Монгол Улсын Их Хурлын дарга Д.Амарбаясгаланд өнөөдөр Монгол Улсын Ерөнхий сайд Л.Оюун-Эрдэнэ, Тэргүүн шадар сайд Л.Гантөмөр, Шадар сайд Т.Доржханд, Хууль зүй, дотоод хэргийн сайд О.Алтангэрэл нар Нийтийн албан тушаалтны хууль бус хөрөнгийг иргэний журмаар нэхэмжлэх, нөхөн төлүүлэх тухай хуулийн төсөл болон түүнийг дагалдуулан боловсруулсан бусад хуулийн төслийг өргөн мэдүүллээ.

      Энэ үеэр Ерөнхий сайд Л.Оюун-Эрдэнэ "Өнөөдөр Монгол Улсын Засгийн газраас Нийтийн албан тушаалтны хууль бус хөрөнгийг иргэний журмаар нэхэмжлэх, нөхөн төлүүлэх тухай хуулийн төсөл болон бусад дагалдах хуулийн төслийг өргөн барьж байна. Энэ өмнө нь арваннэгдүгээр сард өргөн баригдсан хуулийн төсөл боловч зарим зүйл заалтыг илүү боловсронгуй болгох, тэр дундаа Сингапур, Шинэ Зеланд зэрэг олон улсын туршлагыг оруулаад нийтийн албан тушаалтан орлогоо нотолж чадахгүй бол хуулийн дагуу улсын орлого болдог зарчим, гэр бүлийн гишүүдийн орлогын албан татвараар бүртгэл илүү нарийвчилж хянагдах агуулгыг ярилцаад өргөн барих нь зүйтэй гэж үзсэн. Авлигын эсрэг багц арга хэмжээнүүд авч байгаагийн хамгийн гол зүйл нь хөрөнгө орлогын мэдүүлгийн мэдээллийн сан сайн болсон байна. Харин мэдээллийн санд байгаа хөрөнгө орлогын орлого нотлогдохгүй бол хэрхэн зохицуулах вэ гэдэг эрх зүйн зохицуулалт байгаа ч дэлгэрэнгүй биш учир асуудал бий. Олон улсын байгууллагаас өгч байгаа зөвлөмжүүд дээр нийтийн албан тушаалтан хөрөнгөө нотолж чадахгүй бол иргэний журмаар хураагдах дүрэм байгаа гэдэг судалгааны материал, бусад баримт бичгийн хамт танд өргөн барья" гэв.