Засгийн газрын ээлжит хуралдаан өнөөдөр боллоо. Энэ үеэр Засгийн газрын Хэрэг эрхлэх газрын дарга Н.Учрал Х.Баттулга гишүүнийг Төгрөг нуурын ордыг зарсан гэдгийг баримтаар нотолж буйгаа мэдээлсэн. Түүний мэдээллээс онцлох хэсгүүдийг хүргэж байна.

• Х.Баттулга гишүүнийг Төгрөг нуурын ордыг зарсан гэх хөдлөшгүй 507 баримт надад байна.

• Албан ёсны баталгаатай эх сурвалж байна.

• Санхүүгийн болон хуулийн мэргэжилтнүүдийн дүн шинжилгээ байна.

• Баримт өөрөө ярьдаг гэх үг бий.

• Тус 507 нүүр баримтад, 2006 онд УИХ-ын гишүүн Х.Баттулга 90 хувийг нь, Я.Батсүх гэдэг иргэн 10 хувийг нь эзэмшиж байсан, анх хамтран үүсгэн байгуулсан CAMEX гэх компани "Төгрөг нуур энержи" компанийг 100 хувь эзэмшдэг болохыг нотолсон баримт байна.

• Х.Баттулга өөрийн охин Б.Намуун, төрсөн эгч Х.Цэндбаяр нарт хувьцаагаа шилжүүлэн компаниас компани дамнасан, офшороос офшорт үргэлжилсэн хэлхээ холбоо бүхий үндэстэн дамнасан компаниудаар дамжуулан 250 сая ам.доллараар зарсан тухай ч байна.

• Мөн тус баримт дотор энэ хэлцлийн нөхцөл, үнэлгээ, төлбөрийн бүтцүүд, хувьцаа, өрийн бичиг, хөрвөх цаас, эзэмшигчдийн бүтцийн өөрчлөлт, Төгрөг нуурын ордын бүтцийн тооцоо, техник, эдийн засгийн үндэслэл зэрэг мэдээллийг нарийвчлан агуулсан байна.

• Сингапурт бүртгэлтэй “CAMEX” ХХК- ийн охин компани нь 2009 оны дөрөвдүгээр сард Монгол Улсын Зам тээвэр, барилга хот байгуулалтын яамтай Монгол Улсад уул уурхайн лицензийг олгож оронд нь дэд бүтэц байгуулж, орон сууцжуулах талаар байгуулсан санамж бичиг ч байна. Энэ нь 2009 онд УИХ-ын гишүүн Х.Баттулга тухайн үед Зам тээвэр, барилга хот байгуулалтын сайд байхдаа өөрийн компанидаа, өөрөө сайд байхдаа, өөрөө өөртэйгээ гэрээ байгуулсан баримт юм.

• Х.Баттулгын 90 хувийг нь эзэмшдэг CAMEX ХХК Сингапурт бүртгэлтэй компани руу 100 хувь шилжсэн. Тухайн компанийн хувьцаа эзэмшигч нь түүний төрсөн охин Б.Намуун, хамтран бизнес эрхэлж байсан Билли Лимийн Лим Сеон нар болохыг баталсан лавлагаа ч мөн баримт дотор байна.

• 2010 онд 250 сая ам.доллараар зарагдсан компанийн хувьцааг Монгол Улсад бүртгэлтэй компанид зургаан жилийн дараа огт үнэ төлбөргүйгээр шилжүүлсэн болохыг Засгийн газрын Хэрэг эрхлэх газрын даргын хувиар Улсын бүртгэлийн байгууллагаас албан журмаар авсан.

• Хонконг дахь компанип шилжиж ирэхдээ 250 биш 200 мянган ам.доллараар зарагдсан гэх үг байдаг.

• “Төгрөг нуурын энержи” компанийн “CAMEX” ХХК нь татвар төлөхөөс зайлсхийсэн, мөнгө угаасан, залилсан,  авлига, ашиг сонирхлын зөрчил үүсгэх болон бусад гэмт хэрэг зөрчил үүссэн байж болзошгүй асуудлыг шалгуулахаар Улсын Ерөнхий прокурор, Авлигатай тэмцэх газарт эдгээр материалуудыг хүргүүлж байна.

• Энэ талаар мөн мэдээлэл солилцох, эрх зүйн туслалцаа харилцан үзүүлэх чиглэлээр Их британийн арлууд, БНХАУ-ын засаг захиргааны онцгой бүс Хонконг, БНСУ зэрэг улсын хууль хяналтын байгууллагатай хамтран ажиллаж, шаардлагатай нэмэлт материал, нотлох баримтыг авахыг Хууль зүй, дотоод хэргийн сайд О.Алтангэрэлд даалгаж байна.

• Мөн Төгрөг нуурын ордыг стратегийн ордод авах ажлыг санхүүгийн болон хуулийн шинжилгээний багийн тусламжтайгаар Баялгийн санд авахыг Аж үйлдвэр, эрдэс баялагийн сайд Ц.Туваанд даалгасан.