Хаврын улс төр бужигнаантай байна. Хачин юм шүү, МАН-ын Бага хурал болоход АН-ын даргын суудал ганхаж, ажлаа өгөхдөө тулж байдаг.   

     МАН Бага хурлаа хуралдуулаад долоо хонолоо. Залуучууд тайван жагсаал зохион байгуулаад хагас сар өнгөрлөө. Энэ хугацаанд юу ч өөрчлөгдсөнгүй. Зөвхөн АН-ын найман сайдыг Засгийн газраас “хөөж”, хамтарсан Засгийн газрыг тараана гэсэн шийдвэрийг үүр цүүрээр хийв. Үүний дараа АН-ын даргын итгэл тасарч, найдвар найдалтгүй болсон учир ажлаа өгнө гэлээ. Гэхдээ аман ярианаас өөр хэрэгжсэн зүйл алга, одоохондоо. Хамтарсан Засгийн газраа тараах эсэх нь, эсвэл тамираа тасартал зүтгэх эсэх нь ч тодорхойгүй байна.

       Өдийгөөс долоо хоногийн өмнө Бага хурлын  үр дүнгийн талаар Ерөнхий нарийн бичгийн дарга Я.Содбаатар “МАН-ын VI бага хурал 70 гаруй хувийн ирцтэй хуралдаж дууслаа. Бага хурлаар Ерөнхий сайд Л.Оюун-Эрдэнийн улс төриййн илтгэлийг авч хэлэлцсэн. Илтгэлтэй холбоотой 40 гаруй гишүүн асуулт асууж, асуудлыг хэлэлцсэн. Үүнтэй холбоотой Хамтарсан Засгийн газарт улс төрийн дүгнэлт өгөх тухай тогтоол батлагдсан. Энэ тогтоолоор Засгийн газарт багтсан улс төрийн намын УИХ дахь нэр бүхий гишүүд Засгийн газарт хамтарч ажиллах гэрээг удаа дараа зөрчсөн удаа дараа үйлдэл гаргасан. Улмаар МАН-ын анхан, дунд шатны намын гишүүдийн шүүмжлэлийг үндэслэн Засгийн газарт хамтарч ажиллах гэрээг зөрчсөн улс төрийн намыг оролцуулахгүйгээр “Шинэ сэргэлтийн бодлого”, Бүсчилсэн хөгжлийн мөрийн хөтөлбөрийг үргэлжлүүлэх нь зүйтэй гэсэн шийдвэр гаргалаа. Мөн хоёрдугаар тогтоолоороо 2024 оны долдугаар сарын 5-ны V хуралдааны 04 тоот тогтоолыг хүчингүйд тооцсон тогтоол баталлаа. Энэ намын төлөөллийн төв байгууллага олонхоороо шийдсэн учир хамтарсан Засгийн газарт багтсан намуудад танилцуулахаар болсон. Улмаар гэрээнд заасан бодлогын зөвлөлд танилцуулж, тодорхой шийдэл гаргана. Ерөнхий сайд бүх байр сууриа танилцуулсан. Намын Бага хурлын шийдвэр гарсан учраас шийдвэрийн дагуу явна. Ардчилсан нам, ХҮН нам аль аль нь гэрээ зөрчсөн ч Ардчилсан намын үйлдэл их байна гэж үзсэн” хэмээн мэдээллээ.

       Бага хурлаас ердөө хэдхэн цагийн өмнө ХҮН намын дарга Т.Доржханд “Хадаг барьж гуйчихаад хамтарсан Засгийн газраасаа гаргавал сөрөг хүчин ямар байдгийг үзүүлнэ. Хэрэв МАН, Хамтарсан Засгийн газар хэрэггүй гэж үзэх юм бол Монгол Улсыг Ерөнхийлөгчийн засаглал руу түлхэж байна гэж ойлгоно. Тэгвэл ХҮН нам сөрөг хүчин шиг сөрөг хүчин болно. Бид хариуцлага тооцно” гэж хэдэнтээ хэлсэн. Харин АН-ын дарга Лу.Гантөмөр “АН-ын даргын хувьд, хамтарсан Засгийг байгуулсан хүний хувьд хэзээ ч урвахгүй гэж бодож байгаа. АН ч энэ байр суурин дээрээ өнөөдрийг хүртэл байж чадсан. АН бол олон ургальч үзэлтэй нам. Өөрийнх нь нам Засгийн газрыг удирдсан ч шүүмжилж л байдаг хүмүүс. Тийм ч учраас АН өнөөдөр өөрийнхөө өнгө төрхөөрөө л байгаа. Үүнийг МАН ойлгож хүндлэх хэрэгтэй. Түүнээс биш хамтарлаа гээд намын гишүүдийнхээ амыг барих зүйл огт биш. Бид ийм хэлэлцээр хийгээгүй. Бид АН-ынхаа улс төрийн зөвлөлөөр ч энэ асуудлыг ярина. Түүнээс биш АН Засагт байлгаад өгөөч гэж хэзээ ч гуйхгүй. Бас улсынхаа эрх ашгаас хэзээ ч урвахгүй" гэсэн байдаг.

      Т.Доржхандын сүрдүүлэг эсвэл сануулга ч юм шиг, Лу.Гантөмөрийн гуйхгүй, гуйлгахгүй гэх мэдэгдлийг МАН-ын Бага хурлын гишүүд харгалзаж хэлэлцсэн бололтой. Ингээд “Хамтарсан Засгийн газарт байгаа Ардчилсан нам, ХҮН нам аль аль нь гэрээ зөрчсөн ч Ардчилсан намын үйлдэл их байна гэж үзлээ” гэж мэдэгдсэн байх талтай. Өөрөөр хэлбэл, МАН-ын Бага хурлын гишүүд л АН, ХҮН намын ирээдүйг мэддэг болжээ гэсэн үг.

   МАН-ын Бага хурлын дараа хагас өдөр улс төр бужигнав. АН хамтарсан Засгийн газраас гарах нь тодорхой боллоо гээд үймж эхлэв. Арван сарын томилгооныхон “Ажилгүй боллоо” гэж ундуйцаж, тохироо, тохиролцоогоо хийхээр гүйлдэв. МАН-ын гишүүн сайдын марафонд уралдаж, ордноор нэг “юм” болов”. УИХ-ын дарга нь хүртэл “Манай олон сонгогдсон гишүүд хаачсан бэ. Хуралдаа суухгүй алга боллоо. Чухал хууль хэлэлцэж байна” гэж индэр дээрээс хүртэл хэлэв. Сайдын суудалд санаархагчид тоосон ч үгүй, “Тохироо, тохиролцоо” гэх хоёр үгэндээ автаад алга болов. Ийм л дүр зураг өнгөрсөн өдрүүдэд үргэлжиллээ. Өнөөдөр хэлэлцэж, эцэслэж магад гэж хүн бүхэн хүлээж байна.

      Өнгөрсөн хугацаанд тодорхой болсон ганцхан зүйл нь АН хамтарсан Засгийн газраас гарвал АН-ын дарга Лу.Гантөмөр ажлаа өгч, сул гишүүн болно. Тэрбээр Бага хурлын шийдвэрийн дараа “Байгуулсан Засгийн газар нь уначихаар надад намын даргаараа үлдэх сэтгэл зүй, сонирхол алга. Тиймээс би хариуцлагаа хүлээнэ. Би МАН-ын залуу үед итгэж байсан. Энэ мөчид итгэлээ тасалж байна. Дараагийн намын даргаар намаа хүчтэй, эвтэй байлгахад ур ухаан гаргадаг хүн байгаасай гэж хүсэж байна” гэж мэдэгдсэн.

     Ингээд эцэс сүүлд нь, АН хамтарсан Засгийн газраас гарч, шинэ даргатай болохоор болов. Өөрөөр хэлбэл, МАН Бага хурлаа хуралдуулж, АН-ын даргын асуудлыг “хэлэлцэв”. МАН-ын Бага хурлаар АН-ын даргын суудал ганхалаа гэсэн үг.