Засгийн газрын өнөөдрийн хуралдаанаас гаргасан шийдвэрийг танилцууллаа.

           Энэ үеэр ЗГХЭГ-ын дарга Н.Учрал "Аймаг, сумын Засаг дарга, Иргэдийн хурлын дарга нар, мэргэжлийн холбоод, төрийн бус байгууллага, хувийн хэвшил, аж ахуй нэгж байгууллагын төлөөлөл оролцсон таван салбар хуралдаан болсон. Тус хуралдаанаас нэгтгэгдсэн саналуудаа Бүсчилсэн хөгжлийн зөвлөгөөний үеэр аймгаас сонгогдсон УИХ-ын гишүүд, аймгийн удирдлагууд, Засгийн газрын гишүүд уламжилсан. Энэ хүрээнд дөрөвдүгээр сарын 11-ний өдөр энэхүү саналыг нэгтгэсэн Засгийн газрын хуралдааныг орон нутагт зохион байгууллаа.

Энэ үеэр Хангайн бүсийн хөгжлийн эрчимжүүлэх чиглэлээр Засгийн газрын тогтоолын төслийг баталсан.

         Хангайн бүсийг аялал жуулчлалын төрөлжсөн бүс болгон хөгжүүлэх чиглэлээр авч хэрэгжүүлэх арга хэмжээнүүдийг бид газар дээр нь шийдвэрлэсэн. Ингэхдээ Хангайн бүсийн аялал жуулчлалын салбарын бичил жижиг аж ахуй нэгж байгууллагыг дэмжих хөгжлийн гүүр төслийг хэрэгжүүлэх дээр тогтсон. Мөн бүсийн нутаг дэвсгэрт шилжилт, хувьслыг өндөр нарийвчлалтай тодорхойлох, цаг агаарын гамшигт үзэгдлийг урьдчилан илрүүлж мэдээлэх, эрт сэрэмжлүүлэг тогтолцоог бэхжүүлэх зорилгоор цаг уурын станц холбогдох байгууламжийг Өвөрхангай аймгийн Хархорум хотод байгуулахаар шийдвэрлэсэн.

УИХ-аас баталсан Хархорум хотын бүтээн байгуулалт, хөгжлийг дэмжих тухай хуулийн хүрээнд Хархорум хотын хөгжлийн ерөнхий төлөвлөгөөг Засгийн газар зөвшөөрөөд, Хотын зөвлөлийг баталсан.

         Энэ хүрээнд Ерөнхий сайд мөн тус хотын хөгжил, бүтээн байгуулалтыг дэмжих чиглэлээр Хархорум хотод ажилласан. Цаашлаад, Шивээхүрэн чиглэлийн 1073.179 км авто зам, Гурванбулаг, Элсэн тасархайн 53 км авто зам, Богд сум, Шивээхүрэн боомт чиглэлийн 224.6 км авто замын зураг төслийг боловсруулахад шаардагдах хөрөнгийг Засгийн газрын нөөц хөрөнгөөс шийдвэрлэлээ. Мөн Монголын төр, шашин, соёл урлагийн нэрт зүтгэлтэн өндөр гэгээн Г.Занабазарын мэндэлсэн 390 жилийн ойг 2025 онд тэмдэглэн өнгөрүүлэхтэй холбогдуулан шаардагдах хөрөнгийг Засгийн газрын нөөц хөрөнгөөс шийдвэрлэсэн. Тус Ажлын хэсгийг Хууль зүй, дотоод хэргийн сайд О.Алтангэрэл ахлан ажиллаж байна. Мөн Хангайн бүсийн хөгжлийг эрчимжүүлэх чиглэлээр Байдрагийн усан цахилгаан станцын төслийн байгаль орчны нарийвчилсан үнэлгээг хийх асуудлыг Засгийн газар шийдвэрлэсэн. 

Түүнчлэн Өвөрхангай аймгийн Богд сумаас Өмнөговь аймгийн Гурвантэс сум чиглэлийн авто зам, Баянхонгор аймгийн Баянхонгор сум, Архангай аймгийн Булган сум чиглэлийн авто зам, Арвайхээр, Тарагт, Уянга сум чиглэлийн авто замын төслийн техник, эдийн засгийн үндэслэлийг боловсруулахад шаардлагатай санхүүжилт, Өвөрхангай аймгийн Арвайхээр, Мандалговь, Чойр чиглэлийн хэвтээ тэнхлэгийн замаас Мандал-Овоо хүртэлх авто замын төслийн санхүүжилтийг ирэх оны төсөвт суулгахыг Сангийн сайдад даалгалаа. Архангай аймгийн Цэнхэр суманд байрлах Цэнхэрийн рашаан орчмын амралтын газар, Баянхонгор аймгийн Баянлиг сум, Баянхонгор сумын Шаргалжуут тосгонд цэвэр, бохир усны нэгдсэн шугам, цэвэрлэх байгууламжийг шинээр барих, Булган аймгийн Рашаант сум, Өвөрхангай аймгийн Хархорин сумын цэвэрлэх байгууламжийн өргөтгөлийн техник, эдийн засгийн үндэслэлийг боловсруулж, батлуулах ажлыг Эдийн засаг, хөгжлийн яаманд хариуцуулж, тус яамнаас зураг, төсөл, шаардлагатай санхүүжилтийг шийдвэрлэж ажиллана" гэв.