МАН-ын Удирдах зөвлөл өнөөдөр Төрийн ордонд хуралдлаа. Энэ үеэр намын гишүүд болох  Б.Саранчимэг, Б.Баярсайхан, Д.Сарангэрэл, Ц.Мөнхцэцэг,  Г.Золзаяа нарыг намынхаа Удирдах зөвлөлийн гишүүнээс чөлөөллөө.

       Энэ талаар МАН-ын Нарийн бичгийн дарга А.Ариунзаяа "МАН-ын Удирдах зөвлөл өнөөдөр хуралдаж дөрвөн асуудал хэлэлцлээ. Нэгдүгээрт, манай удирдах зөвлөлийн гишүүдээс төрийн албанд шилжих, өөрсдөө намаасаа түдгэлзэх албан тушаалд шилжиж байгаа хүмүүсийн асуудлыг өөрсдийн хүсэлтээр намын Удирдах зөвлөлийн гишүүнээс чөлөөлсөн. Ингэхдээ нөхөж орж ирж байгаа хүмүүсийн асуудал огт яригдаагүй. Мөн Улс төрийн намын тухай хууль хэрэгжиж байгаа. Энэ онд улс төрийн намууд бүтэц, зохион байгуулалт, дүрэм гэхчлэн хурлуудаа зохион байгуулах ёстой. Энэ хүрээнд хурлынхаа бэлтгэл ажлыг хангах Ажлын хэсэг байгуулах зэрэг асуудлыг хэлэлцсэн. Түүнчлэн намын дэргэд Улс төрийн намын тухай хуулиараа судалгааны байгууллага байгаа. Энэхүү судалгааны байгууллагын захирлыг шинээр томилсон. Санхүүгийн нөхцөл байдлаа мөн баталж, дотоод аудитаа томилсон шийдвэрийг гаргалаа" гэв.

        Тэрбээр мөн "УИХ-ын гишүүн асан Б.Баярсайханы хувьд Гэр бүл, хүүхэд, залуучуудын хөгжлийн газрын даргаар, Г.Золзаяа Манжуурын Консулын газарт, Ц.Мөнхцэцэг, Д.Сарангэрэл, Б.Саранчимэг нар гадаадад бас элчин зөвлөхөөр томилогдож байгаа" гэдгийг хэлсэн юм.