Засаг дамжиж, улирч суудаг сайд нарын гараас гардаг ажил гэж үнэндээ алга аа. Тэр дундаа эрчим хүчний салбарыг “Аргална даа” гэж анх гарч ирсэн Б.Чойжилсүрэн “2027 он гэхэд эрчим хүчний салбар учраа олно” гээд улаан цагаандаа гарчихаад сууж байна. Түүнийг учраа олж, аргалсаар байтал дулааны станцууд нь эхнээсээ дэлбэрч, эрдэнэт хүний амь эрсдчихээд байхад хүртэл нүдэн балай чихэн дүлий юу ч болоогүй шиг аашлаад удлаа. Тодруулбал, өнгөрсөн сард  “ДЦС-3” ТӨХК-д осол гарч, дөч гаруйхан настай инженер амиа алдсан. Нэмээд, ослын улмаас “ДЦС-3” ТӨХК-ийн турбин генератор эргэн засагдахгүйгээр эвдэрч, тэг зогссон тул ирэх өвөл нийслэлчүүд дулаан, цахилгаангүй тэс хөлдөх аюулд орчихсон бодит үнэнтэй нүүр тулаад байна.

     Эрчим хчүний салбар элгээрээ хэвтсэн гээд өнгөрсөн жилээс дулаан цахилгааны үнийг нэмж, иргэдийн бүсийг татвар, татаасын хажуугаар тултал чангалсан атал Эрчим хүчний салбарт ахиц гаргах ажил нэгийг ч хийсэнгүй, үнэндээ.

       Гэтэл салбар хариуцсан сайд нь одоог болтол хүний амь эрсдсэн асуудалд уучлалт гуйгаагүйгээр барахгүй эрчим хүчний салбарыг элгээр нь хэвтүүлэх хуудуутай хуулийн төсөл өргөн мэдүүлж, газар дээрээ баригдлаа. Энэ талаар УИХ-ын гишүүн С.Цэнгүүн “Эрчим хүчний тухай хуульд өөрчлөлт оруулах хууль Эдийн засгийн байнгын хороогоор орж ирлээ. Маш хурдан оруулж ирсэн энэ хуульд эрчим хүчний холбогдолтой бүх салбарынхан саналаа өгч чадалгүй оруулж ирсэн. Хоёрдугаарт, хуулийн төсөлд Эрчим хүчний төсөл гэдэг шинэ нэршил гаргаж ирсэн. Ингэхдээ нэгдсэн сүлжээнд холбогдон ажиллах сэргээгдэх эрчим хүчний эх үүсвэрээс бусад эрчим хүчний шинэ зураг төсөл боловсруулах, эрчим хүчний барилга байгууламж барих, цогц үйлчилгээ үйл ажиллагаа бүхий төслийг хэлнэ гэсэн байна. Өөрөөр хэлбэл, энэ хуулиар сэргээгдэх эрчим хүчний асуудлыг орхигдуулж байна. Мөн Төр, хувийн хэвшлийн түншлэлийн тухай хуульд өөрчлөлт оруулж байгаа.  Гэтэл баяр наадмын үеэр ийм том асуудлыг олон нийтэд хэлэлцүүлэхгүйгээр батлах гэж оролдож байгаа нь сэжиг бүхий байна. Б.Чойжилсүрэн сайд ТЭЦ-3-т гарсан ослыг тендер зарлахгүй яаралтай шийдэх ёстой гэж хэлэх байх. УИХ-ын тогтоолоор ТЭЦ-3-ын асуудлыг дангаар нь оруулаад ирж болно. УИХ-ын гишүүд энэ хуулийн нэмэлт, өөрчлөлтийг анхааралтай хараарай. Бид нэг асуудлыг шийдэх гэж бусад хууль тогтоомжоо уландаа гишгэж болохгүй.

       Ингэхдээ эрчим хүчний төслийн түншлэлийн гэрээ гэдэг ойлголтыг оруулж ирсэн. Нэг ёсондоо Төр хувийн хэвшлийн түншлэлийн тухай хуулиар гадуур шинээр эрчим хүчний төслийг тухайлчилж авч үзэж байна. Гэтэл энэ хуулийн үндсэн агуулга зөрчигдөх эрсдэлтэй болж байгаа юм. Хуулийн нэмэлт өөрчлөлтөөр Эрчим хүчний зохицуулах хороон дээр олгогдож байгаа тусгай зөвшөөрлийг яам өөр дээрээ татаж авдаг болно. Таван хүний бүрдэлдэхүүнтэй салбарын сайд ахалсан ажлын хэсэг байгуулахаар тусгасан байна. Эрчим хүчний салбарт тусгай зөвшөөрөлтэй холбоотой асуудал гацдаг нь үнэн. Энэ асуудлыг би чуулган дээр тавьж байхад “Манай салбарт тусгай зөвшөөрлийг гацаасан асуудал байхгүй гэж хэлээд удалгүй сарын дараа ийм хууль өргөн барилаа. Чуулганы танхим дотроос сайд худлаа яриад суудаг байж болохгүй. Энэ бол хуулийн хулгай” хэмээн мэдэгдсэн.

        Ийн Б.Чойжилсүрэн сайд гурван Засгийн газарт улирч суусаар эрчим хүчний салбарт товойж, торойх ажил хийгээгүй хэрнээ хуулийн хулгай хийх гэж байгаад баригдлаа.  Цаашлаад Б.Чойжилсүрэн сайд хуудуутай хуулийн төсөл шургуулж, халааслахаа халааслаж, хийх ажлаа салхитай хамждаг болоод удаж байна. Улаанбаатар хотын утааны асуудлд “Салхи ажлаа хийхгүй байна” гэж хэлэх хүртлээ салбараа доромжилдог сайд хэдэн Засгийн газар дамжиж суух хүртлээ эрх баригч намынханд хэрэгтэй нэгэн байж. Угтаа бол Л.Оюун-Эрдэнийн Засгийн газар унахад тэсэж үлдсэн цөөн хэдэн сайд нарынх нь нэг. Гэтэл Засгийн газар унахаас өмнө “Тогтой байх уу, тоггүй байх уу гэдгийг дараагийн сайд шийднэ” хэмээн “Буцах бэрд үнээ тугал нийлэх хамаагүй” гэгчээр салбараа гадуурхаж байсан ч салбартаа сайдаар улирах хүртлээ цагаандаа гарчихсан байх. Гэтэл Б.Чойжилсүрэн сайд эрчим хүчний салбарт хамгийн ашиг сонирхол ихтэй нэгэн. Угтаа бол Улаанбаатар хотыг бетонин ширэнгэ болгосон тэрбээр Эрчим хүчний салбарт нутгийн дүү нараа дарга болгон томилж тендер завшсан баримтыг ч бид цувралаар хүргэж байлаа.

      Өөрөөр хэлбэл, Эрчим хүчний сайд Б.Чойжилсүрэн нутгийн дүү М.Мөнхөө гэгчийг 2022 онд “Амгалан Дулааны Станц”-ын захиралаар томилж, “Амгалан дулааны станц” ТӨХК-ийн гүйцэтгэх захирал болмогцоо буюу ердөө 12-хон хоногийн дараагаас төрсөн эгчийнхээ хүүхэд Б.Чинбатынхаа “Конвишн” ХХК, “Алсын өгөөж” ХХК-уудыг “Амгалан дулааны станц” ТӨХК-ийн тендерүүдэд шалгаруулах, шууд гэрээ байгуулэх зэргээр хулгайлах, хумслах ажиллагаагаа эхэлсэн бүрэн баримтыг бид өмнө нь мэдээлж байлаа.

 Ийн эрчим хүчний салбарыг элгээр нь хэвтүүлж, ашиг сонирхлын үүр уурхай болгосон Б.Чойжилсүрэнд хариуцлага тооцож, эрчим хүчний салбарыг аваръя, Ерөнхий сайдаа.