УИХ-ын чуулганы хуралдаан үргэлжилж байна. Энэ үеэр УИХ-ын гишүүн Б.Пүрэвдорж "Тэтгэврийн зээлийн асуудлаар над руу олон хүн мессеж бичиж байна. Намайг Хархорин хотын бүтээн байгуулалтын нээлтийн арга хэмжээнд оролцож байхад Хаан банкны захирал болон Монголбанкны Ерөнхийлөгч Б.Лхагвасүрэн нартай уулзаж, асуудлыг тодруулсан. Тэд надад хуучин журмаараа олгож байгаа гэдэг хариулт өгсөн. Гэвч ахмадууд банк дээр очихоор орлого зарлагын харьцаа 50:50 хэвээрээ, хугацаа богино, шинээр зээл авахад шимтгэл авах нь хэвээрээ байна. Тиймээс ирэх даваа гаригт Хаан банкны болон Монголбанкны Ерөнхийлөгч, Төрийн банкны захирлуудтай энэ асуудлыг хэрхэн шийдвэрлэсэн гэдгээ хэвлэлийн хурал хийж мэдээлмээр байна. УИХ-ын дарга Д.Амарбаясгалантай сайн ярилцаж, энэ талаар чиглэл өгнө гэсэн. Ахмадын тэтгэврийн зээл тэглэсэн. Тухайн үед нийт 700 тэрбум төгрөгийн зээл байсан юм байна. Гэвч өнөөдрийг хүртэл тэр зээл Монголбанк дээр өр хэвээрээ, "Эрдэнэ силвер" компаниас нэг ч сохор зоос төлөөгүй юм байна. Гэтэл үүнээс хойш маш олон хүн өндөр зээлтэй байж байгаад тэглүүлсэн гээд маш их өндөр зээл авч эхэлсэн. Одоо 2.1 их наяд төгрөгийн зээл болчихсон байна. Бараг гурав дахин нэмэгдэж, асар өндөр хүү төлж байна. Тэтгэврийн зээл тэглэх итгэл найдвараар өндөр зээл авч, тэр мөнгөө хамаагүй зарцуулдаг болоод байна. Би сайд нараас энэ талаар асуухаар "Тэр зээлийг тэглэхгүй" гэсэн. Энэ нөхцөл байдлаа хэлэх хэрэгтэй" гэлээ.