Хууль зүйн байнгын хорооны хурал өнөөдөр боллоо. Энэ үеэр тус хорооны дарга Д.Цогтбаатар "Өнөөдөр хэлэлцэх зургаан асуудал байгаа.

• Монгол Улсын Үндсэн хуулийн цэцийн 2025 оны дүгнэлт,
• Үндсэн хуулийн цэцийн 2025 оны гуравдугаар дүгнэлт
• Хууль тогтоомжийн тухай нэмэлт өөрчлөлт оруулах тухай төсөл болон хамт өргөн мэдүүлсэн бусад хуулийн төсөл,
• Хүний эрх, эрх чөлөөг хангахтай холбоотой зарим хуульд нэмэлт өөрчлөлт оруулах тухай хуулийн төсөл болон хамт өргөн мэдүүлсэн бусад хуулийн төсөл,
• Эрүүгийн хэрэг хянан шийдвэрлэх тухай хуульд нэмэлт өөрчлөлт оруулах тухай хуулийн төсөл болон хамт өргөн мэдүүлсэн бусад хуулийн төсөл
• Сүүлийн өдрүүдэд үүсээд байгаа хэвлэн нийтлэх эрх чөлөөнд халдсан байж болзошгүй гэж үзэж байгаа асуудлын талаар Хууль зүй, дотоод хэргийн сайдын мэдээллийг сонсоно  гэсэн зургаан асуудал байна" гэв.​

  ​ Харин Хууль зүйн байнгын хорооны гишүүн Г.Дамдинням "Ноорог редакцын залуусын эрхэд халдаад байгаа юм шиг харагдаад байгаа боловч нийт Монголын ард түмний мэдэх эрх, эрх чөлөөгөө хамгаалах, чөлөөтэй ярих эрхэд халдаж байгаа асуудал. Өнөөдөр ч ялгаагүй хэлэлцэх асуудлын хамгийн сүүлд энэ асуудлыг оруулж байгаа нь дахиад л эрхийг нь зөрчиж байгаа хэрэг. Нэгэнт нийгмийн анхаарлын төвд байгаа, хүний эрхэд халдчихсан энэ асуудлыг жагсаалын эхэнд оруулчихмаар байгаа юм. Хүний эрхийн комисс процесийн алдаа гаргачихсан байна гээд дүгнэчихсэн байна. Хууль зүйн сайд нь ЦЕГ-ын Хэвлэл мэдээллийн албаны дарга шиг л прокурорын зөвшөөрөл авсан үгүй нь мэдэгдэхгүй байгаа нөхцөлд мөрдөн байцаалтаас мэдэж болох мэдээллийг тавиад дайрсан байна лээ. Үндсэний аюулгүй байдлаар яллана гэж хүүхдүүдээс баахан мэдүүлэг авсан байна. Дараа нь хүн амины хэрэгт холбох гэж үзээд, эцэст нь арай гэж байгууллагынх нь нэг хүн мөрийтэй тоглоом тоглосон хэрэгт ороод дуусаж байх шиг байна. Шөнө гүйцэтгэх ажиллагаа явуулаад хойшлуулшгүй арга хэмжээ авах зайлшгүй шаардлага үүсээгүй байхад хүүхдүүдийг байцааж болохгүй. Тиймээс хүний эрхийн асуудлыг хамгийн нэгдүгээр эгнээнд тавьж байгаад ярих хэрэгтэй. Хэвлэлийн эрх чөлөө бол монгол хүн бүрийн эрх чөлөө. Хэвлэн нийтлэх эрх чөлөө гэдэг бол хүн бүрийн эрх чөлөөг хамгаалах тухай асуудал. Үүнийг бид шөнө оройгоор хэлэлцэж болохгүй, нэгдүгээр эгнээнд нь оруулаад ярья" гэв.