ШАЛГАЛТЫН МАТЕРИАЛЫГ ГУРАВ УНШУУЛАХАД ТУС БҮР ӨӨР ДҮН ГАРСАН УУ

     Энэ жилийн элсэлтийн ерөнхий шалгалтаас болж олон хүүхэд уйлж, сэтгэл санаагаар унаж, ирээдүйд итгэх итгэлгүй боллоо гэх эцэг, эхчүүдийн гомдол их байна. Элсэлтийн ерөнхий шалгалтын материалууд өмнөх жилүүдийнхээс яагаад хүнд ирсэн талаарБоловсролын сайд болон холбогдох албаны хүмүүсийг тайлбар өгөхийг шаардсан. Тухайлбал, элсэлтийн ерөнхий шалгалтын даалгаварт дараах асуултууд иржээ.

Англи хэл: Унтаагаараа хооллолдог эмгэг өвчний талаар бич?

Математик: Хувь тэнцүүлсэн тэтгэврийг яаж бодох вэ?

Монгол хэл: Казах, буриадаар өмдийг юу гэдэг вэ? гэх мэтчилэн мэргэжлийн хүмүүс ч төдийлөн бодож чадахгүй бодлогууд ирсэн гэх. Мөн солонгос, япон уран бүтээлчдийн талаарх эх, тест орж ирсэн гээд энэ жилийн элсэлтийн ерөнхий шалгалт тэр чигтээ асуудал дагуулаад байгаа. Мөн A,B,D,C гэсэн варианттай боловч А, В хувилбарынх нь даалгаврууд амархан байсан төдийгүй шалгалтын материалыг гурав уншуулахад гурван өөр дүн гарсан гэх асуудал ч мөн гарсан.  Шалгалтын материал задарснаас болж, агуулгыг дахин боловсруулсан эсэх талаар БҮТ-ийн захирал Г.Гантуяагаас тодрууллаа. Тэрбээр “Элсэлтийн ерөнхий шалгалтын материал задарна гэж байхгүй. Манайд тийм асуудал гараагүй. Шалгалтын материалуудыг БҮТ-ийн албан ёсны хуудаст өнөөдөр тавина” гэсэн юм. Мөн тэрбээр өөрийн цахим хуудастаа “Төрийн алба, хувийн хэвшил хоёрын хооронд тийм том ялгаа байхгүй. Байгууллагын засаглал болон соёл, төслийн менежмент, мэдээллийн технологийн 25 жилийн туршлагаа төрийн байгуулагад шингээх гэж орсон. Шаардлагатай бол ажлаа өгөхөд бэлэн шүү. Хувийн хэвшлийнхэн шууд төрд ажиллах бүрэн чадамжтай. Төрийн албанд ажиллахад заавал төрд ажилласан жил шаардах шаардлагагүй гэдгийг өөрөө ажиллаж үзлээ” гэжээ. 

П.НАРАНБАЯР: ЭНЭ ЖИЛ ӨНГӨРСӨН ЖИЛҮҮДИЙНХЭЭС ХҮНДЭВТЭР БОДЛОГО СОНГОСОН БАЙЖ БОЛОХООР БАЙНА 

    Харин Боловсролын сайд П.Наранбаяр өчигдөр цахим хуудсаараа мэдээлэл өгөхдөө “Боловсролын үнэлгээний төвийн мэргэжилтнүүдтэй уулзаж албан ёсны тайлбар, мэдээлэл авсан. БҮТ Элсэлтийн ерөнхий шалгалтын 1000 бодлогоос материал боловсруулахдаа өнгөрсөн жилүүдийнхээс хүндэвтэр бодлого сонгосон байж болохоор байна. Гэхдээ энэ жилийн математикийн элсэлтийн шалгалт өгсөн сурагчдын 52 хувь нь 490 онооны босго давсан байна. Мөн 800 оноо авсан сурагчдын тоо 38 болж өнгөрсөн жилийнхээс долоогоор нэмэгдсэн байна” гэв.  

      Шалгалтын даалгавар хүнд, өмнө нь бодож үзээгүй бодлогууд байсан гэх гомдлоос гадна, харандаа, баллуурын шаардлага мөн хангаагүй байна. Харандаа нь хоёр тест будаад дахиад үзүүрлэх шаардлагатай болчихдог. Үзүүр нь үүрч унадаг. Гэвч хоёр хүүхдийн дунд нэг харандаа үзүүрлэгч өгсөн. Илүү гаргаж будсанаа баллуурдахад арилаагүй гээд олон асуудал дагуулсан элсэлтийн шалгалт дууслаа. Энэ бүхэнд тайлбар өгөхөөр БҮТ-өөс өнөөдөр мэдээлэл хийх аж. Бүх асуудал болоод дууссаны дараа өөрсдийгөө өмөөрсөн тайлбар, мэдээлэл хийхээр бэлдэж байна хэмээн эцэг, эхчүүд бухимдалтай байна. Элсэлтийн шалгалт өгсөн сурагч, эцэг, эхчүүдээс гадна багш нар хүртэл гайхаж байна.