Одоогоос жилийн өмнө 2021 оны нэгдүгээр сарын 27-нд улс төрд шинэ салхи эргэж, Л.Оюун-Эрдэнээр ахлуулсан шинэ Засгийн газар бүрдэж байлаа. Цар тахлын амаргүй үе иргэдийн эрүүл мэнд эрсдэлд орж, эдийн засгаа аврах, алдахын эрмэг дээрх амаргүй цаг үе байсан. Үнэндээ Л.Оюун-Эрдэнийн Засгийн газрыг амь бөхтэй тэсэж үлдэх эсэхэд ч олон хүн эргэлзэж байсныг нуух юун.

ЗАСГИЙН ГАЗРЫН “БАЙ”-ГАА ОНОСОН БОДЛОГО

         Энэ үед Монгол Улсад цар тахлын тохиолдлын тоо өдрөөс өдөрт нэмэгдсэн, хаалттай хилтэй, хатуу хөл хориотой, хаагдсан бизнес орчинтой, эдийн засаг -4.6 хувь болж буурсан байв.  Хамгийн түрүүнд Засгийн газраас иргэдийнхээ эрүүл мэндийг хамгаалахын зэрэгцээ эдийн засгаа сэргээх бодлогыг хэрэгжүүлсний үр дүнд хүн амын зорилтот бүлгийн 90 хувийг вакцинжуулж, 40 мянган хүний амь насыг эрсдлээс хамгаалж, цар тахлыг хамгийн хохирол багатай буюу бусад орноос 1.3 жилийн өмнө амжилттай даван туулсан, хамгийн эрт хатуу хөл хориог цуцалсан дэлхийн улс орнуудын нэг болсон.

        Засгийн газраас Ковид-19 цар тахлын үед Эдийн засгаа сэргээх 10 их наяд төгрөгийн хөтөлбөрийг хэрэгжүүлсэн. Энэ хүрээнд ажлын байрыг дэмжих, pепо санхүүжилт, ипотек, хөдөө аж ахуйн зээл олгож, нийт 71,339 зээлдэгчид 5.7 их наяд төгрөгийн санхүүжилт олгосноор цар тахлын үед 100.0 мянга гаруй ажлын байрыг хамгаалсан. Цар тахлын үед ард иргэдийн эрүүл мэнд, амьжиргааг хамгаалах, эдийн засгийг сэргээхэд чиглэсэн цогц арга хэмжээг авч хэрэгжүүлсний үр дүнд 2020 онд 4.6 хувиар агшаад байсан эдийн засаг 2021 онд 1.6 хувиар, 2022 онд 5.0 хувиар, 2023 онд 7.4 хувиар тэлж, бодит ДНБ-ий хэмжээ 2023 онд цар тахлын өмнөх түвшинд хүрч, уул уурхай, тээвэр, худалдаа, үйлчилгээний салбаруудын үйл ажиллагаа тэлж, эдийн засгийн өсөлтөд эергээр нөлөөлжээ.

            Гэрээсээ ч гарч чадахгүй хаалттай хаалганы цаадах цаг үеийг монголчууд даван туулахад Засгийн газраас үзүүлсэн дэмжлэг “бай”-гаа онож, том дэмжлэг болж байлаа.

• Хатуу хол хорионы дэмжлэг болгож иргэн бүрд 300 мянган төгрөг олгоход нэг их наяд төгрөг
• Хүүхэд бүрд сар бүр олгож байсан 20 мянган төгрөгийг нэмэгдүүлж, 100 мянган төгрөг болгоход 3.6 их наяд төгрөг
• Тэтгэврийн доод хэмжээг 500 мянган төгрөг болгоход 630 тэрбум төгрөг
• Ажлын байрыг хадгалж, гурван хувь хүүтэй зээл олгоход 2.1 их наяд төгрөг зарцуулсан
• Ипотекийн зээлийн эргэн төлөлтийг хойшлуулалтад 63 мянган зээлдэгч хамрагдсан.
• Цахилгаан, дулаан, ус, сайжруулсан түлш, татвар, нийгмийн даатгалын шимтгэлийн хөнгөлөлт, чөлөөлөлтөд 5.3 их наяд төгрөг зарцуулсан нь аж ахуйн нэгжийг тэсэж үлдэх том боломж олгосон гэдэгтэй санал нийлэх хүн олон биз ээ.

Өнгөрсөн дөрвөн жилийн хугацаанд Л.Оюун-Эрдэнийн Засгийн газар чухам юуг амжуулсан бэ гэдгийг асуух хүн олон. Мэдэх эрх ч тэдэнд бий.

УЛС ТӨРД ЭХЛҮҮЛСЭН ШУДАРГА ЁСНЫ ТЭМЦЭЛЭЭС ХЭН ХОЖИВ

        Ерөнхий сайд Л.Оюун-Эрдэнийн Засгийн газар Шинэ Сэргэлтийн бодлогыг зарлаж, УИХ-аар батлуулсан. Шинэ сэргэлтийн бодлого нь “Алсын хараа-2050” урт хугацааны хөгжлийн бодлогыг хэрэгжүүлэх хүрээнд эхний 10 жилд хөгжлийг хязгаарлагч хүчин зүйлсүүдийг шийдвэрлэх, эдийн засгийн тусгаар тогтнол, бие даасан байдлыг хангах, боомт, эрчим хүч, аж үйлдвэржилт, хот хөдөөгийн тэнцвэрт хөгжил, ногоон хөгжил, төрийн бүтээмжийн сэргэлтийг хийх зорилт бүхий бодлого байв.

     “Шинэ сэргэлтийн бодлого”-ыг хэрэгжүүлснээр 2021 онд ДНБ 43.6 их наяд төгрөг байсан бол 2024 онд 82.4 их наяд төгрөг болсон. Нэг хүнд ногдох ДНБ 2021 онд 4,657 ам.доллар байсан бол 2024 онд 7,000 ам.доллар болсон. Экспортын орлого 9.2 тэрбум ам.доллар байсан бол 2024 онд 15.9 тэрбумам.доллар болсон. Төсвийн орлого 2021 онд 14.3 их наяд төгрөг байсан бол 2024 онд 31.3 их наяд төгрөг болж нэмэгдсэн зэрэг сайн үзүүлэлт гарсаар байна.

      Өнгөрсөн дөрвөн жилийн хугацаанд боомтын боомыг тайлж, эрчим хүчний реформ хийхээр болсон нь Засгийн газрын ололт байлаа. Угтаа бол Л.Оюун-Эрдэнийн Засгийн газар олон жил гацсан  мухар төмөр замыг гацаанаас гаргах яриа хэлэлцээрт хүрч, төмөр замын гацааг тайлав. Л.Оюун-Эрдэнийн улс төрд эхлүүлсэн соёл, шударга ёсны тэмцэл юунд хүргэсэн бэ.  Засгийн газар 2023 оныг “Авлигатай тэмцэх жил” болгон зарлаж, энэ хүрээнд авлигатай тэмцэх “5Ш” ажиллагааг зарлан хэрэгжүүлж, авлигыг таслан зогсоохоор өргөн хүрээнд ажиллаж эхэлсэн юм.  Тухайлбал, Хөгжлийн банкны хэрэг, “Нүүрсний хулгай”, төрийн тусгай сангуудын асуудлаар Засгийн газар өөрөө анх удаа шүгэл үлээж, хууль хяналтын байгууллага, олон нийтийн хяналтад оруулсан. 

         Л.Оюун-Эрдэнийн тэргүүлсэн Засгийн газрын нэг гол ажил нь авлигатай тэмцэх, шударга ёсны төлөөх тэмцэл байж ирсэн. Өнгөрсөн хугацаанд авлига, шударга ёсны төлөө 5Ш ажиллагаа хэрэгжүүлж, цахим ил тод байдлыг ханган, Эрдэнэтийн 49 хувь, Хөтөлийн цемент, Дарханы төмөрлөг, Дубайн гэрээ, Хөгжлийн банк, Тавантолгойн нүүрсний ордыг тойрсон хулгай луйврын схемийг илчилж, Төрийн хэмнэлтийн хууль, Авлигын ялын бодлогыг чангатгах зэрэг олон ажлыг хийж, зохих үр дүн гаргаад байна.

      Засгийн газрын авлигын эсрэг тэмцлийн хүрээнд Таван толгойн бүлэг ордыг үнэгүйдүүлсэн нүүрсний хулгайтай хийх тэмцлийг эрчимжүүлэн "Эрдэнэс Тавантолгой" компанид онцгой дэглэм тогтоож, боомтын хүчин чадлыг нэмэгдүүлж, биржийн худалдааг эхлүүлснээр Монгол Улс анх удаа Ковидын өмнөх үе буюу 2019 онд 36.6 сая тонн байсан үзүүлэлтээ ахиулж 2023 онд 69.6 сая тонн нүүрс экспортлосон.

       Засгийн газраас дефолтын эрсдэлд орсон "Хөгжлийн банкны чанаргүй зээлийн хэрэг"-ийг илчилж ил тод болгосноор Хөгжлийн банкны 1.8 их наяд төгрөгийн зээл эргэн төлөгдөж, Евро бондын 500 сая ам ам.доллар, Самурай бондын 200 сая ам.долларын өрийг Хөгжлийн банк өөрийн эх үүсвэрээр бүрэн төлж, Монгол Улс 12 жил үргэлжилсэн өрийн гинжин хэлхээнээс салсан тусгай сангуудыг нээлттэй болгож, Дубайн гэрээг цуцалсан. Оюутолгойн далд уурхай ашиглалтад орж, эдийн засагт эерэг үр дүн гарсан гэдгийг ч дурдах нь зүйтэй.

Ийн Л.Оюун-Эрдэнийн Засгийн газар дөрвөн жилийн ажлаа дүгнээд эхлүүлсэн ажлаа үргэлжүүлэхээр улс төрд том нүүдэл хийж байна. Үндсэндээ сонгуулийн тогтолцоонд өөрчлөлт оруулж, гишүүдийн тоог нэмсэн. Хамтарсан Засгийн газарт хүлээгдэж буй ажил ч олон байна.