Эдийн засгийн форумын үеэр Ерөнхий сайд Г.Занданшатар CNN телевизийн сэтгүүлчтэй англиар ярилцсан нь сошиалын сэдэв боллоо, өнөөдөр. Хамгийн чухал нь Ерөнхий сайд юуг онцолсон бэ гэдэг нь анхаарал татаж байна. Цаашлаад Монгол Улсын ирээдүйн төлөвлөгөө, хэтийн зорилго, дэлхий даяар геополитикийн нөхцөл байдлаас шалтгаалж эдийн засаг тогтворгүй байгаа энэ цаг үед  Монгол Улс ямар бодлого баримталж байгаа вэ гэдэг дээр чих тавин чагнаж байна. Ямартай ч Ерөнхий сайд CNN телевизийн сэтгүүлчид өгсөн ярилцлагадаа форумын гол санааг тодорхой ярьж, гадныханд дөрвөн санааг маш тодорхой өгчихлөө.

       Нэгдүгээрт, Монгол Улс хөрөнгө оруулагчидтай урт хугацааны түншлэлээ бэхжүүлэхийг зорьж байгаа юм байна. Гаднын хөрөнгө оруулагчдыг айлгаж, ичээдэг байдлыг таслан зогсоох тал дээр байр суурь тодорхой байгаа юм байна, Ерөнхий сайдын хэлснээр. Өөрөөр хэлбэл, энэ гаднын хөрөнгө оруулагчдыг татахад нэн чухал мэдээлэл. Цаашлаад гаднын хөрөнгө оруулагчид их орж ирэх нь эдийн засагт хичнээн чухал болохыг эргэлт болохыг дахин тодотгох нь зүйтэйй биз. Энэ талаараа Ерөнхий сайд “Дэлхийн эдийн засгийн  томоохон өөрчлөлтийн энэ үед  хөрөнгө оруулагчдын итгэлийг хүлээх нь улс орнуудын хувьд чухал асуудал хэвээр байна. Энэхүү өөрчлөгдөж буй  эдийн засаг,  хөрөнгө оруулалтын орчин нь хөгжиж буй орнуудад сорилт болоод боломжийг авчирч байна. Монгол Улсын хувьд өөрийн давуу талыг итгэл даахуйц, ирээдүй рүү чиглэсэн хөрөнгө оруулалтын орчинтой улс гэсэн байр сууриа тодорхой илэрхийлэх нь чухал. Шинэ хөрөнгө оруулалт татах, шаардлагатай нөхцөлд хөрөнгө оруулагчдын итгэлийг сэргээх, одоогийн хөрөнгө оруулагчдын оролцоог хадгалах нь үүний салшгүй нэг хэсэг юм. Одоо хэрэгжүүлж буй арга хэмжээнүүд бодлогын урьдчилан таамаглах боломжийг сайжруулах, институцийн чадавхыг бэхжүүлэх, тууштай, ил тод хэрэгжилтээр хөрөнгө оруулагчдын итгэлийг нэмэгдүүлэхэд чиглэж байна. Эдгээр зорилтуудыг Засгийн Газрын бүх шатны байгууллагын харилцан уялдаанд тулгуурласан, оролцогч талуудтай тогтвортой харилцааг хангах нэг цонхны бодлого-ын хүрээнд хэрэгжүүлж  байгаа билээ” хэмээн онцолж байлаа.

       Хоёрдугаарт, хүн төвтэй төрийг бий болгоно гэдгээ мэдэгдлээ. Иргэдээ сонсдог  төр энэ цаг үед хичнээн үгүйлэгдэж байгаа вэ гэдгийг ийн онцолсон. Улмаар            Ерөнхий сайд Монголын Моденизац бол “Energetic Mongolia” юм гээд шинэ үзэл санаа хэллээ. “Energetic Mongolia” гэдэг нь Монгол хүний оюун ухаан, өвөг дээдсээс уламжлалтай агуу чанарыг ахин сэргээх гэсэн утгатай юм байна. People Public Talk буюу иргэдээ байнга сонсож, бодлоготоо иргэдийнхээ саналыг тусгаж, аливаа шийдвэр гаргахаасаа өмнө хувийн хэвшлийнхэндээ танилцуулж санал авч ажилланаа гэнэ. Гэнэт огцом шийдвэрүүд гараад байхгүй бололтой.

        Гуравдугаарт, Эдийн засгаа төрөлжүүлэх нь маш чухал байна. Хэдийгээр Монголын эдийн засгийн тэргүүлэх бүтээгдэхүүн уул уурхай, газрын ховор элемент байх боловч хөдөө аж ахуй, сэргээгдэх эрчим хүч манай засгийн газрын дараагийн том зорилтууд байх болно гэдгийг онцолсон. Хамгийн гол нь манайд сэргээгдэх эрчим хүчний хэчнээн их нөөц байгааг тэр олж харснаа хэлсэн нь чухал байлаа.

        Дөрөвдүгээрт, Монгол Улс цахим үндэстэн гэх зорилтдоо хүрч, чадварлаг, мэдлэгтэй залуу боловсон хүчнүүдээ дэмжиж амжиллахаа илэрхийлсэн байна.

      Ерөөс Ерөнхий сайдын гадныханд өгсөн гол мессеж товчхондоо ийм ч том агуулгаараа хэчнээн чухал санаа болохыг энд тодотгоё.