“Монгол Улсын Засгийн газар, Бүгд Найрамдах Хятад Ард Улсын Засгийн газар хооронд Гашуунсухайт-Ганцмод боомтын хил дамнасан төмөр замын бүтээн байгуулалтыг хэрэгжүүлэх хэлэлцээрийг байгуулахад баримтлах үндсэн чиглэл батлах тухай” Улсын Их Хурлын тогтоолын төслийн анхны хэлэлцүүлгийг хийж байна.

       Хэлэлцүүлж буй асуудалтай холбоотой гишүүд асуулт асууж, хариулт авч байна. 

УИХ-ЫН ГИШҮҮН Б.ЖАРГАЛАН: Манай улс 2004 оноос нүүрс экспорлож эхэлсэн. Үүнээс хойш 2004-2023 оны хооронд нийт 410 сая тонн нүүрс экспорлож, 37.8 тэрбум ам.долларын орлого олсон. Өнгөрсөн найман жилийн хугацаанд үлэмж хувийг нь нийлүүлсэн бөгөөд 29.5 тэрбум ам,долларын орлого олжээ. 100 их наяд төгрөг гэсэн үг. Нүүрснээс Монгол Улс ийм их орлого олсон хэрнээ утаа түгжрэлээ шийдэж чадсангүй. Эдийн засгаа солонгоруулсангүй. Харин ч энэ доторх зөрчлийг даймжруулж, нийгэм дэх талцал хуваагдлыг нэмэгдүүлсэн. Харин ирэх 16 жилийн хугацаанд 270 сая тонн нүүрс нэмж гаргаад 34 тэрбум ам.долларын гэрээ хийх юм байна. Энэ гэрээг хийхдээ үнээ түгжиж байна. "Чайна Энержи" ХХК"-тай хийх эдийн засгийн үр өгөөжийг таниулмаар байна. Өнөөдөр энэ тогтоол багтлагдлаа гэхэд Засгийн газрын хэлэлцээрээ хийж процессоо зураглаад өгөөч. Их хурлын тогтоол батлагдаад "Эрдэнэс Тавантолгой" ХК-тай холбоотой ямар асуудал орж ирэх вэ.

ЗАМ ТЭЭВЭР, ХӨГЖЛИЙН САЙД Б.ДЭЛГЭРСАЙХАН: Өнгөрсөн найман жил нүүрсний орлого нэмэгдсэн нь үнэн. Энэ орлогоороо Гашуунсухайт-Ганцмодны болон Гашуунсухайт-Зүүнбаян чиглэлийн төмөр замыг барьсан. Төмөр замаа барьчихсан учраас холбох асуудлыг ярьж байна. Ямартай ч бид их хэмжээний нүүрс гаргах дэд бүтцээ сайн хийсэн. Үргүй зардал гараагүй. Том гэрээ баталагдсны дараа гурван гэрээ хийгдэнэ. Хоёр нь Аж үйлдвэр, эрдэс баялагийн яамтай холбоотой, нэг нь Зам тээвэр хөгжлийн яам дээр хийгдэх гэрээ бий.