П.НАРАНБАЯР: 2026 оныг Боловсролыг дэмжих жил болгох хүрээнд зургаан ажил хийнэ

2025-04-02, 437

2026 оныг Боловсролыг дэмжих жил болгон зарласнаар зургаан бүлэг ажил хийхээр төлөвлөжээ. Энэ талаар Боловсролын сайд П.Наранбаяр мэдээлэл өглөө.

Тэрбээр "2026 оныг Боловсролын жил болгосноор зургаан шинэчлэлийг төгөлдөршүүлнэ. Хөтөлбөрийн шинэчлэл, үр дүнд суурилсан санхүүжилтийн шинэчлэл, цахим шинэчлэл, багшийн гурван тулгуурт багшийг дэмжих бодлогын шинэчлэл зэрэг шинэчлэлийг хийж, төгөлдөршүүлнэ. Хамгийн гол нь ерөнхий боловсролын сургууль, цэцэрлэгийн хүртээмжийг нэмэгдүүлэхэд чиглэсэн хөрөнгө оруулалтууд хийгдэнэ. Бидний гаргасан тооцоогоор 2030 он гэхэд Монгол улс даяар 88 мянган хүүхдээр ЕБС-ийн сурагчийн тоо нэмэгдэнэ. Энэ хүүхдүүдэд зориулсан ерөнхий боловсролын 108 сургууль, 95 цэцэрлэг хэрэгтэй байгаа. Энэ бүх өгөгдөл, хүн амын нягтаршлын талаарх биг дата, хүнээс үл хамаарсан программд оруулаад байршуулсан. Энд үндэслэн төсвүүд тавигдана. Багшийн дутагдлаас гарах, багшийг хөгжүүлэх чиглэлд хөрөнгө оруулалт, төсөв хуваарилагддаг болно. Боловсролыг дэмжих жилийн гол бодлого хүний нөөцийн бодлоготой шууд уялдана. Өнөөдөр Монгол Улс хүний нөөцийн ноцтой дутагдалд орсон байна. Энэ хүний нөөцийн дутагдлаас гарахад боловсролын шинэчлэл чиглэгдэнэ. Бид хүний нөөцийг нэмэгдүүлэх дунд хугацааны стратеги боловсруулж, Гэр бүл, хөдөлмөр, нийгмийн хамгааллын яамтай хамтран ажиллана. Боловсролыг дэмжих жил Монгол Улсын ирээдүйг дэмжих жил юм. Мөн эдийн засгийг өөрийг нь, салбар дундын уялдаа холбоог хангах, салбаруудын үзүүлэлт, чадавхыг сайжруулах чиглэсэн үндсэн суурь шинэчлэлийн жил байх болно" гэлээ.

П.НАРАНБАЯР: 2026 оныг Боловсролыг дэмжих жил болгох хүрээнд зургаан ажил хийнэ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.