МАН-ынхан цус сэлбэж, төрийн өмчит компаниудад салхи оруулахаар хэд хэдэн шийдвэр гаргасан. Авлига, албан тушаалын хэрэгт холбогдож байгаагүй шинэ үеийн залуусыг газар, хэлтсийн даргаар томилж, тэр бүү хэл үйлдвэрийн захирал ч болгож байна. Учир нь, төрд бугшсан, олон жил даргын суудал эзэлсэн хууччуулаас нь ард түмэн залхсан. Ингээд шинэ бодлого баримталж, шинэ үеийн залуусыг түүчээлж томилж байгаа хэрэг. Энэ нь ч ард түмэнд таалагдаж байгаа. Гэхдээ харамсалтай нь, Төрийн өмчит компаниуд нь төрийн эсрэг ажлаад эхэлсэн бололтой.

      Өнгөрсөн долдугаар сард шинэ Засгийн газар бүрдэж, хамгийн түрүүнд “Дарханы төмөрлөгийн үйлдвэр”-ийн захирлаар Б.Чагнаадоржийг томилсон байдаг. Б.Чагнаадоржийн хувьд “Монголын Цахилгаан Холбоо” ХК-ийн дэд захирал, ”Эрдэнэс Монгол” ХХК-ийн санхүүгийн газрын захирал болон “Монголросцветмет” ТӨҮГ-ын харъяа үйлдвэрийн газарт захирлаар ажиллаж байгаад “Эрдэнэс Монгол” нэгдлийн хүрээнд шилжин томилогдсон байдаг. Ингээд “Дарханы төмөрлөгийн үйлдвэр”-ийн захирлаар ажиллаад есөн сар болж байна.

     Тэгвэл “Эрдэнэс монгол” нэгдлийнхэн авлига, албан тушаалын хэрэгт холбогдож, хууль хяналтын байгууллагынханд ээрэгдэж явсан эрхмүүдтэй гар бариад эхэлжээ. Тодруулбал, “Дарханы төмөрлөгийн үйлдвэр”-ийн Б.Чагнаадоржийг “Монголросцветмет” ТӨҮГ-ын захирал асан До.Ганболдтой хоршуулж ажиллуулахаар болсон байна. Өөрөөр хэлбэл, Б.Чагнаадорж “Дарханы төмөрлөгийн үйлдвэр”-ийг удирдаж, зэргэлдээ талд До.Ганболд “Эрдэнэс Үйлдвэрлэл, Технологийн Парк” ХХК-ийг удирдахаар болжээ. Хамгийн хоржоонтой нь, энэ шийдвэр Б.Чагнаадоржийн ятгалгаар ч явагдсан байж болзошгүй гэнэ. Учир нь, дээрх хоёр компани нь “Эрдэнэс монгол”-ын охин компани билээ.

 Эрх баригчид нь авлига албан тушаалын хэрэгт холбогдсон этгээдүүдийг төрд ажиллуулахгүй, түмний төлөө зүтгүүлэхгүй гэж үзэж байхад бодлого биелүүлэгчид нь намын бодлогынхоо эсрэг ажиллахаар зэхэж байгаад учир мэдэх хүмүүс бухимдалтай байгаа ажээ.

      Тодруулбал, “Монголросцветмет” ТӨҮГ-ын захирал асан До.Ганболд нь 2017 оноос АТГ-т ээрэгдсэн. Бүр тодруулбал, 2017 оны арванхоёрдугаар сарын 7-8-нд шилжих шөнө АТГ-ынхан гүйцэтгэх ажиллагаа явуулж, түүнийг болоод 10 гаруй хүнийг Эрүүгийн хэрэгт холбогдуулан саатуулсан байдаг. Үндэсний аудитын газар 2017 оны гуравдугаар сард “Монголросцветмет”-д аудитын шалгалт хийж, 78 тэрбум төгрөгийн зөрчил илрүүлснээр түүнийг анх АТГ шалгаж эхэлсэн юм. До.Ганболд “Монголросцветмет” ТӨҮГ-ын захирлаар ажиллаж байхдаа гаднын аж ахуйн нэгж, байгууллагад жонш, хүдрийн баяжмалыг зах зээлийн үнээс бага үнээр нийлүүлсэн байж болзошгүй. Зарим компанид илт давуу байдал олгосон, үндэслэлгүйгээр хөрөнгөжсөн зэрэг хэргээр шалгагдаж эхэлсэн байдаг. Шалгалтын явцад өөрийн болон гэр бүлийнхээ гишүүдийн дансаар их хэмжээний валютын гүйлгээ хийсэн нь тодорхой болсон талаар тухайн үед хэвлэлүүд мэдээлж байлаа. 

            2017 оноос АТГ-т шалгагдаж, 2020 оноос хойш албан тушаалгүй, ажилгүй байсан До.Ганболд гэж хэн гэдгийг танилцуулъя. Үүнээс өмнө Б.Чагнаадорж, До.Ганболд нар эртний танилууд бөгөөд “Монголросцветмет” ТӨҮГ-ын тогооноос хамт хооллож явсан гэдгийг нь тодотгож хэлэх нь зүйтэй болов уу. Ийм ч учраас До.Ганболдтой хоршиж ажиллахаар санаархсан байж болзошгүй гэнэ.

Б.ЧАГНААДОРЖТОЙ ХОРШИЖ АЖИЛЛАХААР БОЛСОН ДО.ГАНБОЛД ГЭЖ ХЭН БЭ

      До.Ганболд нь 1963 оны аравдугаар сарын 15-нд Улаанбаатар хотод төрсөн бөгөөд 1987 онд Уралийн политехникийн дээд сургуулийг металлургийн инженер мэргэжлээр төгсчээ. 1987-1988 онд хилийн цэрэгт алба хааж, 1988-1990 онд уулын баяжуулах “Эрдэнэт үйлдвэр”-т ажиллаж байгаад, 1990 оны тавдугаар сараас Эрдэнэт дэх Ардчилсан намын зохицуулагч, 1990-1992 онд Монгол Улсын Бага хурлын гишүүнээр тус тус ажилласан. 1992 оноос Ардчилсан намын Ерөнхий нарийн бичгийн дарга, 1992 оны аравдугаар сараас тус намын Ерөнхий зөвлөлийн гишүүн болжээ. 1993-1996 онд хувийн бизнес эрхлэн, “Инч” компанийн захирал, 1996-2000 онд УИХ-ын гишүүн, 1998 оны арваннэгдүгээр сараас 2000 оны зургадугаар сар хүртэл УИХ-ын дэд даргаар ажиллаж байв. Мөн тэрбээр Монгол Улсын Цагаатгах ажлыг удирдан зохион байгуулах улсын комиссын даргаар 1998-2000 оны хооронд ажиллаж байсан. Харин 2015 онд “Монголросцветмет” ТӨҮГ-ын даргаар томилогдсон байдаг билээ.