БӨХ ДАМЖУУЛАХ ЭРХИЙГ ОЛОН ТЕЛЕВИЗЭД ОЛГОЖ, ҮЗЭГЧДИЙН ТООГ НЭМЬЕ

      “Монголын Үндэсний бөхийн холбоо үндэсний бөхийг өмчлөөд ганцхан телевиз дамжуулах гэрээ хийх нь зөв үү” гэх шүүмжлэл олны дунд гараад байгаа. Тодруулбал, Монголын Үндэсний бөхийн холбоо үндэсний бөхийг ганцхан NTV телевизээр дамжуулахаар 750 сая төгрөгийн гэрээ хийжээ. Уг нь, бөх дамжуулах эрхийг хоёр, гурван телевизэд олгож, бөх үзэгчдийн тоог бага ч болтугай нэмэх нь дээр биш гэж  үү, Ц.Магалжав дарга аа. Бөхийн өргөө шиг суудлын зэрэглэлгүй ордон ховор. Суудлаа зэрэглэлтэй болгох нь зөв гэх иргэдийн шүүмжлэл бий. Энэ мэтчилэн цаг үетэйгээ болон нөхцөл байдалтайгаа нийцсэн шийдвэр гаргавал яасан юм бэ, МҮБХ-ныхоон. Ганцхан телевизэд бөх дамжуулах эрхийг нь олгочихоод бусад хэвлэлийг очихоор нь хөөгөөд явуулдаг шийдвэрээ эргэж харвал яасан юм бэ. Монголчууд морь, бөх хоёроос хэзээ ч уйдаж байгаагүй. Жил ирэх тусам бөхчүүд сайжирч, нутаг нутгаас залуу бөх төрөн гарч байна. Тэднийг ч үзэгчид дэмжиж, ганц, хоёр сайн барилдаад эхэлбэл фэн нь болцгоодог. Харин нийгэм, цаг үе хөгжихийн хэрээр допингийн хэрэглээ нэмэгдсэн гэх асуудал бөхчүүдийн нэр хүндэд сөргөөр нөлөөлж байгаа нь үнэн. Мөн допинг хэрэглэдэггүй бөх байхгүй гэх яриа ч олны дунд цуураад удаж байна. Ийм үед бөх сонирхогчдыг нэмэх, тэднийг үзэгч, дэмжигчидтай болгох тал дээр доривтой анхаарч, зөв шийдвэр гаргах нь чухал болчихоод байгаа. Гэтэл чухам юуны учир бөх дамжуулах эрхийг ганцхан телевизэд олгочихоод үндэсний бөхийг үзэгчдээс улам бүр холдуулж, сонирхолгүй болгож байгаа нь олныг эргэлзээтэй байдалд хүргэж байна. Бөх дамжуулах эрхийг олон хэвлэлд хувааж олгохоос гадна, Монголын үндэсний бөхийн холбооноос  өөр ажлууд санаачилбал үндэсний бөхөөр хичээллэх, бөх болох сонирхолтой хүүхэд залуус нэмэгдэж, тэр хэрээр бөхийн нэр хүнд өндөр хэвээр байх юм биш үү, дарга нар аа.

МОНГОЛ БӨХ СОНИРХОГЧИД БУХИМДАЛТАЙ БАЙНА

    Бөх дамжуулах эрхийг ганцхан телевизэд олгоно гэдэг бөх үзэх эрхийг хааж, боож байгаатай ялгаагүй. Үндэсний бөхийн үнэлэмж унаж, бухимдал, хүндэтгэлгүй харилцаа барилдааны үеэр болон дараа нь гардаг болсон. Бөхийн үнэт зүйлс хүртэл үнэгүй болж, бөхийн тухай таагүй, хүндлэлгүй, бүдүүлэг яриа тэр дундаа хараал, доромжлол болон хувирч байгааг монголчууд харж байна. Үүнд энэ цаг үеийг эзлэн барилдаж байгаа өндөр цолтнууд, хүчтэнүүд, бөхчүүд өөрсдөө ч нөлөөлж байгаа. Цолондоо эзэн байх, дүүрэн байх бөхийн эрдэм, ухаан хоёрыг умартсан алдаа дутагдал нь монгол бөхийг нэр хүндгүй болгоод зогсохгүй, үзэгчгүй болгох эрсдэлтэй. Иймд МҮБХ-ныхон бөх дамжуулах эрхийг цаашид олон телевизэд олгож, үзэгчдийн тоог нэмэх хэрэгтэй байна.