МАН-ЫН ДАРГЫН ТӨЛӨӨ Г.ЗАНДАНШАТАР Д.АМАРБАЯСГАЛАНГИЙН ЭМЗЭГ ГАЗРУУДАД ХАТГАЖ ЭХЛЭВ ҮҮ

       Л.Оюун-Эрдэнэ огцорч, ажлаа өгснөөс хойш МАН-ын дараагийн даргын марафон эхэлсэн. Өөрөөр хэлбэл, Г.Занданшатар, Д.Амарбаясгалан хоёрын дунд МАН-ын даргын төлөөх өрсөлдөөн эхэлсэн гэсэн үг. Ерөнхийлөгч тэр хоёрыг хоёуланг нь дэмждэг. Улстөрчийнх нь хувьд төдийгүй найзын, ахын хувиар дэмжсээр ирсэн. Гэвч энэ удаад Ерөнхийлөгч хэнийг нь илүүтэй дэмжих нь одоогоор тодорхойгүй байна. МАН-ын даргын төлөөх өрсөлдөөн эрчимжиж эхэлснийг гэрчлэх нэг үйл явдал нь Ерөнхий сайд Г.Занданшатар өнгөрсөн долоо хоногт “Эрдэнэс Тавантолгой” ХК-д ажилласан явдал байлаа. Тэрбээр тэнд ажиллах үедээ “Эрдэнэс Тавантолгой” бол ард түмний уурхай болохоос авлигалын уурхай биш. Бүр цавчаа, шахааны уурхай байж болохгүй. Ийм шаардлага тавьж, дэг журмыг чангатгах, зардлыг 50 хувиар бууруулах үүрэг даалгавар өглөө” хэмээн мэдэгдэж байв. Өөрөөр хэлбэл, “Энэ сайхан газраас хулгай хийж болохгүй шүү хулгайчдаа. “Эрдэнэс Тавантолгой” ХК-иас “иддэг” хүмүүсийн нэрсийг зарлана шүү” хэмээн тэнд гар, хошуугаа дүрээд байдаг улстөрчдийг айлгаж, давхар сануулга өгөөд амжлаа. Бас сонгуулийн санхүүжилтийг “Эрдэнэс Тавантолгой” ХК-иас  "босгосон" гэх асуудал хүртлээ даамжирч мэдэхээр нөхцөл байдалтай байгаа гэх. Учир нь, УИХ-ын дарга Д.Амарбаясгалан Өмнөговь дахь Бортээгийн уурхайд нэр холбогддог. Нүүрс баяжуулалтын 100 хувь, нүүрс борлуулалтын 60 хувийг хариуцдага “Админерал” ХХК-ийг Д.Амарбаясгалан мэддэг гэх мэдээлэл нүүрсний сонсголын үеэр гарч байв. Бортээгийн уурхайн гэрээт олборлогч "Админерал" ХХК-ийн асуудалтай холбоотойгоор долоон гэрч дуудсаны нэг нь Д.Амарбаясгалан байсан боловч тэрбээр сонсголд оролцоогүй. Бортээгийн уурхайн асуудалд тэр маш эмзэг ханддаг. Тийм ч учраас Ерөнхий сайд Г.Занданшатар МАН-ын даргын төлөө түүний эмзэг газруудад нь хатгаж эхэлсэн байж мэдэх.

Д.АМАРБАЯСГАЛАН НАМЫНХНААСАА ОНОО ЦУГЛУУЛЖ ЧАДАХ УУ

       Харин Д.Амарбаясгалан нам дотроо нэр сайтай. Засгийн газрын Хэрэг эрхлэх газрын дарга байж байгаад УИХ-ын дарга болсон болохоор намынхантайгаа бүгдтэй нь харилцаа сайтай. Тийм учраас МАН-ын даргын төлөөх өрсөлдөөний үеэр намынхнаасаа оноо авах нь илүү ч байж мэднэ. Тэр МАН-ын даргын төлөө өрсөлдөх зураглалаа гаргачихсан хэзээ яаж эхлүүлэхээ төлөвлөж суугаа гэх. Ямартай ч МАН-ын дараагийн даргын марафон есдүгээр сар хүртэл энэ мэтчилэн үргэлжилж, улс төрийг сонирхолтой болгож мэдэхээр болчихлоо. Өмнөх түүхээс харвал, М.Энхболд УИХ-ын дарга байхдаа МАН-ын дарга болж байсан. Түүнээс биш ихэвчлэн Ерөнхий сайдууд МАН-ын дарга болдог байв. Харин энэ удаагийн өрсөлдөөн хэрхэн өрнөж, хэн нь ялахыг ард түмэн чих тавин хүлээж байна. Хамгийн гол нь Д.Амарбаясгалангийн нүүдэл юу байх бол.

Х.НЯМБААТАР ХОТЫН ДАРГААР ҮЛДЭХ ГЭЖ ХИЧЭЭВ ҮҮ

         МАН-ын дарга сонгогдсны дараа Хотын дарга Х.Нямбаатарыг солих асуудал яригдана. Х.Нямбаатар ч арваннэгдүгээр сар хүртэл “Би тийм ажил хийсэн, энийг сайжруулсан” гээд баахан ажлын тайлан тавьж эхлэх бололтой. Саяхан гэхэд “Намайг Хотын даргын ажлыг авахад давсаа хүрзээр цацдаг байсан. Харин одоо нийтийн аж ахуйн тоног төхөөрөмжийг шинэчилж, нөхцөл байдал өөр болсон” гэх тайлбар өгсөн байна лээ. Бас л түүний хувьд Хотын даргаар үлдэх өрсөлдөөн эхэлчихлээ. Л.Оюун-Эрдэнийг огцруулахыг шаардсан жагсаалын үеэр Х.Нямбаатарыг огруулах жагсаал давхар өрнөж, хэсэг хүмүүс “Х.Нямбаатар огцор” гэж цагаан хоолойгоор хашхирсан. Одоогийн байдлаар нийслэлчүүдийн уурыг хамгийн их хүргэсэн хүн нь Х.Нямбаатар болчихоод байгаа. Бүх зүйлийг болохгүй, бүтэхгүй, хориглоно, хаана гэж тэмцэж байсан бол одоо түүний арга, зураглал өөрчлөгдсөн ч нэмэртэй юү гэдэг нь сонин. Наадмын маргааш намар гэдэг шиг улстөрчид намрын улс төрийн ажилд хэдийнэ оржээ.