УИХ-ын гишүүн С.Цэнгүүн цаг үеийн асуудлаар мэдээлэл хийлээ.

    Тэрбээр “УИХ-ын гишүүний хувьд би Эрчим хүчний үндэсний хорооны Ажлын хэсэгт ороод ажиллаж байгаа. Уг хороонд зургаан Ажлын хэсэг байгаагийн нэг нь Олон нийттэй харилцах ажлын алба. Энэ хүрээнд салбарын нөхцөл байдлыг олон нийтэд танилцуулахаар 103 УИХ-ын гишүүний гарын үсгийг цуглуулж, дэмжих бүлэг байгуулж, ажлаа амжилттай зохион байгуулж байгаа. Эрчим хүчний тарифт өөрчлөлт орсонтой холбоотойгоор зарим хэвлэл мэдээллийн хэрэгслээр намайг олон тэрбум төгрөгийг хэвлэлд тараасан гэж гүтгэж байна. Энэ бол улстөржилт гэж бодоод, хувь хүний зүгээс ач холбогдолгүй өгөхгүй, орхиж байлаа. Гэтэл өчигдөр Ажлын хэсгийн хуралдаанаар Эрчим хүчний үндэсний хороо 2025 оны төсөвт найман тэрбумыг хэвлэл мэдээлэлд зарцуулна гэж тусгасан гэдэг мэдээллийг мэдээд үнэхээр цочирдлоо. Эрчим хүчний үндэсний хорооны төсөвт ийм зардал тавигдаж байгааг гишүүдэд хэлээгүй, танилцуулаагүй. Ийм учраас ийм байдлаар би цаашид хамтран ажиллах боломжгүй гэж харж байна. Хэвлэлд ийм өндөр зарцуулахаар төсөвлөж байгаа нь сэжигтэй, хариуцлагагүй асуудал. Ажлын хэсгийн ахлагчтай зөвшилцөхгүй байна гэдэг нь болчимгүй үйлдэл. Иймээс би энэ ажлын хэсэгт цаашид ажиллах боломжгүй болж байна. Миний нэрийг ашиглаад, улсын төсвөөс ийм их мөнгө гаргуулахыг би зөвшөөрөхгүй. Бид төсвөө танах ёстой гэж ярьдаг. Гэтэл хариуцаж байгаа ажлын хэсэгт нь ийм их төсөв зарцуулахаар тусгаж байгаа гайхаж байна. Ажлын хэсгийнхэн надад яагаад мэдээллээ танилцуулаагүй юм бэ" гэжээ.