УИХ-ын чуулганы нэгдсэн хуралдаан эхэллээ. Чуулганы нэгдсэн хуралдаанаар УИХ дахь Ардчилсан намын бүлгийн дарга О.Цогтгэрэл "Хэлэлцэхээр товлосон асуудлаар Ардчилсан намын бүлэг завсарлага авч, байр сууриа нэгтгэх хэрэгцээ шаардлага байгаа.

    Мөн Ерөнхий сайд Л.Оюун-Эрдэнийн УИХ-ын гишүүний асуултад хариулахдаа гаргаж байгаа хандлага нь зүй бус байр суурийг илэрхийлсэн. Энэ нь хувь хүний харилцааны асуудал төдий биш юм. УИХ төрийн эрх барих дээд байгууллага, Монгол Улсын Засгийн газар хуулийн хэрэгжилтийг хангаж, УИХ-д тайлагнах үүрэгтэй байгууллага. Бид УИХ-ын дэгийн хуульд өөрчлөлт оруулахаар бэлдэж байгаа. Гэтэл өнгөрсөн хугацаанд ийм ёс зүйн асуудал удаа дараа гарлаа. Иймд Ардчилсан намын бүлэг УИХ-ын гишүүн болон УИХ-аас уучлалт гуйхыг Ерөнхий сайдаас шаардаж байна. Харин Хүний эрх, эрх чөлөөтэй холбоотой илтгэлийг сонсох нь зүйтэй гэсэн байр суурьтай байна" гэлээ.

        УИХ-ын дарга Д.Амарбаясгалан "УИХ-ын тухай хуулийн 30.1.5-д зааснаар тухайн хэлэлцэж буй асуудалтай холбогдуулан завсарлага авахыг зааснаас бусад тохиолдолд завсарлага авах боломжгүй" хэмээсэн бол УИХ дахь АН-ын бүлгийн дарга О.Цогтгэрэл "Зээлийн мэдээллийн сангийн асуудал, Жагсаал цуглаан хийх эрх чөлөөний тухай хуулийн төсөл, Эрүүл мэндийн даатгалын үндэсний зөвлөлийн гишүүнийг томилох гэсэн гурван асууудал дээр завсарлага авч, бүлгийн байр сууриа нэгтгэнэ" гэлээ.

Ийн УИХ дахь АН-ын бүлэгт УИХ-ын дарга Д.Амарбаясгалан нэг хоногийн завсарлага өглөө.