Хууль зүйн байнгын хорооны хуралдаан өнөөдөр боллоо. 

      Энэ үеэр Хууль зүй, дотоод хэргийн сайд О.Алтангэрэл "Прокурорын байгууллагаас 2025 оны гуравдугаар сарын 19,20,24-ний өдөр Эрүүгийн хэрэг хянан шийдвэрлэх тухай хуулийн 29.3.5 дахь хэсэгт заасны дагуу цагдаагийн байгууллагад шалгагдаж буй гомдол мэдээлэл, хэрэг бүртгэлийн дугаар хэрэгт олгосон нийт мэдээлэл өгөх зөвшөөрлийн хүрээнд та бүхэнд мэдээлэл өгч байна. Монгол Улсын нэр бүхий иргэд нь цахим орчинд ашиг олох зорилгоор покер платформ мэдээллийн технологи, бусдын арилжааны банкны дансыг ашиглан үр дүнг нь урьдчилан төсөөлөх боломжгүй аз туршсан мөрийтэй тоглоом тоглохыг иргэдэд сурталчлан зохион байгуулж, гэмт хэргийн замаар олсон хөрөнгийн эх үүсвэрийг нуун далдлах зорилгоор хөдлөх болон үл хөдлөх эд хөрөнгө худалдан авч, улмаар бизнесийн үйл ажиллагаа явуулсан мөнгө угаасан гэмт хэрэгт 2024 оны зургадугаар сарын 11-ний өдөр хэрэг бүртгэлийн хэрэг нээж, мөрдөн шалгах ажиллагаа явуулж байна. Мөрдөн шалгах ажиллагаагаар Ноорог.мн сайтад ажилладаг нэг иргэний арилжааны банкны дансуудаар мөрийтэй тоглоом зохион байгуулах гэмт хэрэг үйлдэж 85544 удаагийн үйлдлээр нийт 9.2 тэрбум төгрөгийн, 9430 ам.долларын нийт 9.3 тэрбум төгрөгийн гүйлгээ хийсэн тус тус нөхцөл байдал урьдчилан тогтоогдсон байна. Цаашид мөрдөн шалгах ажиллагааг үргэлжлүүлэн явуулж байна. Цагдаагийн байгууллагын 102 тусгай дугаарын утсанд 2024 оны есдүгээр сарын 6-ны өдөр эмэгтэй хүн гэртээ боомилсон байна гэх дуудлага мэдээлэл ирүүлснийг хүлээн авч, Чингэлтэй дүүргийн цагдаагийн газрын нэгдүгээр хэлтсээс 2024 оны есдүгээр сарын 26-ны өдөр хэрэг бүртгэлийн хэрэг нээж, мөрдөн шалгах ажиллагаа явуулж байна. Мөрдөн шалгах ажиллагааны явцад амь хохирогчийн хамтран амьдрагчид холбогдогдуулан Эрүүгийн хуулийн тусгай ангийн 10.4 дүгээр зүйлийн 1 дэх хэсэгт зааснаар мөрдөн шалгах ажиллагааг үргэлжлүүлэн явуулж байна" гэв.