизийн эрх зүйн үндсийг бэхжүүлж, хамтын ажиллагааг өргөжүүлэх чиглэлээр Засгийн газар болон байгууллага хооронд 10 гаруй баримт бичигт гарын үсэг зурсан нь цаашдын хамтын ажиллагаанд чухал ач холбогдолтойг дурдав. Төрийн тэргүүн харилцан тохирсон ажлуудыг бодит ажил хэрэг болгохын төлөө хоёр улсын Засгийн газар нягт хамтран ажиллана гэдэгт итгэлтэй буйгаа илэрхийлэв. Өөрийн зүгээс Дарга А.Касымалиев сүүлийн жилүүдэд хоёр улсын харилцаа, хамтын ажиллагаа идэвхтэй хөгжиж буйг тэмдэглээд, худалдаа, эдийн засаг, тээвэр, логистик, хөдөө аж ахуй, хөнгөн үйлдвэр, эрүүл мэнд, боловсрол, соёл, байгаль орчин зэрэг салбарт хамтын ажиллагааг улам өргөжүүлэхийн төлөө ажиллана гэдгээ хэлэв. Ташрамд дурьдахад, Киргиз Улсад Засгийн газрын тэргүүн буюу Сайд нарын танхимын дарга, түүний гишүүдийг Парламентын зөвшөөрлөөр Ерөнхийлөгч томилдог бөгөөд Сайд нарын танхимын дарга нь Ерөнхийлөгчийн Тамгын газрын даргын албыг давхар гүйцэтгэдэг. Адылбек Касымалиев 2024 оны арванхоёрдугаар сард уг албанд томилогдсон юм.