Өмнөговь аймгийн Цогтцэций сумын Ерөнхий боловсролын Нэгдүгээр сургуулийн дээвэр нурж, есөн настай хүүхэд бэртсэн гэх мэдээлэл олон нийтийн сүлжээгээр цацагдсан. Хүүхдийн биеийн байдал ямар байгаа талаар тус сумын Засаг дарга Г.Бацмаагаас тодрууллаа.

Тэрбээр “Арваннэгдүгээр сарын 28-ны 18:20 цагийн үед манай сумын Нэгдүгээр сургуулийн нэг давхрын дээврийн шавар нурж, есөн настай хүүхдийн толгой хагарч, 4-5 оёдол тавиулсан. Тус хүүхдийг аймгийн эмнэлэгт хүргэж үзүүлсэн. Одоогоор сумын эмнэлэгт хэвтэн эмчлүүлж байгаа. Тав хоног эмчлүүлсэний дараа дараагийн шатны эмчилгээг хийлгэнэ. Дээрх асуудалтай холбоотойгоор аймгийн Онцгой байдлын комисс хуралдсан. Ингэхдээ тус сургуулийн байранд үйл ажиллагаа явуулах боломжгүй гэх дүгнэлт гаргасан. Тиймээс бид түрээсийн байр хайж сургалтын үйл ажиллагаа явуулах ажлыг зохион байгуулж байна. Тус сургууль нь 1996 онд ашиглалтад орсон. Хамгийн сүүлд 2019 онд урсгал засвар хийсэн. 2020 онд 960 хүүхдийн шинэ сургууль барихаар 6.7 тэрбум төгрөгийн тендер зарлаж, “Грийнресурс” ХХК барилгын ажлыг хүлээж авсан боловч ажлаа хийхгүй байгаа учир шүүхийн маргаантай байгаа” гэв.