УИХ дахь Ардчилсан намын бүлэг хуралдаж, Хууль зүй, дотоод хэргийн сайд О.Алтангэрэлээс “Ноорог” медиатай холбоотой асуудлаар тайлбар сонсож байна. Өнгөрсөн долоо хоногт цагдаагийн байгууллага “Ноорог” медиагийн уран бүтээлчдийг шөнө дөлөөр баривчилж, байцаалт аван, ажлын техник хэрэгслийг нь хураасан нь олон нийтийн дунд шүүмжлэл дагуулсан. Хэвлэлийнхэн болон иргэд үүнийг хэвлэлийн эрх чөлөөнд халдсан явдал гэж үзэж байгаа бол ХЗДХ-ийн сайд О.Алтангэрэл “Энэ ажиллагаа хууль зөрчөөгүй, прокурорын хяналт дор явагдсан” гэж мэдэгдсэн. Тус хуралдаанаар зөвхөн “Ноорог” медиатай холбоотой асуудал төдийгүй, Жагсаал цуглаан хийх эрхийн тухай хууль, Хүний эрх, эрх чөлөөг хангах зарим хуулийн өөрчлөлт, Хэвлэлийн эрх чөлөөний тухай хуулийн төслүүдийг ч хэлэлцэж байна. Хуульч мэргэжилтэй, 24 жилийн турш хууль зүйн салбарт ажиллаж буй О.Алтангэрэл өмнө нь авлига, албан тушаалын гэмт хэрэгтэй тэмцэх чиглэлээр идэвхтэй ажиллаж, хууль бус хөрөнгийг хураах тухай хуулийн төслийг санаачилж байсан нэгэн. Хуралдааны үр дүнд “Ноорог” медиатай холбоотой асуудлаар ямар байр суурь илэрхийлэх, цаашид ямар арга хэмжээ авах нь олон нийтийн анхаарлын төвд байна.

Х.Анар