Засгийн газрын өнөөдрийн хуралдаанаас гаргасан шийдвэрийг танилцууллаа.

          Энэ үеэр Засгийн газрын Хэрэг эрхлэх газрын дарга Н.Учрал "Х.Баттулга гишүүнд Төгрөг нуурыг зарсан асуудлаа шийдэх долоо хоногийн хугацааг олгосон. Энэ хугацаанд Х.Баттулга гишүүнээс ямар нэгэн бичиг ирээгүй, ямар нэгэн үйлдэл хийгээгүй. Засгийн газарт ямар нэгэн мэдээллийг ирүүлээгүй. Өчигдөр хэвлэл мэдээлэлд ярилцлагадаа Төгрөг нууртай хамааралтай эсэх талаараа тодорхой хариу өгөөгүй гэж ойлгож байна. Харин хэвлэлд өгсөн ярицлагадаа "Төгрөг нуурын ордыг минийх гэж нотолж чадах юм бол зуун хувь аваарай" гэдэг үгийг хэлсэн байна. Би өнөөдөр бас хариуцлагатайгаар хэлье. Та хэлсэн үгэндээ эзэн байгаарай. Та нотол гэсэн. Би нотолж байна. Надад хөдлөшгүй нотлох баримтууд байна. Хоёрдугаарт, албан ёсны баталгаатай эх сурвалж байна. Гуравдугаарт, санхүүгийн болон хуулийн мэргэжилтнүүдийн дүн шинжилгээ байна. Баримт өөрөө ярьдаг гэдэг үг бий. Энэ материал дунд 2006 онд УИХ-ын гишүүн Х.Баттулга 90 хувийг нь, Я.Батсүх гэдэг иргэн 10 хувийг нь эзэмшиж байсан, анх хамтран үүсгэн байгуулсан CAMEX гэх компани "Төгрөг нуур энержи" компанийг 100 хувь эзэмшдэг болохыг нотолсон баримт энд байна. Үүний дараа Х.Баттулга өөрийн охин Б.Намуун, төрсөн эгч Х.Цэндбаяр нарт хувьцаагаа шилжүүлэн компаниас компани дамнасан, офшороос офшорт үргэлжилсэн хэлхээ холбоо бүхий үндэстэн дамнасан компаниудаар дамжуулан 250 сая ам.доллараар зарсныг Хонконгийн хөрөнгийн биржид бүртгэлтэй 00402 хувьцааны код бүхий компанийн Хонконгийн бирж дээр байгаа 507 нүүр баримт мэдээлэл байна. Энэ нь компанийг худалдан авах албан ёсны мэдэгдэл бөгөөд энэхүү баримт дотор энэ хэлцлийн нөхцөл, үнэлгээ, төлбөрийн бүтцүүд, хувьцаа, өрийн бичиг, хөрвөх цаас, эзэмшигчдийн бүтцийн өөрчлөлт, Төгрөг нуурын ордын бүтцийн тооцоо, техник, эдийн засгийн үндэслэл зэрэг мэдээллийг нарийвчлан агуулсан нотлох баримт гэж хэлж болно. Мөн 507 нүүр баримт дотор Сингапурт бүртгэлтэй CAMEX-ийн охин компани нь 2009 оны дөрөвдүгээр сард Монгол Улсын Зам тээвэр, барилга хот байгуулалтын яамтай Монгол Улсад уул уурхайн лицензийг олгож оронд нь дэд бүтэц байгуулж, орон сууцжуулах талаар байгуулсан санамж бичиг байгааг эндээс харж болох юм. Энэхүү санамж бичиг нь 2009 онд УИХ-ын гишүүн Х.Баттулга тухайн үед Зам тээвэр, барилга хот байгуулалтын сайд байхдаа өөрийн компанидаа, өөрөө сайд байхдаа, өөрөө өөртэйгээ гэрээ байгуулсан баримт юм" гэв.