Үндэсний баяр наадмыг зохион байгуулах комиссоос өнөөдөр мэдээлэл хийлээ. Энэ үеэр хурдан морины уралдааныг зохион байгуулахдаа морины сэрвээний өндрийг хэмжихдээ хэмжигчийг гараар бус инерциэр хэмжихээр болсон талаар мэдээллээ.

Энэ талаар Хурдан морины салбар хорооны дарга, бригадын генерал Д.Ганхуяг "Морины уралдааны хуваарь хуучин хэвээрээ. Долдугаар сарын 10-нд шүдлэн, хязаалан, 11-нд азарга, их нас, 12-нд соёолон даага, 13-нд эрлийз болон жороо морины уралдаан болно. Энэ жилийн тухай гэрлийн хурдаар хэмжигч төхөөрөмжийг нэвтрүүлэхээр удаан ажилласан ч зөрүү өндөр гараад байгаа учраас хуучнаараа явна. Ингэхдээ морины сэрвээний өндрийг хэмжихдээ хэмжигчийг гараар дарж бус тавьж, инерциэр нь хэмжинэ. Тэгэхээр чанга дарж байна, сул дарж байна гэх маргаан гарахгүй. Цагдаагийн тусгайгаар хамгаалуулж, палкаар хэмжиж байсныг өөрчилж, жил бүр шинэчилж шударгаар хэмжиж ирсэн" гэлээ.