Б.ЖАВХЛАН: Монгол Улсын валютын нөөц таван тэрбум ам.доллар хүрлээ

2025-04-02, 765

Монгол Улсын засгийн газрын өнөөдрийн хуралдаанаас гарсан шийдвэрийг танилцууллаа.

Энэ үеэр Сангийн сайд Б.Жавхлан "Өнөөдөр экспортыг дэмжих, валютын нөөцийг нэмэгдүүлэх ажлын хэсгийн ээлжит танилцуулгаа хийлээ. Экспортыг нэмэгдүүлэхийн эцсийн зорилго нь валютын нөөцийг нэмэгдүүлэх юм. Засгийн газрын дан нөөц, Монголбанкны дан нөөц гэж байхгүй, валютын нөөц л гэж бий. Тиймээс бүх талууд үүнд өндөр ач холбогдол өгч ажиллаж байгаа. Мөн Санхүүгийн тогтвортой байдлын зөвлөл долоо хоног бүрийн мягмар гаригт хуралдаж байна. Валютын нөөцийг нэмэгдүүлэх ажлыг экспортыг нэмэгдүүлэх буюу биет хэмжээг нэмэгдүүлэх, санхүүгийн зах зээл дээрх нөөц бололцоогоо дайчилж энэ чиглэлээр ажиллана. Банкуудын хувьд бэлэн байгаа нөөц, шинээр хөрөнгө оруулалт, хөрөнгийн зах зээл дээр хөрөнгө босгох ямар боломж байна вэ, Засгийн газрын ямар дэмжлэг байна зэрэг асуудлыг ярилцлаа. Өнгөрсөн хугацаанд манай экспортын бүтээгдэхүүнийг худалдан авагч талуудтай уулзаж, шинээр гарсан шийдвэрүүдээ танилцуулж, мэдээлэл өгч ажиллаж өчигдрийн байдлаар Монгол Улсын валютын нөөц таван тэрбум ам.долларт хүрлээ. Валютын нөөц гурав дахь удаагаа таван тэрбумд хүрч байна. Гуравдугаар сарын 31-ний байдлаар нүүрсний экспортын биет хэмжээ буураагүй ч үнийн хувьд цохилт авсан ч зэсийн экспорт сайн байлаа. Алтны үнэ түүхэн дээд хэмжээнд хүрсэн нь эерэг үр дүн авчирна. Хоёрдугаар улирлын хувьд эдийн засгийн идэвхжлийн үе байдаг. Гурав, дөрөв, тав, зургадугаар сард бүтээн байгуулалтын ажил эхэлдэг. Иймд бид шууд төлөвлөж болох Засгийн газрын хөрөнгө оруулалтад онцгой анхаарч ажиллаж, ийм горимд шилжин ажиллаж байгааг дуулгая" гэв.

Б.ЖАВХЛАН: Монгол Улсын валютын нөөц таван тэрбум ам.доллар хүрлээ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.