МАН-ын бага хурлаас гарсан шийдвэрийг МАН-ын Ерөнхий нарийн бичгийн дарга Я.Содбаатар танилцууллаа. Тэрбээр “МАН-ын VII бага хурал өндөрлөлөө. Ерөнхий сайдад нэр дэвших дөрвөн хүн яригдсан. МАН-ын Удирдах зөвлөлийн хурлаар ЕТГ-ын дарга Г.Занданшатарын нэр дэвшүүлсэн бол заалнаас гурван хүний нэр дэвшүүлсэн. Үүнээс хоёр нь нэрээ татаж, УИХ-ын гишүүн Г.Тэмүүлэн, Г.Занданшатар нэр дэвшигч дээр санал хураалт явуулсан.  

Шинэ Ерөнхий сайдад нэр дэвшигчдээс цаашид анхаарах бодлогын асуудлаар, өнөөгийн нийгэм эдийн засагт үүсээд буй асуудлаар 50  гаруй хүн асуулт асуусан. Бага хуралд 400 гаруй төлөөлөгч оролцож, Г.Занданшатарыг 67.84 хувь нь дэмжлээ. Маргааш хуулийн дагуу УИХ-ын чуулганд танилцуулна. Харин хамтарсан Засгийн газрын асуудлаар МАН-ын VI бага хурлаар хамтарсан Засгийн газрын асуудлыг ярьсан. Цаашид шинэ Ерөнхий сайд танхимын бүтэц бүрэлдэхүүнээ танилцуулах байх. Хоёр нэр дэвшигч хамтарсан Засгийн газрын асуудлаар байр сууриа илэрхийлсэн. Манай намын дүрэмд  намын дарга болох жишээ байдаг. МАН-ын дүрмийн дагуу үйл явц өрнөнө” гэлээ.