Өнгөрсөн баасан гарагт шатахууны үнэ 200 төгрөгөөр гэнэт нэмэгдсэн. Тэгвэл уг асуудлаар Аж үйлдвэр, эрдэс баялагийн сайд Ц.Туваан мэдээлэл өглөө. Тэрбээр "Шатахууны үнэ гэнэт нэмсэн талаар манай яаманд мэдэгдээгүй. Олон талын харилцаа хамтын ажиллагааг хангадаг Аж үйлдвэр, эрдэс баялагийн яамнаас эхлээд аж ахуйн нэгжүүд, шударга өрсөлдөөн хэрэглэгчийн төлөөх газар зэрэг олон төлөөлөл багтсан үнийн зөвлөл гэж бий. Үнийн зөвлөл тавдугаар сарын 5-нд уулзалт хийж, энэ сарын 25-ныг болтол үнэ нэмэхгүй, эргээд ярилцъя гэсэн шийдвэрт хүрсэн.

    Гэтэл нефть импортлогч компаниуд ярианаасаа буцаж, үнээ нэмсэн. Үүн дээр манай яам мэдэгдэл гаргасан. Манайд импортлож байгаа шатахууны үнэ огт нэмэгдээгүй. Дээр нь дизель түлшний үнэ тонн тутамд 100 ам.доллараар буурсан байтал ингэж үнээ нэмж болохгүй гэдгийг хэлсэн. Импортлогч компаниудын зүгээс вальютын ханш нэмэгдсэн учраас үнээ нэмсэн гэсэн тайлбар өгөөд байна. Өнөөдөр Үнийн зөвлөл дахин ярилцана. Өнөөдөр надад ирсэн мэдээллээр Шунхлай ХХК-аас АЙ-92-оос бусад шатахууны үнийг буулгасан гэсэн. Бид төр болон яамны зүгээс шатахууны үнэ дээр шууд авч хэрэгжүүлэх хуулийн арга хэмжээ хомс юм билээ. Үнийн зөвлөл дээр зөвшилцдөг. Энэ талаар Шударга өрсөлдөөн хэрэглэгчийн төлөө газар ажиллаж байгаа.

  Улс төрийн нөхцөл байдал ийм, ард түмний сэтгэл санаа тогтворгүй байхад гэнэт шатахууны үнэ нэмэх шаардлагагүй байсан. Монополийн эсрэг хариу арга хэмжээ авахаар бид ажиллаж байна. Анзаарсан бол өнгөрсөн баасан гарагийн шөнө ажлын цаг дууссан үед үнээ нэмсэн. Импортлогч компанийн ихэнх нь утсаа аваагүй. Шунхлай компаниас АЙ92 шатахуун дээр алдагдалтай ажиллаж байгаа бусад шатахууныг 200 төгрөгөөр буулгасан гэдгээ хэлсэн" гэлээ.