“Ямар ч ядуу хүнд савангийн мөнгө олддог байхгүй юу” гэдэг шиг хэнд ч төрөх бэлтгэлээ хангачих ариун цэврийн цаас, живхний мөнгө олдоно. Эрүүл мэндийн даатгалын сангийн санхүүжилт 70-80 хувиар нэмэгдсэн гээд эмэгтэйчүүдийн төрөх бэлтгэлийг хангах ажилд төр заавал оролцох хэрэгтэй юү. Тэднийг живх, ариун цэврийн цаас зэргээр хангасан нэрийдлээр улсын мөнгийг эргэлдүүлж, хэд дахин нугалж "идэх"-ийг санаархаж байгаа бизнес чухам хэний шахаа вэ. Эмнэлгүүдээр дүүрэн шахааны бизнесээр орж ирсэн хэрэглэх, хэрэглэхгүй тоног төхөөрөмжүүд өрөө эзэлдэг бол даатгалын санхүүжилтийн мөнгө эмэгтэйчүүдийн төрөх бэлтгэлд урсах нь ээ. Төрөх эмэгтэйчүүдэд 70 мянган төгрөгийн багц олгох шийдвэр хэзээ, хэрхэн гарсан талаар холбогдох албаныхнаас тодрууллаа. 

Т.МӨНХСАЙХАН: “ТӨРӨХ ЭМЭГТЭЙЧҮҮДЭД 70 МЯНГАН ТӨГРӨГИЙН БАГЦ ӨГНӨ” ГЭСЭН ШИЙДВЭР ГАРААГҮЙ

    Энэ талаар Эрүүл мэндийн сайд Т.Мөнхсайханаас тодруулсан юм. Тэрбээр “Төрөх эмэгтэйчүүдэд 70 мянган төгрөгийн багц өгнө” гэсэн шийдвэр гараагүй. Би оны өмнөхөн “Амгалан” амаржих газарт ажиллах үеэрээ “Эмнэлэгт төрөхөөр ирсэн ээжүүдэд живх, ариун цэврийн хэрэглэл, глизм, ариун цэврийн цаас зэргийг бэлтгэж ирдэгийг болиулж, тухайн эмнэлэгээс олгодог болгох асуудлыг ярьсан. Ингэснээр Эх нярайн төрөлтийн дараах эрүүл ахуйн аюулгүй байдлыг сайжруулах, гэр бүлийн санхүүд дэмжлэг үзүүлэх юм. Би төрөх эмнэлгүүдийн удирдлагуудтай холбогдож, 70 мянган төгрөгийн багц олгож байгаа эсэх талаар тодруулсан. Өнөөдрийн байдлаар нэг ч эмнэлэг төрөх эмэгтэйчүүдэд багц олгоогүй байна. Заавал 70 мянган төгрөгийн багц гэлтгүй эмнэлгүүд төрөх эмэгтэйчүүдийг нэн шаардлагатай бүтээгдэхүүнээр хангах ёстой болж байгаа” гэсэн юм.

“АМГАЛАН” АМАРЖИХ ГАЗРЫН ДАРГА Ц.БАТБОЛД: ЭРҮҮЛ МЭНДИЙН ДААТГАЛЫН САНГИЙН САНХҮҮЖИЛТ 70-80 ХУВИАР НЭМЭГДСЭН ТУЛ ЭМЭГТЭЙЧҮҮДИЙН ТӨРӨХ БЭЛТГЭЛИЙГ ЭМНЭЛЭГ ХАНГАДАГ БОЛСОН

    Харин бид “Амгалан” амаржих газрын дарга Ц.Батболдоос төрөх эмэгтэйчүүдэд ямар тусламж үйлчилгээ үзүүлж эхэлсэн болохыг тодрууллаа. Тэрбээр “Төрөх эмэгтэйчүүдэд үзүүлэх тусламж үйлчилгээг сайжруулах зорилгоор гаднаас ариун цэврийн хэрэглэл, живх, ариун цэврийн цаас, глизм гэх мэт шаардлагатай бүтээгдэхүүнийг оруулахаа больж байгаа. Харин тус бүтээгдэхүүнээр тухайн эмнэлэг төрөх эмэгтэйчүүдийг хангах ёстой. Эрүүл мэндийн даатгалын сангийн санхүүжилт 70-80 хувиар нэмэгдсэн. Тиймээс төрөх эмэгтэйчүүдэд нэн шаардлагатай живх, ариун цэврийн хэрэглэл, ариун цэврийн цаас, глизм зэргээр хангаж, тусламж, үйлчилгээ асаргаа сувилгааны хэрэгслийг эмнэлгээс олгодог болсон. Энэ асуудал 2-3 жилийн өмнө яригдаж байсан. Харин энэ жил Эрүүл мэндийн даатгалын санхүүжилт нэмэгдсэнтэй холбоотойгоор хэрэгжиж эхлэж байгаа. Энэ бол халамжийн тусламж үйлчилгээ биш. Нэг эмэгтэй 624 мянгаар, хийсвэрээр төрөх юм бол 820 мянган төгрөгөөр төрдөг. Санхүүжилт нэмэгдсэнээр тухайн төлбөр дээр 70-80 хувь нэмэгдсэн гэсэн үг. Энэ шийдвэр Эрүүл мэндийн даатгалын үндэсний зөвлөлөөр орж, төрөх эмнэлэгүүдийн санхүүгийн чадамжийг дээшлүүлж, олон улсын стандартад шилжиж байгаа” гэв.

    Харин төрөх эмэгтэйчүүдэд нэн шаардлагатай бүтээгдэхүүн олгож байгаа эсэх талаар ЭХЭМҮТ-ийн Хэвлэл мэдээлэл, олон нийттэй харилцах албаны мэргэжилтэн н.Алтантуяагаас тодруулахад “Манай эмнэлэг төрөхөөр ирсэн эмэгтэйчүүдэд ариун цэврийн цаас, живх, глизм зэргийг олгож эхлээгүй байгаа. Яамнаас тийм шийдвэр ирээгүй учир эмэгтэйчүүд хувийн бэлтгэлээ хангаж ирж байгаа”гэсэн юм. Харин иргэд олон нийтийн сүлжээгээр төрөх эмэгтэйчүүдэд олгох 70 мянган төгрөгийн багц хэмээгдэж буй ариун цэврийн цаас, живх, глизм, ариун цэврийн хэрэглэл зэргийн үнийг бодож, 70 мянган төгрөгт хүрэхгүй байна. Эрх мэдэлтнүүд төрийн мөнгөөр тоглож, живх, хэрэглэл зэргээс мөнгө идэж байна хэмээн шүүмжилж байгаа.