Хотын даргаар “крандуулж”, НИТХ-ын төлөөлөгч болсон гэгддэг Ганболдын Батзориг Хэнтий аймгийн Дадал сумын харьяат. Х.Нямбаатарыг Сонгинохайрхан дүүргийн ИТХ-ын дарга байх үед буюу 2013-2016 онд Г.Батзориг дүүргийнх нь Газрын харилцааны албанд газар зохион байгуулагч байсан. Улмаар Хотын даргыг төрд тушаал ахихын хэрээр Г.Батзориг ч “крандуулж” эхэлсэн байдаг. Тодруулбал, Г.Батзориг 2019 оноос Сонгинохайрхан дүүргийн Газрын албаны дарга, 2020 оноос Нийслэлийн газрын албаны орлогч дарга, 2021 оноос Нийслэлийн газрын албаны дарга, 2024 оны хоёрдугаар сараас Хот байгуулалт, хотын стандартын газрын дарга, Нийслэлийн Ерөнхий архитектор,  Хот байгуулалт, газрын харилцааны асуудал хариуцсан зөвлөх болсон. Ингээд 2023 оноос Монгол Улсын зөвлөх инженер, өнгөрсөн намар Сонгинохайрхан дүүрэгт өрсөлдөж, НИТХ-ын төлөөлөгчөөр сонгогдоод байна. Тодруулбал, Г.Батзориг шиг тавхан жилийн дотор хотын бүх ааг, амттай албан тушаалуудыг сэлгэж дуусгасан дардан намтартай хүн НИТХ-д байхгүй.

Төлөөлөгчөөр зогсохгүй Хотын ерөнхий менежер болж, Хотын даргатай хоршиж ажиллаж байгаа. 

   Албан тушаал ахихын хэрээр Г.Батзоригийн хөрөнгө ч мөн өсчээ. 2019 онд түүний нийт орлого 12.4 сая, гэр бүлийн орлого нь 0 төгрөг байсан баримтыг хөрөнгө орлогын мэдүүлгээс нь харж болно. Тэнд долоон сая төгрөгөөр үнэлэгдэх амины орон сууцтай, тээврийн хэрэгсэлгүй, 357 мянган төгрөгийн хадгаламжтай, 65 сая төгрөгөөр үнэлэгдэх малнаас өөр хөрөнгөгүй гэж мэдүүлсэн байдаг. Өөрөөр хэлбэл, Г.Батзоригийн нийт хөрөнгө 2019 онд 77 сая төгрөг байсан гэсэн үг. Тэгвэл 2023 онд жилийн орлого нь 37 сая төгрөг, гэр бүлийн орлого нь 2.4 сая төгрөг, 580 сая төгрөгөөр үнэлэгдэх нийтийн орон сууц, хаустай болжээ. Мөн 475 сая төгрөгийн малтай, эзэмших, өмчлөх эрхийн хоёр газартай, дотоодын хадгаламжиндаа 18.8 сая төгрөгтэй болж, нийт хөрөнгө нь 1.1 тэрбум төгрөг болсон байна. Өөрөөр хэлбэл, хөрөнгө нь таван жилийн дотор 10 дахин өсөж, тэрбумтан болсон гэсэн үг.

Таван жилийн дотор ийн од нь гийсэн Г.Батзоригийг НИТХ дэх Х.Нямбаатарын гол төлөөлөгч, кноп хэмээн ойр тойрныхон нь шивэр авир хийдэг нь оргүй яриа биш гэдгийг дээрх баримт нотолж байна.