Хөдөлмөрийн баатар, Гавьяат тамирчин, Дархан аварга Ж.Мөнхбатын алдрыг мөнхлөх хөшөөний нээлтийн үеэр түүний хүү Хакүхо М.Даваажаргал үг хэллээ.

Тэрбээр “Аавынхаа алтан бөгжийг зүүгээд 2006 онд надад зориулж хийлгэж өгсөн бүсээрээ гангарсан байна. Хоёр эрдэнээрээ гоёод аавынхаа хөшөөний нээлтийн үгийг хэлье гэж бодсон юм. Аав минь Төв аймгийн Эрдэнэсант сумын нутагт төрж өссөн. Өнөөдөр аав минь байсан бол 85 настай байх байлаа. Аав минь 11 хүүхэдтэй айлын отгон хүү, нагац ахдаа өргүүлж Жигжидийн Мөнхбат гэх нэр алдрыг авсан. Доороо нэг эмэгтэй дүүтэй, эгч минь өнөөдөр энд сууж байна. Ээжтэй минь гэр бүр болоод 55 жил жаргал, зовлонгоо хуваалцан амьдрахдаа таван хүүхэдтэй болсон. Хайртай ээж минь үр  хүүхэд, ач, гуч, зээдээ өмөг түшиг болж, алт шиг сургаалаа айлдан амьдарч байна, ээждээ баярлалаа. Аав минь нэг л зангаараа бөхөд хайртай монголчуудын хайртай хүү, аварга нь байсаар байна. Аав минь залуудаа начин цолын давааг мэдрэлгүй заан цол хүртэж, 25 насандаа дархан аварга болж, Монголын анхны чөлөөт бөхийн шигшээ багийн тамирчин, анх удаа Япон Улсад олимп зохион байгуулгахад Монгол Улс анх удаа оролцож, хамгийн өндөр амжилтыг аав минь үзүүлсэн билээ. Олимпын мөнгө, хүрэл медальт аав минь Монгол Улс хоёр дахь удаагаа оролцоход Монгол Улс алтан медаль авч болдог юм гэдгийг 1968 онд бидэнд харуулсан. Энэ үед гаднын сонин сэтгүүлд “Чингисийн Монгол сэрлээ” гэж бичиж байсан билээ. МАХН-ын гишүүн аав минь 1990 онд ардчиллын дуу хоолой болж, төв талбай дээр дэмжин үг хэлж, Ардчилсан Үндсэн хуулийг баталсан 1991-1992-ны депитат байлаа. 1992 онд Японы 45 дахь их аварга Монголд айлчлан ирж, аавтай минь нөхөрсөг уулзалт хийхэд миний бие долоон настай анх сумогийн ертөнцийг танин шохоорхож эхэлсэн. Багшийн эрдэм шавьд гэж, А.Цэрэндорж Бөхийн дээдийг сургуулийг үүсгэн байгуулж, олон шавь төрүүлэн гаргасан. Энэхүү хөшөө нь нутгийн ард түмний сайн санаа, үр хүүхдүүд, спорт хороо, бөхөд хайртай ард түмэн, бөхийн үе үеийн зүтгэлтэн, шавь, найз нөхдийн хичээн зүтгэлээр бүтлээ. Аавын минь энэ гайхалтай бүтээл өөртөө олон сайхан зүйлсийг шингээн,  цогцлоосон бөгөөд өнөөдөр та бүхэн энэ сайхан үйл явдалд оролцсоноороо гэрч болж байна. Архангай аймгийн Хашаат сумын уран барималч Ж.Түмэнчулуу, Монгол Улсын соёлын гавьяат зүтгэлтэн н.Энхтайван нартаа баярлалаа. Ард түмнээ баясан цэнгүүлж, олон сайхан амжилтыг үзүүлсэн Төв цэнгэлдэх хүрээлэнд хөшөө байрлуулах боломж олгосон Нийслэлийн Засаг дарга, Иргэдийн төлөөлөгчдийн баг хамт олон, Төв цэнгэлдэх хүрээлэнгийн хамт олонд баярлалаа. Бөхийн спортын түүхэнд мөн анхдагч, XX зууны анхдагч, XI зууны мэргэжлийн сумо бөхийн аварга, Гиннесийн есөн удаагийн рекорд анхны аав, хүү хоёр баатар болсон анхдагчид билээ. Миний хайртай аав, бид таныхаа үргэлжлэл" гэв.