Засгийн газрын ээлжит хуралдаан өнөөдөр боллоо.

      Энэ үеэр Засгийн газрын Хэрэг эрхлэх газрын дарга Н.Учрал "Хүнс, хөдөө аж ахуй, хөнгөн үйлдвэрийн салбарт Атрын IV аяныг эхлүүлэх шийдвэр гарлаа. Мөн Зөвшөөрөл олгох үйл ажиллагааг хөнгөвчлөх, цахим хэлбэрт шилжүүлэх, зарим захиргааны хэм хэмжээний актыг хуульд нийцүүлэх чиглэлээр авч хэрэгжүүлж байгаа арга хэмжээний талаар мөн танилцуулга хийж, өнгөрсөн хугацаанд авч хэрэгжүүлсэн арга хэмжээг, цаашид аль яам, агентлаг дээр үүсээд байгаа нөхцөл байдлыг хэрхэн шийдвэрлэх вэ гэх үүргийг өгсөн. Өнгөрсөн хугацаанд Зөвшөөрлийн хуулийн дагуу нийт 371 зөвшөөрөл байсан, Зөвшөөрлийн хуулийг давуулсан Засгийн газрын тогтоол шийдвэр, сайдуудын тушаал, захиргааны хэм хэмжээний актуудыг цуцлах ажил өрнөсний үндсэн дээр өнөөдрийн байдлаар 50 захиргааны хэм хэмжээний актыг бүрэн цуцалсан байгаа. Одоогийн байдлаар 170 зөвшөөрөл бүрэн цахимжсан. Төр өөрт байгаа мэдээллийг иргэнээсээ нэхдэг байдал анхан шатанд байгаад байна гэдгийг Засгийн газрын 1111 төв дээр ирсэн гомдлуудаас илт харагдаж байгаа. Тухайлбал, өнгөрсөн долоо хоногт 72 санал, гомдол ирэхэд, үүний 80 хувь нь зөвшөөрөлтэй холбоотой байсан. Бид "Хур" систем дээр төрийн мэдээлэл, солилцоог бүрэн хангуулж чадаж байгаа. Үүнийг та бүхэн "И-Монголиа" системээс харж байгаа. Гэтэл бодит байдал дээр үйлчилгээ авья гэхээр дахиад цаасаар нэхээд байдаг байдал үргэлжилсээр байна. Үүнийг шийдвэрлэх хүрээнд бид 170 зөвшөөрлийг бүрэн цахимжуулсан. Тэгэхээр Засгийн газар мэдээлэл солилцох асуудлаа бүрэн шийдвэрлэсэн. Одоо та нар иргэдээс бичиг баримт нэхэх, хүнд суртал үүсгэхээ болио гэх шаардлагын үндсэн дээр яамдуудад тухайлан үүргийг өгсөн. Энэ арга хэмжээг авч хэрэгжүүлэхгүй байгаа Яам, Тамгын газар, агентлаг, нийслэл, дүүргүүдэд холбогдох хариуцлагын арга хэмжээг шат дараатай авах шаардлагатай. Үүний цаана авлигатай тэмцэх бодлого, нээлттэй ил тод байдал агуулагддаг" гэв.