ТӨРД ХЭРЭГГҮЙ Ж.ЧИНБҮРЭН 

        УИХ-ын гишүүн болчихвол монголчуудыг хавдаргүй болгочих юм шиг сонгуулийн сурталчилгаа хийж, ард түмнээ хуурсан Ж.Чинбүрэн Төрийн ордонд юу хийж байна вэ. Түүнийг УИХ-ын гишүүн болгочихвол эрүүл мэндийн салбар “сэхэж”, өвчтэй, зовлонтой хүн цөөрөх юм шиг итгэж, дэмжиж байсан иргэдийн найдвар бага багаар тасарч байна. Сонгуульд нэр дэвших болохоороо эмч мэргэжлээрээ нүүр хийж, хэнийг ч хамаагүй уулзсан газраа эмчлээд өгөх юм шиг сайхан аашилж, цагаан халад, чагнуур хоёроороо "гоёж" гудамжинд том том зураг хадуулдаг. Харин бусад цагт буюу гишүүн болчихоороо нүдэн балай чих нь дүлий байсаар гишүүнийхээ бүрэн эрхийн хугацааг дуусгадаг эмч мэргэжилтэй  хэд хэдэн гишүүн байна.  Олны дунд эмчээрээ алдаршсан түүнийг "УИХ-ын гишүүн гэж зангиа зүүж, Төрийн ордонд аль ч үгүй суухаар хэдэн мянгаараа хавдарт нэрвэгдсэн иргэдийнхээ нэгийг нь ч болтугай эмчилж, эрүүл  мэндийн салбарт төдийгүй, эх орондоо бодитой хувь нэмэр оруулаач ээ” гэх иргэдийн шүүмжлэл газар аваад байна. Тэрбээр УИХ-ын гишүүн болсноор эмчийнхээ хувьд чадваргүйжиж, улстөрчийнхөө хувьд карьергүй нэгэн болж байгаа. Учир нь, түүнийг гишүүн болсноос хойших сүүлчийн дөрөв, таван жилийн хугацаанд хавдрын өвчин буурах нь битгий хэл хоног хоногоор нэмэгдэж, хавдартай иргэд эмнэлэгтээ багтаж ядаж байна.  Харин тэрбээр эрүүл мэндийн салбарт төдийгүй эрүүл монгол хүний төлөө чухам юу хийж, иргэдэд яаж тусалж чадсан бэ гэдэг нь асуулт хэвээр үлдээд байгаа. Эмч мэргэжилтэй гишүүд тэр дундаа Ж.Чинбүрэн, Т.Мөнхсайхан нар Төрийн ордонд суугаад эрүүл мэндийн салбарт хууль, эрх зүйн талаас нь бодитой хувь нэмэр оруулж чадахгүй бол гарч ирээд эмчийн ажлаа хийсэн нь хэн хэндээ нэмэртэй юм биш үү. 

Ж.ЧИНБҮРЭН УЛСЫН ЭМНЭЛЭГТ ХУВИЙНХАА ЭМНЭЛЭГИЙГ ТОХИЖУУЛСАН УУ

УИХ-ын гишүүн Ж.Чинбүрэн нь Улаанбаатар хотын уугуул. 1997 онд АУИС-ийг хүний их эмч мэргэжлээр төгссөн. Улмаар 1998 оноос хойш ХСҮТ-д мэс заслын эмчээр ажиллаж байгаад 2016 онд ХСҮТ-ийн Ерөнхий захирлаар томилогдсон. Улмаар ХСҮТ-ийг дөрвөн жил удирдаад, 2020, 2024 онд Баянзүрх дүүргээс УИХ-ын гишүүнээр сонгогдсон. Харамсалтай нь, Ж.Чинбүрэнг УИХ-ын гишүүн болсноос хойш түүнийг цагаан халад шигээ цэвэр ариун намтартай нэгэн биш гэдгийг илчилсэн олон мэдээллүүд гарсан. Тухайлбал, “Медпортал” гэх хувийн эмнэлэг ХСҮТ-ийн зүүн жигүүрт байрлаж, хавдартай өвчтөнүүдэд томографи, хэт авиан оношилгоо хийдэг. Ж.Чинбүрэн ХСҮТ-ийн Ерөнхий захирал байхаасаа л ХСҮТ-ийг зорьж ирсэн өвчтөнүүдийг яаж ийгээд “Медпортал” эмнэлэг рүү оруулаад гаргадаг, ард нь ашгаа хувааж ирсэн гэлцдэг. Түүгээр зогсохгүй, Ж.Чинбүрэн УИХ-ын сонгуульд нэр дэвшихээр 2019 оны арванхоёрдугаар сард ХСҮТ-ийн Ерөнхий захирлын ажлаа өгөхдөө өөрийнхөө оронд найз Н.Эрдэнэхүүгээ томилсон. Улмаар УИХ-ын гишүүн болсноосоо хойш ч “Медпортал” эмнэлгээс хувиар хүртсээр ирсэн гэдэг.  

       Цаашилбал, Ж.Чинбүрэн 2014 онд “Каб Мед” ХХК-аараа УИХ-ын гишүүн М.Билэгтийн ХСҮТ-тэй хаяа залгуулан барьсан “Дөрөвдүгээрт эмнэлэг”-т сарын 10 мянган ам.доллароор менежментийн үйлчилгээ үзүүлэх гэрээ, төрсөн дүү Ж.Чинтулгынхаа “Некст натур”-ХХК-аар “Дөрөвдүгээр эмнэлэг”-ийн дотор тохижилтыг хийж өгөх 1.7 тэрбум гэрээ байгуулаад алга болсон гэх асуудал 2020 онд дэглэж байв. УИХ-ын гишүүн асан М.Билэгт Ж.Чинбүрэнгийн эл асуудлыг хэвлэлүүдээр хангалттай ярьж байлаа. УИХ-д Ж.Чинбүрэнгээс гадна Т.Мөнхсайхан, Б.Бейсен, Ц.Туваан, Д.Ганмаа гээд таван эмч мэргэжилтэй гишүүн байдаг. Эрүүл мэндийн салбарыг төлөөлөх тэд ирэх дөрвөн жилийн хугацаанд чухам юу хийж чадах бол.