Монголчуудын хүнсний хэрэглээний сагсанд мах, махан бүтээгдэхүүн багагүй хувийг эзэлдэг. Тэр ч утгаараа инфляцид нөлөөлөгч гол нэрийн бүтээгдэхүүнд мах багтаж ирсэн. Тооцооллоос харахад нийслэлчүүдийн хүнсний хэрэгцээнд нөөцийн махыг 8000-12000 тонн бэлдэж ирсэн. Үүнээс 4000 тонн махыг нь нийслэлчүүд  хүнсэндээ хэрэглэж, үлдсэн мах нь товчхондоо наадмын хуушуур, бууз “болж” иржээ.

       Жил бүрийн долдугаар сард нөөцийн мах бэлтгэлийн ажлын даалгавар гарч, компаниуд гэрээ байгуулан банкнаас мөнгөө авдаг гэх. Үүний дараа буюу есдүгээр сард нөөцийн махны бэлтгэлийн ажил жинхэнэ утгаараа эхэлж иргэдийн өвлийн идэшний цагаас өмнө дуусдаг аж. Гэтэл өнгөрөгч онд Нийслэлийн Засаг дарга Х.Нямбаатарын багийнхан УИХ-ын сонгууль, орон нутгийн сонгуульд хэтэрхий их анхаарал тавьснаас болж нөөцийн мах бэлтгэлийн ажил оройтож эхэлсэн гэнэ.

            Үүнийг горыг нийслэлчүүд өнөөдөр амсаж махны тэнгэрт хаджээ. Учир юу гэхээр иргэдийн өвлийн идэш бэлдэх үед махны үнэ буурдаг бол эсрэгээрээ өнгөрсөн арваннэгдүгээр сард нэмэгдэж эхэлсэн. Хугацаа алдаж нөөцийн мах бэлтгэлийн ажлаа эхлүүлсэн нийслэлийнхэн иргэдийн идэшний цагаар давхцан мах бэлтгэл явуулж, махны салбарт мөнгө хаяж эхэлснээр эрэлт нэмэгдэж, үнэ хөөрөгджээ. Тиймээс хэзээний ашиг харж, ажиллаж сурсан ченжүүд үнээ нэмэх далим болж л дээ.

            Зах зээлд махны нийлүүлэлт бага байгаагаас шалтгаалан үнэ буурахгүй байгаа тул экспортын махыг тодорхой түвшинд хязгаарлан Улаанбаатар хотын иргэдийн хэрэгцээний махны бүрдүүлэлт гүйцсэн үед махны экспортын эрх нээгдэх юм байна. Тиймээс махны компаниуд “Нийслэлийнхэн бордюр сольж байхаар махаа бэлдэж байхгүй яав даа. Хэрэв тэд мах бэлтгэлдээ анхаарсан бол өнөөдөр бид экспортоо хийхэд асуудалгүй байх байсан” хэмээн халаглаж сууна.

            Нийслэлийн иргэдийн хүнсний хэрэгцээний махны нөөцөө яаралтай бүрдүүлж чадвал иргэд махтай, компаниуд экспорттой үлдэх нь дээ. Нээрээ л, бордюр сольж “галзуурч” байхаар махаа бэлдээд сууж байхгүй яав аа, Х.Нямбаатар дарга аа.