УИХ-ын гишүүн Б.Энхбаяр "С.Батдөлийг амралтад амрааж байгаа хүн Сангийн сайд" гэж мэдээлсэн. Тэгвэл энэ асуудалд Сангийн сайд Б.Жавхлан “Хууль зүйн байнгын хороон дээр ярьж байсныг нь сонссон. Арай намайг хэлж байгаа гэж бодоогүй. Б.Энхбаяртай Засгийн газарт хамт ажиллаж байсан. Засгийн газарт ажиллаж зовлон, жаргалыг сайн мэддэг хүн. Гэтэл ийм зүйл ярьж байгаад маш харамсалтай байна. Юунд ингээд хорсоод байдгийг нь гайхдаг. Сэдэв бүр дээр над руу дайрдаг. Миний хувьд хүлээцтэй харж байгаа. Хүний тэвчээр харин хязгаарт байгаа шүү гэдгийг хэлье. Төсвийн ерөнхийлөн захирагч байсан хүн. Өөрийнх нь харьяа байгууллагын төсвийг ярьж байх шиг байна. Хэд дахин нэмэгдсэн тоог нь мэдэхгүй байна. Харьяа байгууллагынх нь төсөв нэмэгдээд үйл ажиллагаа нь чанаржиж байвал сайн л биз. С.Батдөл бол Дарханы залуу. Аав, ээжийг нь ч би танина. Тэрнээс болж тэр асуудалтай намайг холбож намайг буруутгаж, хар буруу юм наах гэж байгаа бол амжихгүй шүү. Би тэр залуутай огт холбоо сүлбээ байхгүй гэдгийг онцолж хэлье” гэлээ.