УИХ-ын ээлжит чуулганаар Авлигатай тэмцэх газрын дарга З.Дашдавааг улираан томилох асуудлыг хэлэлцэж, дахин томилсон. Энэ үеэр УИХ-ын гишүүн Л.Энхнасан АТГ-ын дарга З.Дашдаваагаас асуулт асууж, хариулт авлаа.

       Тэрбээр “Авлигатай тэмцэх байгууллагын нэг мөрдөн байцаагч 200 мянган хавтас хэрэг бүрдүүлж нүсэр ажил болдог.  Гэтэл шүүх дээр очихоороо 60 орчим хувь нь хэрэгсэхгүй болгодог. Тэгэхээр энэ яагаад ийм болж байна вэ. Нэгдүгээрт, прокурорын мэргэжлийн ур чадвар муу байна уу. Эсвэл танай боосон хэргийг улсын яллагч тааруу харж шийдэж байна уу. Эсвэл хууль тогтоомжийн зохицуулалт муу байна уу. Үгүй бол хэрэглэгчдийн ойлгомжгүй байдлаас болж байна уу. Ер нь шүүхийн хараат бус байдал энд алдагдаад байна уу. Та ерөнхий прокурортойгоо цаашид яаж хамтран ажиллая гэж бодож байна. Үүн дээрээ анхаарч ажиллана уу гэж хүсэж байна” гэв.

         Түүний асуултад Авлигатай тэмцэх газрын дарга З.Дашдаваа “Авлига, албан тушаалын гэмт хэрэг өөрөө нэлээд ажиллагаа их шаарддаг. Гадаад, дотоодын эрх зүйн туслалцаа харилцаа, нотлох баримт бүрдүүлэх, цуглуулах үйл ажиллагаа гээд олон ажил бий. Үүн дээр бид прокурорын байгууллагатай нягт хамтран ажилладаг. Өнөөдөр манай байгууллагын Мөрдөн байцаах албыг Нийслэлийн прокурорын газрын нэгдүгээр хэлтэс хариуцан хяналт тавьж ажилладаг. Ерөнхийдөө тухайн хэлтсийн прокурорууд тодорхой хэмжээгээр авлига, албан тушаалын гэмт хэргийг мөрдөх, хянах чиглэлийн хүмүүс.Тэгэхээр хэргүүд шүүх дээр очоод цагаадах асуудал харьцангуй бага. Мэдээж ганц нэг тохиолдол бий. Энэ асуудалд прокурор, мөрдөх байгууллагууд бололцооны хэрээр мөрдөж, нотолж шүүхэд өгч байгаа” гэсэн юм.