МАН-ын 400 гаруй гишүүд Л.Оюун-Эрдэнийн Засгийн газрыг огцруулах уу, аврах уу гэдэг дээр бүтэн 12 цаг хуралдлаа. Өчигдөр 15:00 цагт товлогдсон МАН-ын VI Бага хурлаар Л.Оюун-Эрдэнийн тэргүүүлсэн хамтарсан Засгийн газрын үйл ажиллагааг үргэлжлүүлэх үү, үгүй юү гэдгийг 12 цаг дэслэж, 03:00 цагт хурлын шийдвэрийг танилцуулсан.

   Хурлын үр дүнгийн талаар МАН-ын Ерөнхий нарийн бичгийн дарга Я.Содбаатар “МАН-ын VI бага хурал 70 гаруй хувийн ирцтэй хуралдаж дууслаа. Бага хурлаар Ерөнхий сайд Л.Оюун-Эрдэнийн улс төриййн илтгэлийг авч хэлэлцсэн. Илтгэлтэй холбоотой 40 гаруй гишүүн асуулт асууж, асуудлыг хэлэлцсэн. Үүнтэй холбоотой Хамтарсан Засгийн газарт улс төрийн дүгнэлт өгөх тухай тогтоол батлагдсан. Энэ тогтоолоор Засгийн газарт багтсан улс төрийн намын УИХ дахь нэр бүхий гишүүд Засгийн газарт хамтарч ажиллах гэрээг удаа дараа зөрчсөн удаа дараа үйлдэл гаргасан.

     Улмаар МАН-ын анхан, дунд шатны намын гишүүдийн шүүмжлэлийг үндэслэн Засгийн газарт хамтарч ажиллах гэрээг зөрчсөн улс төрийн намыг оролцуулахгүйгээр “Шинэ сэргэлтийн бодлого”, Бүсчилсэн хөгжлийн мөрийн хөтөлбөрийг үргэлжлүүлэх нь зүйтэй гэсэн  шийдвэр гаргалаа. Мөн хоёрдугаар тогтоолоороо 2024 оны долдугаар сарын 5-ны V хуралдааны 04 тоот тогтоолыг хүчингүйд тооцсон тогтоол баталлаа. Энэ намын төлөөллийн төв байгууллага олонхоороо шийдсэн учир хамтарсан Засгийн газарт багтсан намуудад танилцуулахаар болсон. Улмаар гэрээнд заасан бодлогын зөвлөлд танилцуулж, тодорхой шийдэл гаргана. Ерөнхий сайд бүх байр сууриа танилцуулсан.  Намын Бага хурлын шийдвэр гарсан учраас шийдвэрийн дагуу явна. Ардчилсан нам, ХҮН нам аль аль нь гэрээ зөрчсөн ч Ардчилсан намын үйлдэл их байна гэж үзсэн” хэмээн мэдээллээ.

      Хурал эхэлснээс хойш намын гишүүдийн олонх нь хамтарсан Засгийн газрын үйл ажиллагааг явуулах ёстой гэсэн байр суурийг илэрхийлсэн ч хурлын төгсгөлд санал хуваагджээ.

       Ийн орлогоо нотлохыг шаардсан Ерөнхий сайдын шаардлагын хариуд МАН-ынхан АН-ыг хамтарсан Засгийн газраас гаргах хариу арга хэмжээ авлаа. Анх улс төрийн нөхцөл байдал Ерөнхий сайдын хүү болон сүйт бүсгүйн тансаглалтай холбоотой үүссэн. Тиймдээ ч Ерөнхий сайд олон нийтэд би орлогоо нотолно хэмээн мэдэгдэж байлаа. Харин орлого нотлох асуудал эцэстээ Ардчилсан нам руу чиглэж, хамтарсан Засгийн газраас хөөгдөх дээрээ хүрэв.

     Ардчилсан намын гишүүдээс Ерөнхий сайдыг орлогоо нотлох жагсаалын үеэр огцруулах асуудал дээр гарын үсэг зурсан. Түүнээс өмнө Ерөнхий сайдыг огцруулах асуудлыг хэд хэдэн удаа сөхөж байсан нь ийн МАН-ынхны дараагийн ээлжнийхэнд том боломж олгосон гэхэд буруудахааргүй байна.

АН-Д ӨГСӨН АЛБАН ТУШААЛТАЙ МАН-ЫНХАН БАРЬЦСАН УУ

      МАН-ын Ерөнхий нарийн бичгийн дарга Я.Содбаатарын мэдээллээс харахад Ардчилсан намыг хамтарсан Засгийн  газраас гаргаж, ХҮН намыг авч үлдэх тохироон хүрсэн юм байна. Цаашлаад УИХ-ын гишүүн Н.Номтойбаярын тэргүүлж буй “Үндэсний эвсэл”, ИЗЗН-тай хамтарсан Засгийн газар байгуулна гэх асуудлууд ч сөхөгдөж байна. Өчигдрийн Бага хуралд оролцсон МАН-ын гишүүд Ардчилсан намынханд дэндүү их албан тушаал өгсөн гэж шүүмжлэгсэд цөөнгүй байж ээ. Одоогийн байдлаар хамтарсан Засгийн газарт АН-ын найман гишүүн сайдаар ажиллаж байгаа. Түүнчлэн Төрийн болон орон нутгийн өмчит компанид хийсэн томилгоо ч цөөнгүй бий. Тиймдээ ч Бага хурлаар АН-ынханд өгсөн албан тушаал арай ихэдсэн гэх шүүмжлэл эрх баригч намын гишүүдээс багагүй гарсан гэнэ.  

      Үндсэндээ хамтарсан Засгийн газар байгуулахад хамгийн “гал”-тай яамдаа тэдэнд хариуцуулсан нь зүгээр  ч нэг тохиолдол биш байж. Өөрөөр хэлбэл, тэд өнгөрсөн хугацаанд 14 мега төслөөсөө гацсан төмөр зам, ураны асуудлаас эхлээд томоохон төсөл хөтөлбөрүүдээ урагшуулах ажлыг ч амжуулж авсан. Ийн үүргээ гүйцэтгэсэн Ардчилсан нам Засгийн газраас гарах нь тодорхой боллоо. Тэднийг хамтарсан Засгийн газраас гаргах нь цаг хугацааны асуудал байсан.

       Харин Ерөнхий сайд Л.Оюун-Эрдэнэ хамтарсан Засгийн газрын бүтцийг задалбал, хариуцлагаа хүлээнэ хэмээн мэдэгдсэн гэх. Ерөнхий сайд Л.Оюун-Эрдэнэ хариуцлагаа хүлээж, огцрох эсэх асуудал МАН-ын Удирдах зөвлөлийн мэдлийн асууудал болж хувирна. Гэвч одоогоор Удирдах зөвлөлийн хурал товлогдоогүй байна.

      Ийн орлогоо нотлохыг шаардсан жагсаал Л.Оюун-Эрдэнийг биш Ардчилсан намынхныг оножээ.