Барилаа, хорилоо, зарлалаа, илрүүллээ. Байдаг л нэг өгүүлбэрийн төгсгөл шиг болжээ.

         Хууль хяналтын байгууллага хүчгүй байгаа юм уу, эсвэл төрийн өндөр албан тушаалтнууд нь худал мэдээлэл тараагаад байгаа юм уу, мэдэх юм алга. Зарлаад л байдаг, зарлаад л байдаг. Шийдэгдэж байгаа юм, шийдэж байгаа зүйл ч ховор болжээ. Ерөнхий сайд жагсаал, цуглаан санхжүүжүүлдэг зартай эрхмүүдийг хэдэн ч удаа зарлав. Хэсэг бужигнаж байгаад л сураг алдарч байна. Өчигдөр ахиад зарлалаа, хэсэг хугацааны дараа хэрхэхийг харах л үлдлээ. Тэгвэл бид жагсаал санхүүжүүлдэг гэх зартай муу нэртнүүдийг жагсааж байна.

ЗАРЛАЖ БАЙНА: ХӨХӨӨ ӨВЛИЙН ХҮЙТНИЙ ЖАГСААЛЫГ ХОРИХЫН УМГАР ӨРӨӨНӨӨС САНХҮҮЖҮҮЛСЭН ГЭХ Б.ГАНХУЯГ

            “Эрдэнэс тавантолгой”-н Б.Ганхуяг өнгөрсөн жилийн дуулиан байсан. Үнэндээ, нүүрсний хулгайн автор ч гэж хэлж болохоор эрхэм л дээ. Нүүрсний хулгайн хэргээр ял авч, улсад 9.9 тэрбум төгрөгийн хөрөнгөө хураалгасан 10 гаруй хүний “толгойлогч” нь гэсэн үг. Б.Ганхуягийг хоёр жилийн өмнө цагдан хорьж, сүр дуулиантайгаар шалгаж эхэлж байлаа. 40 их наядын нүүрсний хулгайн хэрэг илэрч, хулгайч нь Б.Ганхуяг болж хувирсан. Гэхдээ араасаа дагуултай, холбоо хамаарал бүхий бүлэглэлтэй байж таарна.

         Тэр үед төрийн ордныг тойрсон жагсаал болж, иргэд нүүрсний хулгайчдыг зарлахыг шаардаж байсан юм. Тэгвэл уг жагсаалыг Б.Ганхуягийг хорих ангийн умгар өрөөнөөс зохион байгуулж, хөхөө өвлийн цуглааныг санхүүжүүлж байна гэх яриа гарч байсан билээ. Бор шувууг Б.Ганхуягийн шүүх хурлын хэлэлцүүлгийн үеэр хэлсэн мэдүүлэг “баталж” орхисон. Тодруулбал, тэрбээр “Би хилс хэрэгт хэлмэгдэхгүй. Надад зургаан үйлдэл байгаа. Энэ зургаа бүгд хүн танилцуулсан асуудал. Нөгөө талаар Б.Ганхуяг намайг болон 11 хүн Б.Халиун /шүүгч/ таныг золиос болгочихлоо. Би энд золиослогдоод, тэд тэнд засагтайгаа тамгатайгаа, төртэйгөө үлдэж болохгүй. Дандаа нүүрсний хэрэг, гэхдээ ямар ч нүүрсгүй нүүрсний хэрэг. Би 2007 оноос энэ компанид ажиллаж байгаа. Надаас өөр нүүрс мэдэх хүн байхгүй. Надгүйгээр яагаад УИХ дээр нүүрсний хэргийг яриад байгаа юм. Намайг жагсаалаар оруулж ирсэн. Жагсаал гээд 68 хүн баригдсан. Одоо би гав ганцаараа есөн сар болж байна. Байлга, байлга. Би байж л байя” хэмээсэн юм.

    Гэхдээ Б.Ганхуягт жагсаалын гэх хэргээр ял оноогоогүй, нүүрсний хулгай, мөнгө угаалт, эрх мэдэл, албан тушаал, хахуулийн хэрэгт нь 3.9 жилийн хорих ял оноосон байдаг.

ЗАРЛАЖ БАЙНА: НҮЦГЭН ЖАГСААЛЫГ ХОЁР ТЭРБУМААР САНХҮҮЖҮҮЛСЭН ГЭХ “АЖНАЙ” Д.БАТ-ЭРДЭНЭ, Б.ХУРЦ

       Нүүрсний хулгайн жагсаал нэг сар орчим үргэлжилсэн. Нээлттэй сонсголын үеэр иргэд "Биднийг дотогш оруулсангүй. Төрийнхөн ард түмний дуу хоолойг сонссонгүй" гэх шалтгаанаар нүцгэн жагсаж байлаа. Жагсаалын улмаас гурван иргэн осгосон байдалтай эмнэлэгт хүргэгдэж, иргэдийг албадан тараасан байдаг. Харин энэ нүцгэн жагсаалын Гэвч нүцгэн жагсаалын Тагнуулын Ерөнхий газрын дарга асан Б.Хурц, УИХ-ын гишүүн асан “Ажнай” Д.Бат-Эрдэнэ нар хоёр тэрбум төгрөгөөр санхүүжүүлсэн гэх мэдээлэл гарч байсан. Мэдээлэл гараад зогсохгүй Б.Хурцаас тайлбар мэдүүлэг авч, цагдан хорих дээрээ тулж байлаа.

Хэвлэлээр бөмбөгдөж, зарлаж, зарлаж эцэст нь зартай “муу нэртнүүд” нь сураггүй болсон. Хоригдоо ч үгүй, хуулийн хариуцлага ч үүрээгүй.

ЗАРЛАЖ БАЙНА: ЗАРТАЙ “ЖЕНКО” Х.БАТТУЛГА

      Худал хэлсэн хүнд жагсаал болгоны ард “Женко” Х.Баттулга байгаа гэж зарлагдаж, чичлүүлсээр ирсэн. Төрийн ордны хойд талд 20-аад хүн жагсаж, цуглаж байсан “Женко” санхүүжүүлж байна” гэх яриа хүртэл гардаг.

УИХ-ын гишүүн Х.Баттулгын жагсаал санхүүжүүлсэн “хэрэг”-ийг жагсаавал “Ажлаа хий” жагсаалыг Х.Баттулга санхүүжүүлж, оюутнуудыг 50 мянгаар хөлсөлж байна. (2022.04 сар), Засгийн газрыг огцруулах жагсаалын ард Женко байна. (2022.01 сар) гэх мэт цааш хөвөрнө.

Харин хачирхалтай, жагсаал болгоны байж, зартай санхүүжүүлэгч болтлоо “дэвшсэн” Х.Баттулга “Би тэгээгүй, надад хам аагүй, би мэдэхгүй” гэдэг үгээ давтсаар л байдаг. Хамгийн сүүлд болсон жагсаалын үеэр тэрбээр “Гадаа байгаа жагсаал надад ямар ч хамаагүй. Тэгж ярих юм бол өргөн царигтай төмөр замын бодлого батлуулсандаа бахархдаг, цаашдаа ч бахархана” гээд зогсож байсан.

ЗАРЛАЖ БАЙНА: П.ЦАГААН, ЦАГААНЫ ХҮҮ,  Р.ЧИНГИС, Р.ЧИНГИСИЙН ДҮҮ САРУУЛ БОЛ САНХҮҮЖҮҮЛЭГЧ

         Оны эхний баривчилгаа “Ачит-Ихт”-ийн үүсгэн байгуулагч П.Цагаанаар эхлэх гэсэн боловч бүтэлгүйдлээ. Угсарсан, эзэндээ үйлчилж байгаа шүүхийн хонгилыг Ерөнхий сайд нурааж чадахгүй байгаагаа дахиад хэлэв. Өөрөөр хэлбэл тэрбээр Л.Оюун-Эрдэнэ өчигдөр мэдээлэл өгөх үеэрээ ийн ярьлаа.

       Тэрбээр “Шүүхтэй холбоотой асуудлыг би удаа дараа ярьж байсан. Харамсалтай нь, гүйцэтгэх засаглал шүүх засаглалын ажилд оролцоод байна гэдэг шүүмжлэл бий. Одоо шүүхийн байгаа байдлыг харахад Ерөнхийлөгч асан Ц.Элбэгдорж, "Сахал" Эрдэнэбилэг тэргүүтэй Ц.Элбэгдоржтой хамаарал бүхий хүмүүст шүүх үйлчилдэггүй. "Эрдэнэтийн 49 хувь"-тай холбоотой асуудал Дээд шүүх дээр очоод унадаг байдал 10 гаруй жил үргэлжиллээ. Би үүнийг ярихгүй байж болно. Гэтэл бодит байдал ийм байна. Саяын асуудал бол ойлгомжтой. Төмөр замын хэлэлцээрийг хийсэн цагаас эхлээд жагсаал цуглаан хийж эхэлсэн. Тэднийг П.Цагаан түүний хүү санхүүжүүлж байгаа. Мөн Дотоодын цэргийн командлагч Р.Чингис болон түүний дүү Саруул энэ жагсаалын санхүүжүүлж байгаа. Яагаад гэвэл эрх ашиг нь зөрчигдөж байгаа компани тэдний ард бий. Ц.Элбэгдоржийн гаднын нөхдүүдтэй хийсэн 2014 оны хэлцэл үнэнд гүйцэгдэж байгаа. Тиймээс гаднаас ирж олон нийтийн толгойг эргүүлэх гэж байгаа. Ерөнхий шүүгч Б.Ганзориг болон түүний бүрдүүлсэн баг Ц.Элбэгдоржийг хүмүүс. Тиймээс эзэндээ үйлчлэх гэж байна” гэж ярьж, жагсаал санхүүжүүлэгчийг дахин зарлав.

Ингэж зарлаад яг яах вэ. Цааш хөвөрдөөд явах уу, дарагдах үлдэх үү. Мянган удаа зарлаж, мянган удаа илрүүлсэн ч жагсаал санхүүжүүлэгчид нь хуулийн “үйлчилгээ” авахгүй юм биш үү гэх хардлага төрж байна.

.