Угаартаж нас барсан зургаан иргэний талаар болон хохирогч хүүгийн эрхийг ноцтой зөрчсөн асуудалтай холбогдуулан ХЗДХ-ийн сайд О.Алтангэрэл мэдээлэл өглөө.

     Тэрбээр “Нэгдүгээр сарын 23-нд болсон үйл явдлын улмаас гэр бүлийн зургаан хүний амь эрсдэж, ар гэрийнхэнд нь нөхөж баршгүй хүнд гарз тохиосонд эмгэнэл илэрхийлж байна. Хилийн цэргийн 0184 дүгээр ангийн байлдагч О.Одбаяр нь албаа үлгэр жишээ хариуцлагатай хааж байсан. Тиймээс ХЗДХ-ын сайдын хувьд тус асуудалд онцгойлон анхаарч ажиллана. Нэгдүгээрт, зургаан иргэн угаартаж, амиа алдсан асуудалтай холбогдуулан ЦЕГ, АТГ-аас “Таван толгой түлш” ХК-ийн үе үеийн удирдлагуудад мөрдөн шалгах ажиллагаа явуулж байгаа. Мөн 29 нэр төрлийн бодис болон барьцалдуулагч бодист шинжилгээ хийнэ. Хоёрдугаарт, хохирогчдын эмзэг мэдээллийг харуулсан хувийн нууцтай холбоотой мэдээлэл цахим орчинд цацагдсан. Энэ нь зөвхөн хохирогчдын хувийн мэдээлэлтэй холбоотой асуудал биш. Монгол Улсын хувийн мэдээлэл хамгаалах тухай хууль болон Эрүүгийн тухай хуулийг зөрчсөн ноцтой гэмт хэрэг гарсан. Хувь хүний нууцад халдсан, задруулсан үйлдэл нь тав хүртэлх жилийн хорих ялтай, хүндрүүлэх бүрэлдэхүүнтэй гэмт хэрэг болдог. Хохирогчдын тухай зарим мэдээлэл нь цагдаагийн байгууллагад бүртгэгдээгүй байсан нь урьдчилсан байдлаар тогтоогдсон. Тиймээс тэдний тухай худал мэдээллийг зориудаар тараасан гэж үзэж байна.  Хууль зүйн сайдын хувьд дээрх хэргийг илрүүлэхийн төлөө ажиллаж байна. Харин хохирогч хүүг хууль сахиулах байгууллагын албан хаагчид хамгаална” гэв.