Наадам дөхсөн чинь Ж.Бунтар найруулагчийн алдарт гурван магнай бүтээл бодогдоод, өчигдөр “Цэц магнай”-г дахин нэг үзэв ээ. МУГЖ Б.Базаррагчаагийн цэл залуу насны их сайхан дүр энэ бүтээлд мөнхлөгдсөн. “Бид мартахгүй” киноны Аюуш, “Ирж яваа цаг”-ийн Готов гээд ерөөс эл уран бүтээлчийн дүр бүхэнд нь хүмүүс хайртай. Ингээд харахаар дөлгөөхөн, тогтуухан, сэтгэл татам дүрүүд түүнийх байх юм. Өөрөө ч цог золбоо дүүрэн, жавхаалаг уран бүтээлч. Анх залуухан офицер түүнийг Урлагийн гавьяат зүтгэлтэн Х.Дамдин найруулагч “Бид мартахгүй” киноны Аюушын дүрд сонгон тоглуулснаар нуруулаг атлаа нүдэнд дулаахан энэ уран бүтээлчийг урлагийн замд хөтөлсөн байдаг. Монгол кино үйлдвэрт ирэхээс урьд тэр хотод арван жилээ төгсөөд, Иргэний хамгаалалтын газарт офицер хийж байсан гэдэг.

Ерөөс тэр Х.Дамдин найруулагчийн кинонд цөөнгүй дүрүүдийг бүтээсэн байх бөгөөд алтан үеийн нэртэй найруулагчдын бүтээлд дүр бүтээх хувь тохиолдоо баярлаж байдгаа ч ярьсан байдаг. Ингээд түүний тоглосон дүрүүдийн талаар уншигч тантай хуваалцъя.

        Эгэл даруу, эелдэг зөөлөн, зоригт дайчин Төмөрсүх мэргэн бол үзэгчдийн хайртай дүр. Тэр ямар ч саад тотгор, даваа сорилтыг даван туулж чаддаг хайр сэтгэлдээ үнэнч нэгэн. Киноны хамгийн сэтгэлд тодхон хэсэг нь хүүхдүүдэд нум сум харвахыг зааж өгч буй хэсэг. Харин хамгийн анхны дүр болох Аюуш баатарын дүр нь бол ёстой л нөгөө эл киноны дууны үгэнд гардаг шиг хайр гэрэлтсэн нүдтэй тийм нэг дулаахан сайхан дүр. Тэрбээр энэ дүрд хэрхэн тоглосон тухай "Аюушийн дүрд жүжигчдийг шалгаж, тохирох хүн олдохгүй аймаг, сумаас ч хайж л дээ. Манай хамаатны ах кино уран бүтээлчдийн жолоочоор ажиллаж байсан юм. Нэг удаа тэднийд очиход “Бид мартахгүй” киноны зохиол байх юм. Би гүйлгэж хараад “Кино зохиол гэдэг чинь ийм амархан юм байдаг юм уу” гэтэл ах “Нээрэн гол дүрд тоглуулах хүнээ хайж байна лээ. Чамайг хэлээд өгөх үү” хэмээсэн. Ингээд туслах найруулагчаар ажиллаж байсан Лхагвамаад хэлж, би дараа дараачийн шалгаруулалттай нь нүүр тулсан. Х.Дамдин найруулагч миний хувьд ач, гавьяатай хүн. Намайг ард түмэнд таниулсан үндсэн гурван кино буюу “Бид мартахгүй”, “Мандах нарны туяа”, “Сүүн цагаан өргөө” бүгд түүний найруулсан бүтээл" гэж ярьсан байдаг.

Б.Базаррагчаа жүжигчний өөр нэг сайхан дүр бол "Ирж яваа цаг" киноны Готов. Аав нь хэдий хайр сэтгэл, амьдралд нь оролцдог ч эцэстээ чин үнэнч хайр сэтгэлээ сонгож чаддаг залуугийн дүр.