Ерөнхий сайд Л.Оюун-Эрдэнийг огцруулах санал гаргах тухай УИХ-ын гишүүн Ч.Лодойсамбуу мэдээлэл өглөө.

Тэрбээр “Монгол Улсын Их хурлын дарга Д.Амарбаясгалан танаа. Монгол Улсын Үндсэн хуулийн 43 дугаар зүйлийн 43.1-т УИХ-ын гишүүдийн дөрвний нэгээс доошгүй нь Ерөнхий сайдыг огцруулах санал гаргавал УИХ гурав хоногийн дараа хэлэлцэж, 10 хоногийн дотор шийдвэрлэнэ. Монгол Улсын Их хурлын тухай хуулийн 8 дугаар зүйлийн 8.1.11-т Монгол Улсын Ерөнхий сайдыг огцруулах хүсэлтийг Үндсэн хуулийн 43.1-т заасны дагуу бусад гишүүнтэй хамтарч гаргахыг үндэслэн Ч.Лодойсамбуу миний бие болон бусад гишүүдийн хамтаар дараах үндэслэлээр Ерөнхий сайдыг огцруулах санал гаргаж байна. Нэгдүгээрт, хүний эрх, эрх чөлөө алдагдаж байна. Монгол Улсын Үндсэн хуулийн 16 дугаар зүйлд заасан баталгаатай эдлэх эрхийг хангах үүднээс хүүхдийн эрүүл мэнд, амийг хамгаалахын тулд өвлийн уралдааныг хориглох шийдвэрийг Монгол Улсын Дээд шүүх гаргасан атал түүнийг үгүйсгэсэн шийдвэрийг Засгийн газар гаргасан. Энэ нь амьд явах эрхийг үгүйсгэж, Улсын Дээд шүүхийн гаргасан шийдвэрийг үл тоосон шийдвэр юм. Ардчилсан тогтолцоо нь улс төр болон Иргэний эрхийн хүрээнд үзэл бодлоо илэрхийлсэн эрхийг шахан хавчих олон нийтийн сүлжээнд зохион байгуулалттай гутаан доромжлох, хуурамч мэдээлэл тараах зэрэг асуудлыг Засгийн газраас зохион байгуулж байгаа нь олон нийтэд ил болсон. Үүгээр зогсохгүй үзэл бодлоо илэрхийлсэн иргэдийн тухай хуурамч мэдээлэл тараах, бусдын нэр хүндэд халдах гэсэн үндэслэлээр Эрүүгийн хэрэгт татан тулгах, гэр бүл хамаарал бүхий этгээдэд Засгийн газрын харьяаны байгууллагын шалгалт оруулж, дарамт шахалт үзүүлэх зэрэг хууль бусаар үзэл бодлоо илэрхийлэх эрхийг нь хязгаарлах байдал даамжирсан. 

     Хоёрдугаарт, Засгийн газар гэмт хэргээс урьдчилан сэргийлэх хуулийн шаардлага хангах ажлыг зохион байгуулах, мөрдөн шалгах ажиллагааг хийх үүргээ биелүүлэхийн оронд шүүхээр тодорхой шийдвэр гаргуулах зорилгоор шүүхийн бие даасан байдалд удаа дараа халдаж, олон нийтийн шүүхэд итгэх итгэлийг сулруулах ажлыг зохион байгуулж байгаа нь засаглалын хямралд оруулж байна. 

     Засгийн газар, УИХ-аар хэлэлцүүлэх асуудлыг тооцоо судалгаагүйгээр яаралтай горимоор хэлэлцүүлж, Засгийн газрын өргөн барьсан хуулийн төслийн талаар өөр санал бодолтой байгааг гишүүд рүү илтэд дайрах, олон нийтийн мэдээллийн хэрэгсэл, олон нийтийн сүлжээнд гүтгэлэг дараах ажлыг удаа дараа зохион байгуулж байгаа нь УИХ-ын гишүүдийн бүрэн эрхэд халдаж байна. Монголын төр авлигад улам бүр идэгдэж, хамгийн хурдтай авлигажиж байгаа улсын нэгд тооцогдож байна.

      Эдийн засгийн бодлого алдагдаж, чөлөөт зах зээлийг боомилж байгаа талаар, Макро эдийн засгийн бодлогогүй, хэт үрэлгэн төсөв нь үнийн өсөлтийг гаруулж, ядуурлыг бууруулах боломжгүй болгож байна. Ажиллах хүчний нэгээхэн хэсгийг орлоготой байлгадаг жижиг дунд бизнес эрхлэгчдийг үйл ажиллагаа хумигдаж, багагүй хэсэг нь үүд хаалгаа барьж байна. Татварын бодлого оновчгүй болж байна. Ерөнхий сайд Л.Оюун-Эрдэнийн гаргасан бүх алдаатай бодлого, хариуцлагагүй байдлыг бүрэн илэрхийлэхгүй боловч Үндсэн хууль болон бусад хуульд заасан Ерөнхий сайдын үүргийг хэрэгжүүлэх чадваргүй гэдгийг нь нотлох баримт хангалттай байна. Тиймээс эрх зүйт ёсыг сэргээн тогтоох, нийгмийн тогтворгүй байдал үүсэхээс сэргийлэхийн тулд Ерөнхий сайд Л.Оюун-Эрдэнийг нэн яаралтай огцруулах нь зүйтэй гэж үзэж байна” хэмээх албан бичиг боловсруулсан. Зургаан иргэн угаартаж амиа алдсантай холбоотойгоор Ерөнхий сайдыг огцор гэж байгаа юм биш. Түүний Ерөнхий сайд болсноосоо хойш хэрэгжүүлж буй арга хэмжээ, дарангуйлалыг бага багаар тогтоож байгаа. Энэ бүхнийг нь иргэд шүүмжилж ирсэн. Төрийн өндөрлөгүүдэд хүний амь үнэтэй биш бол өөр юу үнэтэй вэ. Иргэдийн амиар улс төр хийдэг боллоо. Ерөнхий сайд нэг айлын зургаан иргэн угаартаж нас барчихаад байхад мэдээллийг нь хаах гэж оролдохынхоо оронд эмгэнэл илэрхийлэх хэрэгтэй байсан” гэв.