Төрийн байгуулалтын байнгын хороо Ерөнхий сайдад итгэл хүлээлгэх тогтоолыг хэлэлцэж эхэллээ.

      Энэ үеэр УИХ-ын гишүүн Ж.Энхбаяр “Монгол Улсын ардчилсан үндсэн хууль батлагдсанаас хойш анх удаа Монгол Улсын Ерөнхий сайдад итгэл үзүүлэх асуудал ард түмний төлөөллийн байгууллагаар хэлэлцэгдэж байна. Үүнтэй холбоотойгоор улсын шинэ Үндсэн хуулийн энэ заалт хэрхэн зөв цаашид амилж хэрэгжих вэ гэх бодлогын хүрээнд хэдэн асуулт асууя.

1. Бодлогын тодорхой асуудлаар Ерөнхий сайдад итгэл үзүүлэх асуудал. Ерөнхий сайд  Засгийн газрын үйл ажиллагааны мөрийн хөтөлбөр 14 мега төсөл, баялгийн сан, эрчим хүчний реформ зэрэг улсын парламентаас үндсэндээ 90-ээс дээш хувийн дэмжлэгтэй, парламентад суудалтай таван нам тавуулаа дэмжсэн, дэмжсээр ч байгаа асуудлаар бодлогын дэмжлэг хүсээд байгаа нь ямар учиртай юм бэ. Аль нам, ямар гишүүн таниас дэвшүүлсэн энэ бодлогыг дэмжихгүй саад болоод байна вэ.
2. Монгол Улсын Ерөнхий сайдаас ирүүлсэн албан бичигт “Ард түмний төлөөллийн төв байгууллагаар шийдвэрлүүлье гэсэн байна. Манай улсын Үндсэн хуульд ийм байгууллага байхгүй. Яг ямар байгууллага юм бэ?
3. Монгол Улсын Үндсэн хуульд хамтарсан Засгийн газар гэдэг ойлголт байхгүй. Монгол Улсын Засгийн газар гэх ойлголт байгаа. Түүнчлэн Б.Чимэд багшийн хэлсэнчлэн Эвслийн Засгийн газар гэсэн ойлголт ч байхгүй. Зөвхөн сонгуулийн өмнө эвсэлж байгуулж болох тухай Үндсэн хуульд байдаг. Хамтарч Засгийн газраа байгуулах асуудал бол улс төрийн хүрээнд ярианы хэллэг байгаа юм. Энэ ярианы хэллэгийг УИХ-ын тогтоолоор баталж болох уу гэдгийг хуралдаан даргалагчаар асуумаар байна” гэв.

Түүний асуултад Ерөнхий сайд Л.Оюун-Эрдэнэ “Улс төрийн саад үүсэж байгаа учир энэ бодлого хэрэгжих боломжгүй болж байна. Тиймээс парламент өөрийнхөөрөө шийдээрэй гэсэн шийдэл. Энэ бол аль ч парламентын засаглалтай улсад байдаг жишиг. Сонгодог парламент гэсэн үг байхгүй. Бид сонгодог парламент гэж яриад байгаа. Парламент ард түмний нэрийн өмнөөс ажиллах ёстой төлөөллийн байгууллага. Улс төрийн асуудал үүссэн. Үүн дээр Ардчилсан нам, Хүн намтай холбоотой, томилгоо тойрсон асуудал гээд нэлээд том асуудал манай бүлгийн хурал дээр болсон. Тэр асуудалд илэн далангүй хариулсан. Миний байр суурь үүнийг бага хурал дээр шийднэ. Зөвхөн бүлгийн түвшинд ярьж болохгүй гэдэг асуудлыг ярьсан. Энэ өөрөө бодлогод саад учирч байгаа хүчин зүйл мөн. Парламентын мэтгэлцээн сонирхолтой болно. Бид өнөөдөр олон зүйл дэнслэх болно” гэж хариуллаа.