Улсын төсөв будилаантай, булингартай байна. Их хурал нь улсын төсвөө баталж чадахгүй баахан “юм” боллоо. Би, чи дээрээ тулж, хоригт оруулсан төсвөө Засгийн газартаа буцаахдаа тулав. Буцаагаад ч булингар нь, будилаан нь арилах нь тодорхойгүй нөхцөл байдал өрнөлөө. Монгол Улс анх удаа УИХ-ын 126 гишүүнтэй болсон ч түүхэндээ анх удаагаа төсвөө баталж чадахгүй гацаанд оруулсан нь энэ байлаа. Өөрсдийн баталсан төсвөө өөрсдөө хүчингүй болгож, төсвийн төслийг арванхоёрдугаар сарын 10-ны дотор өргөн барих тогтоолын төсөл батлаад байна.

УЛСЫН ТӨСӨВ БУЮУ АНХААРЛЫН 18 ТЭРБУМУУД

...Төсөв баталж байна. Төсвөө батлах гэж байна. Төсвийн төслөө танилцуулах гэж байна. Төсвийн төслөө боловсруулж байна”...

Байна, байна, байна гэж баахан бэлэн амлаж, амаргүй төсөв баталж орхилоо гэсэн чинь ард түмний шүүлтүүрээр баалуулж, эцэст нь Ерөнхийлөгчийн хоригт орсон “гол буруутан”-ый нэг нь Ч.Номинг сайдын 18.3 тэрбумын ваучер байв. Тодруулбал, төсвийн төсөлд Соёл, спорт, аялал жуулчлалын сайд Ч.Номингийн захиран зарцуулах багцад тусгасан 18.3 тэрбум төгрөгөөр хүүхдүүдэд соёл, спортын ваучер олгох төсөв маргаан дагуулаад байгаа юм.

Хавдрын эмнэлэг нь хүнээ багтаахгүй, хорт хавдраар дэлхийд тэргүүлж, хүүхэд, багачууд нь ханиад, томуундаа дарагдаж, эмнэлгийн ор олдохгүй хонгилд хэвтэж байхад ваучер олгох нь хэний ч бухимдлыг хүргэнэ. Тэгээд дээрээс нь, сайд нь “Соёлын ваучерын 18 тэрбум төгрөгийг би хасуулахгүй Би төсвөө хамгаална. Намайг гүтгэх гэж маш их хэмжээний хөрөнгө зарцуулсан” хэмээн мэдэгдсэн нь гал дээр тос нэмэв.

        Харин УИХ-ын гишүүн Ж.Баярмаа үүнийг хамгийн их эсэргүүцэж, "Өсвөр үеийнхэнд мөнгө тарааж бэлэнчлэх сэтгэлгээнд сургах гэж байна. Эцэг эхнийх нь ажил орлогыг нэмэгдүүлж, ажлын байртай болгоё. Өөрсдөө орлого олоод, мөнгөө төлөөд үзвэр үйлчилгээ авах ажлыг хийе. Дөнгөж 18 нас хүрэх гэж байгаа хүүхдүүдийг бэлэнчлэх сэтгэлгээнд сургаж, соёлжуулах биш улам соёлгүй болгож байна. Өсвөр насныхныг гэгээрүүлэх нэрийн дор сонгуульд бэлдэх ажиллагааг болих хэрэгтэй. Төсвийг хэмнэнэ, үр ашигтай зарцуулна гэж ярьчхаад цагаа тулахаар үнэгүй ваучер тараана гэж байна. 18.3 тэрбум төгрөг бага мөнгө биш. Энэ мөнгийг цэцэрлэг, сургууль, хавдрын эмнэлэгтээ зарцуулъя. Жил болгон 7000 хүн хавдраар өвдөж байна. Гэтэл хавдрын эмнэлэг байхгүй. Энэ 18.3 төгрөгийг эмнэлэгт зориулъя" гэсэн юм.

Үнэндээ, Ч.Номин, Ж.Баярмаа нарын улс төрийн “зодоон” шиг харагдсан энэ төсөв хасагдах уу, эс хасагдах уу гэдэг нь тодорхой болох нь.

Харин Ч.Номингийн 18.3 тэрбумын ваучераас гадна энэ тооны төсөвтэй хоёр ч сайд байгааг бид танилцуулж байна.

Б.БАТЦЭЦЭГ, О.АЛТАНГЭРЭЛ САЙДЫН 18.3 ТЭРБУМЫН ТӨСВИЙГ Ч ХАСЪЯ

         Улсын төсвийн анхаарал байгаа 18.3 тэрбумын ваучераас гадна өөр ямар сайд өөр дээрээ үүнтэй адил төсөв тавиулсан бэ гэдгийг харж үзлээ. Ард түмэн 18 тэрбум төгрөг гэвэл одоо андахаа больсон. Бараг л “Номин сайдын төсөв” гэж тодотгох нь холгүй байна.

Гадаад харилцааны сайд Б.Батцэцэг

-Шинээр барилга байгууламж барих- 18.4 тэрбум төгрөг

Хууль зүй, дотоод хэргийн сайд О.Алтангэрэл

-Улсын хил хамгаалалтын зориулалтын инженерийн байгууламжийн шинэчлэлт /Улсын хэмжээнд/- 18.3 тэрбум төгрөг

            Улсын төсвийн “дайсан” болсон анхаарлын төвд байгаа 18 тэрбум төгрөгийн төсвүүдийг бүгдийг нь хасъя. Хэн, хэнгүй хасаж орхихоор хүүхэд, залуучуудыг кино үзүүлэхээр улайран дайрч байгаа Ч.Номин сайд ч хүчлэхгүй болох биш үү.