Н.Удаанжаргал ирээд бараг буцах цаг нь болчихлоо. Буруутай бол шүүгдэх цаг нь ч болчихлоо. Гэвч тэр ирсэнгүй. “Ирж байна, Н.Удаанжаргалыг байршлыг оллоо, тогтоолоо, одоо очиж байна” гээд хоёр жил лав боллоо. Хамгийн сүүлд “Аргентинаас удахгүй авчирна” гээд арав гаруй сар болж, аар, саархан асуудалд дарагдаад өнгөрч байна.

            Н.Удаанжаргал дэндүү удаж байна. Ер нь удааж байна гэсэн үг л дээ. Тохироо хийв үү, тохиролцоонд оров уу гэдэг нь анхаарлын төвд асуултын тэмдэгтэй байгаа юм. Урагшаа гаргахаараа л алдчихдаг юм, манайхан. Араас нь хөөгөөд, “Шувуу” ажиллагаагаар шалгаагаад ч олж ирж чадахгүй л байна.

         АТГ-т ээрэгдэж, хэцүү нэртийн хаалга татахаа эртлэн мэдээд зугтаасан Н.Удаанжаргалыг хэзээ авчрах вэ гэж асуугаад ч нэмэргүй байна. Хариулах хүн, хариуцах эзэн ч алга. Үндэслэлгүй хөрөнгөжсөн хэрэг дээр нь нарийн царигийн хэрэг ч тохогдох нь. Гэхдээ хэрэг нь байхад эзэн нь алга. Өдийгөөс хоёр жилийн өмнө АТГ-аас "Эрдэнэс Тавантолгой" ХК-ийн охин компани болох “Тавантолгой” төмөр зам компанийн гүйцэтгэх захирал Н.Удаанжаргалын ажлын байранд нэгжлэг хийсэн байдаг. Хачирхалтай нь, Н.Удаанжаргал АТГ-аас нэгжлэг хийх үед хэдийнэ хил даваад “зугтчихсан” байсан гэх.

        Тэрбээр хил давсан талаараа тайлбарлахдаа “Би компанийнхаа инженер техникийн ажилтнуудтай БНСУ-ын Сөүл хотноо Солонгосын "Korea national railway", "Koreal" компаниудтай танилцахаар томилолттой явж байна. Бид Гүро галт тэрэгний СТС диспетчерийн нэгдсэн удирдлагын төв, "Коrеаl" оператор байгууллага, GTX-A төмөр замын барилгын ажил, галт тэрэгний туннель барих технологийн талаар туршлага судлах зэрэг томоохон зорилготой явна. Яагаад ийм мэдээлэл гарсныг мэдэхгүй юм” хэмээн хэвлэлд ярьсан ч өнөөдрийг хүртэл эх орондоо ирээгүй байна.

      Томилолт нь дуусаагүй юу, хууль хяналтын байгууллагыг Засгийн газартай нь, ард түмэнтэй нь "тонгорч" байгаа юм уу, бүү мэд. Ямартай ч тэр бараа сураггүй алга болчихоод багагүй хугацаа өнгөрч байна. Хамгийн сүүлд АТГ-ынхан Аргентин Улсаас сургийг нь гаргасан гэдэг. Мөн ч олон удаа “Н.Удаанжаргалыг одоохон баривчиллаа. Одоо баривчилж байгаа. Саатуулахаар баг явж байна. Машинаар очиж байгаа” гэж мэдэгдээд хоёр жил болох нь.

            Магадгүй, Н.Удаанжаргалыг авахаар очсон машинд учир ургасан байх. Тэр түүнийг хил давуулах байсан уу, хилээр давуулахгүй байсан уу, бүү мэд.

            Хамгийн хоржоонтой нь, нүүрсний сонсгол болоход Н.Удаанжаргал “Би гэрчээр оролцоно” гэж мэдэгдэж, монголчуудыг мэл гайхшруулж байгаад бас л Аргентинаасаа алга болсон. Дараа нь Малайзад байгаа сураг ч гарсан. Сүүлдээ, түүнийг санхүүжүүлж байгаа этгээдүүдийг ч илрүүлсэн гэх. Эцэст нь, тэр ирээгүй л байна. 

Сүр дуулиантай эхэлсэн “Шувуу” ажиллагаа Н.Удаанжаргалыг тойроод лавтай арван сар боллоо.