УИХ-ын гишүүн, Ёс зүйн байнгын хорооны дарга Б.Баярбаатар мэдээлэл өглөө.

    Тэрбээр "МАН-ын Бага хурал жилд нэгээс доошгүй удаа хуралдах ёстой. Энэ удаад VI хурлаа хуралдуулах гэж байна. Энэ удаад үүсээд байгаа Гүйцэтгэх засаглалын тэргүүн болон хамтарсан Засгийн газартай холбоотой асуудлыг ярих ёстой. Олуулаа хэлэлцэж байж үүссэн асуудлаа шийднэ. Бага хурал бол төлөөллийн байгууллага. Намын нэр дэвшилт, мөрийн хөтөлбөр батлах, эвсэх эвсэхгүй байх гэсэн асуудлыг хэлэлцэх үүрэгтэй байдаг. Харин намын даргад хариуцлага тооцох дүрэм байхгүй. Намын дарга Их хурлаас сонгогддог. Харин хамтарсан Засгийн газраас гарах асуудлыг шийдэх эрх нь Бага хуралд бий.

     Орлогоо нотлох асуудал дээр шүүх эцэслэн гэм буруутайд тооцоогүй бол гэм буруутайд тооцохгүй ардчилсан нийгэмд амьдарч байна. Хөрөнгө орлогод өөрчлөлт оруулсан бол хугацаанд нь мэдүүлэх хуулийн санкцтай. Аль нэг шатны хууль хяналтын байгууллага дээр процесс өрнөсөн юм алга. Энд ёс зүйн хариуцлагаас илүү улс төрийн хариуцлага яригдахаар байна. Тэгэхээр хамтын шийдвэр гарах ёстой. Үнэхээр ямар нэг ёс зүйн зөрчил байвал намын даргатай уулзаж, өөрөөс нь мэдээлэл авч байж шийднэ. Энэ хүний албан ёсны байр суурь ямар байхыг маргаашийн бага хурлаар хэлэлцэх байх" гэлээ.