Ардчилсан намд албан тушаал тогтохоо байжээ. Арай гэж өнгөрсөн сонгуулиар хоёр тамга, тэмдгээ нэг болготол ахиад даргын эрэлд гарах цаг үе ирж байна. Өөрөөр хэлбэл, хамтарсан Засгийн газарт хадаг сүүтэй уригдсан сөрөг хүчний намыг МАН-ынхан албан тушаалын тоогоо хэтрүүлж байна хэмээн ад үзэж, нүд үзүүрлэв.

       Ийн МАН-ын дарга, Ерөнхий сайдын дуулианд Ардчилсан намынхан хөлд нь чирэгдэж, намын дарга нь ажлаа хүлээлгэж өгөхөө мэдэгдээд байна.

      Энэ талаар АН-ын дарга, УИХ-ын гишүүн Л.Гантөмөр “Намын даргын суудлаа хүлээлгэж өгнө. Тун удахгүйй Үндэсний бодлогын хороо хуралдаж, хуучин дүрмээрээ намын даргыг сонгоно” хэмээн мэдэгдээд буй. Иййн Ардчилсан намынхан ахиад л арслантай тамганы төлөөх тэмцлээ эхлүүллээ.

     Ардчилсан намын даргыг солих асуудал аль эрт яригдаж байлаа. Өөрөөр хэлбэл, УИХ дахь АН-ын бүлгийн дарга О.Цогтгэрэл УИХ-ын гишүүн О.Амгаланбаатар нар намынхаа даргыг “унагаах” ажлыг аль эртнээс ярьж эхэлсэн байдаг. Тиймдээ ч Ардчилсан нам даргаа солих сургаар О.Цогтгэрэл намын даргыг горилогчдын эгнээн тэргүүлж явна. Аль оны өмнөөс л О.Амгаланбаатар намын даргынхаа огцруулах гарын үсэг цуглуулж эхэлсэн. Одоо харин тэд энэ ажиллагаагаа улам бүр эрчимжүүлж эхэлсэн гэнэ.

       АН-ын даргад эрчимтэй яригдаж байгаа дараагийн хүн нь Хууль зүй, дотоод хэргийн сайд О.Алтангэрэл аж. Түүний хувьд улс төрд Х.Баттулгын хүн гэдгээрээ нам дотроосоо дэмжлэг авч чадах эсэх нь эргэлзээтэй байгаа гэнэ.

     Түүнчлэн УИХ-ын гишүүн Х.Тэмүүжингийн нэр ч АН-ын дараагийн даргад яригдаж байна. Өмнө нь Ардчилсан намын тамга С.Эрдэнэ, Ц.Туваан гээд хоёр хуваагдсан цаг үед намын даргад нэр дэвшээд бүдэрч байсан. Тиймдээ ч улс төрийн дэмжлэг тун тааруу байгаа гэх  нь бий.

     Мөн АН-ын дараагийн даргад хүчтэй яригдаж байгаа горилогчдын нэг нь Сангийн сайд асан С.Баярцогт. Түүний хувьд УИХ-ын сонгуулиар жагсаалтад багтаж чадалгүй, жийгдсэн. Түүнээс хойш улс төрд нам гүм байсан түүнийг АН-ын даргын сунгаанаар амь орно гэх яриа АН-ын байраар гарах болжээ.  

             Дүрмээрээ бол УИХ-ын сонгуульд үнэмлэхүй ялагдал хүлээснийхээ хариуцлагыг хүлээж Лу.Гантөмөр Ардчилсан намын даргаас огцорч, дараагийн даргыг сонгох байлаа. Гэвч Ардчилсан намын даргын томилгоог намын гишүүд нь бус эрх баригч намынхан шийддэг болсноор Л.Гантөмөр суудалтайгаа үлдэж, үлдсэн нь дэмий л шогшрохоос өөр аргагүй болсон. Хэрэв зээ Ардчилсан намынхан дүрмээ дагаж, даргаа огцруулах юм бол дахин арслантай тамгаа хувилж, хулгайлж, зугтаасан гэх хошин жүжиг шинээр дэлгэгдэж мэдэхийг ч үгүйсгэхгүй.