Засгийн газрын өнөөдрийн хуралдаанаас гаргасан шийдвэрийг танилцууллаа.

      Энэ үеэр Соёл, спорт, аялал жуулчлал, залуучуудын сайд Ч.Номин "Засгийн газрын өнөөдрийн хуралдаанаар урт хугацааны хөгжлийн бодлого "Алсын хараа-2050" дээр төлөвлөж байгаа эдийн засгийг солонгоруулах, аялал жуулчлалын салбарыг эдийн засгийн тэргүүлэх чиглэл болгох, Монгол Улсад дөрвөн улирлын аялал жуулчлалыг хөгжүүлэх. Үүнтэй уялдуулан 2023-2028 оныг Монголд зочлох жил болгон зарласан. Аялал жуулчлалын салбарт үйл ажиллагаа явуулж байгаа аж ахуйн нэгжүүдийн хөрөнгө оруулалтуудыг нэмэгдүүлэх зорилгоор Засгийн газраас тогтоол гарлаа. Аялал жуулчлалын салбарт үйл ажиллагаа явуулж байгаа аж ахуйн нэгжүүдэд бага хүүтэй, хөнгөлөлттэй зээлийг бий болгох суурийг тавьсан. Ингэхдээ зургаан жилийн хугацаанд зургаан хувийн хүүтэй зээл гаргахаар Засгийн газрын тогтоол гарлаа. Засгийн газраас олон улсын томоохон аялал жуулчлалын зөвлөгөө өгдөг групптэй өнгөрсөн жилийн хугацаанд хамтарч ажилласан. Энэ хүрээнд бид 2030 он гэхэд хоёр сая жуулчин хүлээж авахаар зорилго тавьж байна. Ингэснээр улсынхаа дотоодын нийт бүтээгдэхүүний 10 орчим хувийг аялал жуулчлалын салбараас бүрдүүлэх боломжтой байна. Цаашид эрчимтэй хөгжиж байгаа олон улсын зах зээлийг Монголд илүү төвлөрүүлэх боломж бүрдэнэ гэж харсан. Ингэхийн тулд буцаад энэ салбарт хөрөнгө оруулах шаардлагатай. Ойролцоогоор 11 орчим их наяд төгрөгийн хөрөнгө оруулалт шаардлагатай байгаа. Үүнийг хэрэгжүүлэхдээ төрийн зүгээс томоохон дэд бүтэц, нислэгийн тоог нэмэгдүүлэх, хот хоорондын бүтцийг сайжруулах зэрэг томоохон хөрөнгө оруулалтыг төрийн зүгээс хийж, хэрэгжүүлэх. Нөгөө талаар жуулчдыг Монголд ирэхэд ая тухтай байх, цаашлаад дөрвөн улирлын аялал жуулчлалыг дэмжсэн хөрөнгө оруулалтыг хувийн хэвшлээс хийх нь зүйтэй гэж үзсэн учир энэхүү зээлийг гаргахаар төлөвлөж байна" гэв.